4
Kwa ego, abhahiiri bhaani abhahanje kuimani, munage okumwisigira Omukuru Yeesu. Mbahanjiri na ndeegomba okumaahana na bheenyu. Bheenyu m-bujomerwa bhwani kweki m-mutuho gwani gunú ngʼeerwe okurekana na emirimu ginú nkoreri.Obhutongeri bhwa Pauro
2 Ndabhakomererya bhukongʼu Euodia na Sintike bheekare hamwi kwa ensonga eimwi, kwa okubha bhonsego bharasoorana Omukuru Yeesu. 3 Kora uuwe unú oringi omukori wa emirimu omurikyani omuheene, ndasabha obhabheere abhakari abhabhiri bhayo, bhabhe na ensonga eimwi. Abhabhiri bhayo bhonsego, bhaakora ekituunyo bhukongʼu hamwi na oni kukuraarika Amangʼana Amajomu kubhantu. Kweki abhakari bhayo, bhaaringa bharakora emirimu hamwi na Kirementi na abhakori bha emirimu abharikyani abhandi. Amariina ga abhantu bhayo bhonsego, garingi mukitabho kya obhuhoru bhwa koko ekya Waryubha.
4 Mujomerwe eginsiku gyonsego kwa okubha muringi abhantu bha Omukuru Yeesu, kweki ndagamba ega, mujomerwe! 5 Obhunyoohu bhwenyu bhumanyikane kubhantu bhonsego. Omukuru Yeesu aringi haangʼi. 6 Muteenyankya kwa eringʼana ryoryonse, nawe kukira eringʼana, mubhenga murasabha na okumukumya Waryubha, naho ganú mureenda agamanye. 7 Mbe, Waryubha aribhahaana omurembe okukira endengo ya obhumanyi. Omurembe guyo, guryangararira bhujomu emitima gyenyu na obhungʼeeni bhwenyu, kwa okubha bheenyu mwagwatana na Kiristu Yeesu.
8 Mbe bhoono, abhahiiri bhaani kuimani, amangʼana gogonse aga maheene, amangʼana gogonse ganú gareenderwa okusuukwa, amangʼana gogonse ga obhuheene, amangʼana gogonse ganú gatareesanganʼya na obhusarya, amangʼana gogonse ganú garasambaarukya, amangʼana gogonse ganú garajomera, amangʼana gonsego amajomu, na amangʼana gonsego ganú garagungibhwa bhujomu, mugeeganiriryenga. 9 Mugendererye okukora amangʼana ganú mweehigira na okugwata okurwa kuoni, ganú mweegwa na okurora ndakora. Muraakore gayo, nho Waryubha unú arabhahaana omurembe, arigendererya okubha hamwi na bheenyu.
Pauro arakumya Abhafiripi
10 Mbe, njomeerwe bhukongʼu na okumukumya Omukuru Yeesu, kwa okubha bhoono mwambiri kweki okunganirya, kya ego mwaringa muranganirya, nawe, mukabha murabhura omweya gwa okumbeera. 11 Ntakugamba ego, kwa okubha ndeenda okunyoora ekintu, tiigo-ha. Oni nihigiiri okwikara kwa okwiswa na kinú niinakyo. 12 Nihigiiri okwikara kitobhu, kweki nihigiiri okwikara kiniibhi. Nihigiiri okwikara okuringʼaana na amangʼana gogonse ganú garannyoora, ebhe n-kwibhaga rya ebhyakurya kasi n-kwibhaga rya enjara, ebhe n-kwibhaga rya okubha na ebhintu ebhyaru, kasi n-kwibhaga rya okusuuhirwa. 13 Ndatura okukora gonsego gayo, kwa okubha Kiristu ngʼo arangʼaana eginguru.
14 Kora ego, mwakora bhujomu hanú mwasanga na oni munyanko yaani. 15 Bheenyu Abhafiripi, abheene mumanyiri ega, eribhaga rinú naamba okubharaarikira Amangʼana Amajomu, na eribhaga rinú naarwa mukyaro kya Makedonia, bheenyu abheenego, mbo mwaringa murambeera. Erikanisa ryenyu ndyo ryaringa na obhumwi na oni, kukuruusya na okunyoora ebhintu. 16 Kora hanú naaringa mumugi gwa Tesaronike, mwandeeteranga ebhintu bhya okumbeera, na etaringi rumwigo. 17 Ntakugamba ego, kwa okubha ndeenda okunyoora ebhintu okurwa kubheenyu, tiigo-ha. Nawe, kinú ndeenda niiga, Waryubha abhanonke okurekana na obhuserenʼya bhwenyu.
18 Bhoono, ebhintu bhyonsego bhinú mwatuma Epafurodito yaandeetere, naabhinyooreri. Bhyakuneenʼye obhwendi bhwani bhonsego, kweki m-byaru okukira kya ego neendanga. Ebhintu bhiyo, n-kya ekimwenso kinú kirarangasira, esadaaka inú ereekiriribhwa na okumungʼarira Waryubha. 19 Mbe, Waryubha waani, aribhahaana kira kinú mureenda okuringʼaana na obhuniibhi bhwaye obhukuru. Arikora ego, kwa enjira ya Kiristu Yeesu.
20 Waryubha, Taata weetu, agungibhwe koko na koko! Amina!
Okukeeranʼya kwa okuraga
21 Munkeeranirye abhantu bha Waryubha bhonsego, bhanú bhaagwatana na Kiristu Yeesu. Abheekirirya bhanú bharingi hamwi na oni enu, bhonse bharabhakeeranʼya. 22 Kweki abhantu bha Waryubha bhonsego, ekinene bhanú bharingi owa Kaisaria wa hanu, bhonse bharabhakeeranʼya.
23 Eriruguto rya Omukuru weetu Yeesu Kiristu ribhe hamwi na bheenyu bhonsego.