5
Mbe, kwa okubha bheenyu m-baana bha Waryubha na abhahanjiri bhukongʼu, mugwate enteemo yaaye. 2 Mwikarane kwa obhuhanje, kya ego Kiristu yaabhahanja bheenyu, akeeruusya okukwa kurusumo rwetu, akabha ekimwensoa na esadaaka inú erarangasira ku Waryubha.Okwikara kya ego Waryubha areenda
3 Bhoono bheenyu mutakora amangʼana ganú garaakore abhantu bhagambe ega, muringi abhasimbe, abhakonu na abha orunamba rwa ebhintu, kwa okubha ebhikorwa bhya ekabhira iyo, bhitakwenderwa mubharabhu bha omutima. 4 Mutagamba amangʼana ga eginsoni, ga ekikangi kasi ga eginhaka, gayo gatakwenderwa. Nawe, amangʼana ganú gareenderwa n-ga okumukumya Waryubha.b 5 Okubha na orunamba rwa ebhintu n-kya okusyengera ebhisusano okutiga Waryubha.c Mumanye obhuheene ega, abhakori bha obhusimbe, abhakonu na abhanamba bha ebhintu, bhatarigabha obhukama bhwa Kiristu na Waryubha.d 6 Amangʼana kya gayo, ngo garakora Waryubha arajimira abhantu bhanú bhatakumwigwa. Muteekirirya omuntu wowonse abhangʼeenererye kwa amangʼana ageenego, naho mukore gayo. 7 Kwa ego, mutagwatana na abhantu kya bhayo, 8 kwa okubha, akare hayo bheenyu mwaringa mukisunte, nawe bhoono, muringi mundingaasi kwa okuhitira ku Mukuru Yeesu. Mwikare kya abhantu bha endingaasi, 9 kwa okubha obhwera bhwa okwikara mundingaasi n-kukora amangʼana amajomu na aga obhuheene. 10 Mumanyiiriryenga ganú garamujomera Omukuru Yeesu, ngo mukore. 11 Mutabhanga muragwatana na amakorwa ga mukisunte ganú gataana obhwera, nawe, mubhenga muragakemera, 12 kwa okubha amangʼana ganú garakorwa bhugunyi na abheene ni-ginsoni kora okugagamba. 13 Nawe, amangʼana gayo gonsego hanú garaatuurwe mundingaasi, garamaahikana kya ego garingi. Hanú endingaasi eroorokya ekintu, kyonse kireehunjura okubha endingaasi. 14 Nkyo kirakora eragambwa ega, “Bhuuka uuwe unú wihiriibhwe! Ohyuke okurwa mubhaku, Kiristu araaja okukumirikira.” 15 Kwa ego, mwangararire kya ego mureekara. Mutabha kya abhantu bhanú bhataana egintungwa, nawe, mwikare kya abhantu bhanú muuna egintungwa. 16 Mutumire bhwaheene eribhaga rinu, kwa okubha eginsiku ginu n-gya amabhiibhi. 17 Kwa ego, mutabha abhakangi, nawe, musakye okumanya ganú Omukuru Yeesu areenda. 18 Kweki mutarehwa,e kwa okubha kurareeta obhunyamuke. Nawe, mwijuribhwe na Omutima Omurabhu. 19 Muhairenga kwa egijabhuri, ameembo na egitenji gya mumutima. Mumwimbirenga na okumwikirirya Omukuru Yeesu, kwa emitima gyenyu gyonsego. 20 Na mumukumyenga Taata Waryubha, kumangʼana gonsego, eginsiku gyonsego, okuhitira kuriina rya Omukuru weetu Yeesu Kiristu.
Ameehigiryo eguru ya abhakari na abhasaaja
21 Mubhenga murasuukana bheenyu abheene kwa abheene, kwa okubha muramusuuka Kiristu.
22 Bheenyu abhakari, musuukenga abhasaaja bheenyu, kya okumusuuka Omukuru Yeesu, 23 kwa okubha omusaaja m-mutwe gwa omukari waaye. N-kya ego Kiristu wonse, m-mutwe gwa erikanisa, erikanisa ndyo omubhiri gwaye, na Kiristu ngʼo Omutuurya wa omubhiri guyo. 24 Mbe, kya ego erikanisa riramusuuka Kiristu, egoego abhakari bhonse bhareenderwa okwigwa abhasaaja bhaabho kwa kira eringʼana.
25 Na bheenyu abhasaaja, mubhahanje abhakari bheenyu, kya ego Kiristu yaahanja erikanisa, akeeruusya omwene kurusumo rwaryo. 26 Yaakora ego, naho araame erikanisa kwa eringʼana rya Waryubha, na okurirabhya kwa amanji ga obhubhatiijo.f 27 Yeendanga yeenyoorere erikanisa erirabhu, rinú ritaana akakorikori kora amasoro gogonse. 28 Egoego, abhasaaja bhareenderwa abhahanje abhakari bhaabho kya emibhiri gyabho abheene. Omusaaja unú arahanja omukari waaye, areehanja omwene. 29 Atariho omuntu wowonse unú arajimira omubhiri gwaye omwene, nawe, araguriisya na okugwangararira bhujomu. Ego niigo, Kiristu wonse arakorera erikanisa ryaye, 30 kwa okubha bheetu tugwataniibhwe kumubhiri gwaye. 31 N-kya ego Amangʼoore Amarabhu garagamba ega, “Kwa ekisigo kiyo, omusaaja aribhatiga esewaabho na ngʼina waabho, aribha hamwi na omukari waaye, na bhabhiri bhayo, bharibha omubhiri gumwi.”g 32 Amangʼana gayo gaana ekinyerera, na ekinyerera kiyo, n-kikongʼu bhukongʼu okukimanya, nawe oni ndarora ega, ekinyerera kiyo kirahairira eguru ya Kiristu na erikanisa ryaye.
33 Mbe, ndabhakeerya kweki ega, kira omuntu amuhanje omukari waaye kya omutima gwaye omwene, na omukari wonse, atarosa okumusuuka omusaaja waaye.