Okwikara kwa obhumwi kya omubhiri gumwi
4
Mbe, oni omubhohwa kwa okubha ndamukorera emirimu Omukuru Yeesu, ndabhakomererya mwikare, okuringʼaana na okubhirikirwa kunú Waryubha yaabhabhirikirira. 2 Mubhenga mureesuuhya, mubhe abhanyoohu, mwigumiriryenga, na mugegeranenga kwa obhuhanje. 3 Mukore ekituunyo okwangararira obhumwi bhunú twagwatanibhwa na Omutima Omurabhu, kwa okwikara kwa omurembe. 4 Bheetu bhonsego turingi kya omubhiri gumwi na twanyoora Omutima Omurabhu oumwi, kya bhurya twabhirikirwa na Waryubha tubhe na obhwisige obhumwi. 5 Omukuru weetu ngʼ-umwi, eimani yeetu ngʼ-imwi na obhubhatiijo bhwetu m-bumwi. 6 Turasyengera Waryubha umwi, weeki ngʼo Taata wa bhonsego, aringi eguru ya bhonsego, arakora emirimu kubhonsego na amenyeri mubhonsego.7 Kiristu yaahaana kira oumwi weetu eriruguto, okuringʼaana na kya ego omwene yeendanga. 8 Nkyo kirakora Amangʼoore Amarabhu garagamba ega,
“Hanú yaagya eguru, yaahaana abhantu emituho,
ebhintu bhinú yaanyoora okurwa kubhabhisa bhanú yaatumbarira.”a
9 Mbe, okugamba ega, “Hanú yaagya eguru,” ensonga yaaye niki? Ensonga yaaye niiga, Kiristu yeetuuma okuhikira hansi mukyaro. 10 Weeki uyo yeetuuma okuhikira hansi mukyaro hanu, ngʼo uyo yaagya eguru ya orwire ronsego, naho ature okwijurya ebhintu kira ahasi. 11 Weeki ngʼo yaasora abhantu abhandi okubha abhatumwa, abhandi abharooti, abhandi abharaariki, abhandi abhariisya na abheehigirya. 12 Yaakora ego, ature okuseemerya Waryubha abhantu, bha okumukorera emirimu, naho abheekirirya bhayo bhonsego bhanage kya omubhiri gwa Kiristu. 13 Eringʼana riyo, riraagendererye okuhikira bheetu bhonsego hanú turibha abhaniibhi kuimani yeetu, na okumumanya Omwana wa Waryubha. Turibha abhantu bhanú tunagiri, kya Kiristu. 14 Hayo tutarihumbibhwa enu na enu kya abhaana abharera, kwa emiyaga gya ameehigiryo ganú abhantu abhangʼeenererya bhareebhukya. Abhantu bhayo, oranyoora bhareenda bhabhahabhye kwa ameehigiryo gaabho aga obhubheehi. 15 Nawe, hanú turaagambiranenga obhuheene kwa omutima gwa obhuhanje, turanaga kumangʼana gonsego, kora turingʼaane na Kiristu. Weeki ngʼo omutwe gwa abheekirirya.b 16 Weeki aragwatanʼya abhantu bhaaye bhonsego bharabha bhamwi, kya ego emiki giragwatanʼya ebhiroobhero bhya omubhiri, gurabha gumwi. Nyoore kira ekiroobhero kiraakore emirimu kya ego ereenderwa, gurakiina na okunaga. Abheekirirya bhonse niigo, nyoore kira oumwi weetu araakore emirimu ginú Kiristu yaatuhaana kya ego ereenderwa, turanaga kwa okuhanjana.
Obhwikari obhuhya na obhwikari bhwa akare
17 Mbe, kwa obhutungi bhunú Omukuru Yeesu yaangʼaana, ndabhakomererya ega, muteekara kweki, kya ego abhantu bhanú bhatamumanyiri Waryubha bhareekara. Bheeki ameetegeerero gaabho, gataana obhwera. 18 Na obhungʼeeni bhwabho eguru ya obhuheene bhwa Waryubha, bhuribhirwe. Bharingi hare na obhuhoru obhujomu bhunú bhurarwa ku Waryubha. Bhaakorwa ego, kwa ekisigo kya obhukangi bhwabho, bhunú bhurarekana na obhukongʼu bhwa emitima gyabho. 19 Bhatakurora eginsoni kora hake, bheesoherye kumangʼana ga eginsoni. Kweki bhaana orunamba rwa okugendererya okukora amangʼana amabhiibhi gayo.
20 Nawe bheenyu, muteehigiribhwa ego, eguru ya Kiristu. 21 Niina obhuheene ega, mweegwa bhujomu amangʼana eguru yaaye, na mweehigiribhwa obhuheene kya ego bhuringi, eguru yaaye. 22 Mweehigiribhwa ega, mutigane na eginteemo gyenyu egya akare, ginú gyasaribhwa na orunamba rwa obhungʼeenererya, 23 naho mukorwe bhuhya emitima na ameetegeerero geenyu. 24 Kweki ega, mubhe na eginteemo eginhya, kya ego Waryubha yaatubhumba tutuubhane nawe. Na mubhe abhaheene bira amasoro.
25 Kwa ego, mutige obhubheehi. Kira omuntu akeeryenga abharikyaye obhuheene, kwa okubha bheetu bhonsego n-kya ebhiroobhero kumubhiri gwa Kiristu. 26 Hanú murajima, mutakora obhusarya, eryubha ritasikira mukyajimiri. 27 Okujima kurahaana Erisambwa omweya gwa okubhahiga. 28 Omwibhi, ateebha kweki, nawe, yaambe okukora kwa amabhoko gaaye omwene, emirimu ginú gireekiriribhwa, naho ature okubha na ekintu kya okugabhira-ko unú ataana ekintu. 29 Eminwa gyenyu gitagamba amangʼana amabhiibhi. Nawe, gigambe amangʼana amajomu ga okuhagaaja abhandi okurekana na obhwendi bhwabho. Gayo, garatura okubha na obhwera kubhanú bharageetegeerera. 30 Mutakora Omutima Omurabhu wa Waryubha asurumbare, kwa okubha weeki n-dubhaaso rwa Waryubha kubheenyu, runú ruroorokya ega, bheenyu m-bantu bhaaye, okuhikira orusiku runú Waryubha aritutungurya.c 31 Mbe, mutigane na obhururu, ekisorooro, enkoro, ekituri, amatuki na obhubhiibhi bhwa amanga gonsego. 32 Mubhenga abhaserenʼya, abha ekyabhira, na mwabhiranenga kya ego Waryubha yaabhaabhira bheenyu kwa enjira ya Kiristu.