Ameehigiryo eguru ya abhaana na abheebhuri
6
Bheenyu abhaana, mubhasuukenga abheebhuri bheenyu, kwa okubha mugwateeni na Omukuru Yeesu. Okukora ego, ni-ngʼana ejomu. 2 N-kya ego Amangʼoore Amarabhu garagamba ega, “Obhasuuke eseweenyu na ngʼina weenyu.” Rinu ndyo eriragiriryo erya mbere, rinú ryoongeribhwa endago ega, 3 “Okorenga ego, naho onyoore enonkwe na wikare eginsiku eginjaru mukyaro.”a4 Na bheenyu bhataata, mutabhatindira abhaana bheenyu. Nawe, mubharere kwa egintungwa na ameehigiryo ga Omukuru Yeesu.
Ameehigiryo eguru ya abhagaya na abhakuru bhaabho
5 Bheenyu abhagaya, mwigwenga abhakuru bheenyu bha mukyaro hanu, kwa obhusuuku na okurigita na kwa omutima gumwi, kya ego muramwigwa Kiristu. 6 Mukorenga ego, etabha kwibhaga rinú bharabhaangararira eryenego, naho mwikangatirirye kubheene. Nawe, mubheegwenga, kya abhagaya bha Kiristu, enu murakora kwa omutima gumwi, ganú garamujomera Waryubha. 7 Mukorenga emirimu kwa omutima gumwi, kya muna muramukorera Omukuru Yeesu, etabha kya muna murakorera abhantu. 8 Mumanyenga ega, kira omuntu unú arakora amajomu, abhe omugaya kasi unú ataringi omugaya, Omukuru Yeesu arimutuura okuringʼaana na amajomu gaaye.b
9 Na bheenyu abhakuru, mukorerenga abhagaya bheenyu bhonse, amajomu. Mutabhakanga, mumanye ega, Omukuru waabho na oweenyu ngʼ-umwi, aringi murwire, kora weeki atakungʼahirya omuntu.c
Ebhigwato bhya Waryubha
10 Mbe bhoono, munage kukugwatana na Omukuru Yeesu, kwa obhuturo bhwa eginguru gyaye. 11 Mwambare ebhigwato bhyonsego bhya Waryubha, naho muture okwanga eniku ya Erisambwa. 12 Ndagamba ego, kwa okubha, eriihe ryetu ritaringi gati yeetu na abhantu, nawe, eriihe ryetu, riringi eguru ya abhasirikare bha ebhihwi ebhibhiibhi, bhya orwire rwa eginkoro. Turarwana na abhatungi, abhakuru na abha eginguru bha eguru bhanú bhagwatiriri orwire runu orwa ekisunte. 13 Kwa ego, mwambare ebhigwato bhyonsego bhya Waryubha, naho orusiku rwa obhubhiibhi hanú rurihika, muture okwibhagirira. Na hanú eriihe ririhwa, mutame munagiri. 14 Mbe mwiseemye, obhuheene bhubhe kya omuchipi mubhukende, na amakorwa geenyu ga heene gabhe kya engubha ya okuribha kukikubha, 15 na ekituunyo kya okuraarika Amangʼana Amajomu ga omurembe, kibhe kya eginkeeto kumaguru geenyu. 16 Okutiga gayo gonsego, eimani ebhe kya engubha mumabhoko geenyu, ebhabheere okuribhira emisimu gyonsego egya omururo gya omusarya urya Erisambwa. 17 Obhutuurya, bhubhe kya engofiira ya ekyuma kumitwe gyenyu, na eringʼana rya Waryubha, ribhe kya omuhyu gunú murahaanwa na Omutima Omurabhu.
18 Mubhenga murasabha eribhaga ryonsego, okuringʼaana kya ego Omutima Omurabhu arabhoorokererya. Na hanú muraasabhenga, mutumirenga amanga gonsego ga amasabho na egisaara. Mutengeejenga kurusumo rwa eringʼana riyo, na munage okubhasabhira abhantu bha Waryubha bhonsego. 19 Munsabhirenga na oni, ega, Waryubha yangʼaanenga amangʼana ga okugamba, kira hanú ndahaira, naho ndaarikenga bira obhoobha obhuheene bhunú Waryubha yaatutubhurira mu Mangʼana Amajomu. 20 Oni m-muraariki wa Amangʼana Amajomu eguru ya Yeesu Kiristu, na gayo ngo garakora ndingi mukibhohe. Mbe, munsabhire naho nture okugaraarika bira obhoobha kya ego ndeenderwa.
Okukeeranʼya kwa okuraga
21 Tukiko, omuhiiri weetu omuhanje kuimani, na omukori wa emirimu gya Omukuru Yeesu kwa obhuheene, aribhakeerya kira ekintu, naho mumanye kya ego ndagendererya na kinú ndakora.d 22 Ndamutuma kubheenyu, ekinene kwa ekisigo kiyo, muture okumanya kya ego turagendererya na okubhateremya.