Obhwiyagaari bhwa Omukiristu
5
Kiristu atutungwirye okurwa mubhugaya bhwa amaragiriryo, naho twiyagaare. Mbe, munage kuimani, kora kweki muteekirirya okuhunjuka mubhugaya bhwa amaragiriryo. 2 Mwitegeerere, oni Pauro ndabhakeerya ega, nyoore mureekirirya okusaarwa kurusumo rwa okugwata amaragiriryo, hayo Kiristu atakubha na obhwera bhobhonse kubheenyu. 3 Ndabhakeerya kweki kubhurabhu ega, omusaaja wowonse unú areekirirya okusaarwa, areenderwa okugwata amaragiriryo gonsego. 4 Nyoore mureesiga okubharwa ega, muringi abhaheene embere ya Waryubha, kwa okugwata amaragiriryo, mbe, mwiyahwiri okurwa ku Kiristu, na mwibhuriirye eriruguto rya Waryubha. 5 Nawe, Omutima Omurabhu aratubheera bheetu okwisiga ega, Waryubha aritubhara okubha abhantu abhaheene, kwa okubha turamwikirirya Yeesu. 6 Mbe, nyoore twikiriirye okugwatana na Kiristu Yeesu, okusaarwa kasi okutiga okusaarwa kutaana obhwera bhobhonse. Ekintu ekinene kya obhwera, ngʼ-imani yeetu inú erakora emirimu kwa obhuhanje.7 Kubhwambiro, mwaringa murakora bhujomu! Bhoono, niwi yaabhangʼeenererye mutagwata ameehigiryo ga obhuheene? 8 Obhungʼeenererya bhuyo, bhutakurwa ku Waryubha unú abhabhirikiiri. 9 Nawe, mumanye ega, “Ekimera ekikego, kirabhimbya eriguma erigima!”a 10 Mmanyiri obhuheene ega, mureekiriranʼye na oni, kwa okubha bheenyu mugwateeni na Omukuru Yeesu. Nawe, omuntu wowonse unú aribhanyankya, kora akaabha owi, aribhuturirwa ekiina.
11 Abhahiiri bhaani kuimani, abhantu abhandi bharagamba ega, oni ndaraarika ega, kira omusaaja niiga, asaarwe. Nyoore maheene niigo ndaraarika, kwaki Abhayahudi bharannyankya? Na nyoore niigo ndaraarika, obhuraariki bhwani eguru ya okukwa kwa Yeesu Kiristu kumusarabha, kutakukora Abhayahudi bhambihirirwe. 12 Ndeegomba ega, abhantu bhanú bharabhanyankya kwa amangʼana ga ensaaro, nyakara bhakeeyihiri bheeki abheene!
Okwikara kwa obhuturo bhwa Omutima Omurabhu
13 Abhahiiri bhaani kuimani, Waryubha abhabhirikiiri, naho mwiyagaare. Nawe, obhwiyagaari bhwenyu, bhutabhakora mubhe na omweya gwa okugwata orunamba orubhiibhi rwa omubhiri, nawe, mubheeranenga kwa obhuhanje. 14 Ndagamba ego, kwa okubha amaragiriryo gonsego garakunaanibhwa na eriragiriryo rimwi ega, “Omuhanje omurikyaho kya ego oreehanja uuwe omwene.”b 15 Nawe, nyoore murarumana na okwirya kya egintyenyi, mwiyangararire, naho mutariija okwisikya bheenyu abheene.
16 Mbe, kinú ndabhakeerya niiga, enteemo yeenyu ebhe eroorokereribhwa na Omutima Omurabhu. Mukaakora ego, mutarigwata orunamba orubhiibhi rwa omubhiri. 17 Ndagamba ego, kwa okubha bhyonsego bhinú orunamba orubhiibhi rwa omubhiri rureegomba, bhitaringi kya bhinú Omutima Omurabhu areegomba. Na bhinú Omutima Omurabhu areegomba, bhitaringi kya bhinú orunamba orubhiibhi rwa omubhiri rureegomba. Omutima Omurabhu na orunamba orubhiibhi rwa omubhiri, bhirasongana. Okurekana na riyo, mutakwiyagaara okukora kyokyonse kinú mureenda. 18 Nyoore muroorokereribhwe na Omutima Omurabhu, mutakubha insi wa amaragiriryo.
19 Mbe, amangʼana ganú garakoreka kwa orunamba orubhiibhi rwa omubhiri, gamanyikeeni kubhurabhu, na n-ganu, obhusimbe, obhusuunu, okukora amangʼana ga eginsoni, 20 okusyengera ebhisusano, obhuturutumbi, obhusigu, eritoongʼana, orwango, enkoro, eginhaka, erigamba, 21 orungʼeera, obhureebhi, enamba na amangʼana agandi gonsego ganú garahunkana kya gayo. Ndabhakeerya kweki kya ego naaringa mbakeererye, ega, abhantu bhanú bharakora amangʼana gayo, bhatarigabha kyokyonse mubhukama bhwa Waryubha.c 22 Nawe, emisumo gya Omutima Omurabhu, m-buhanje, obhujomerwa, omurembe, obhwigumirirya, obhuserenʼya, obhusambaaruku na eimani, 23 obhunyoohu na obhwiribhiri. Ritariho eriragiriryo rinú rirakaanʼya omuntu okukora amangʼana gayo. 24 Abhantu bhanú bhagwateeni na Kiristu Yeesu, bhatakutungwa na orunamba orubhiibhi rwa omubhiri, hamwi na ameetegeerero gaabho amabhiibhi. N-kya muna bhaabhamba eginteemo gyabho gya akare, kumusarabha gwa Yeesu. 25 Omutima Omurabhu atuheeri obhuhoru obhuhya, mbe twikare kwa obhutungi bhwaye. 26 Tuteegungya bhusa, tutatindirana kora okumaahirana orungʼeera.