Okubheerana na okukora amajomu
6
Abhahiiri bhaani kuimani, mukaamanya ega, omurikyenyu akoreri obhusarya bhobhonse, bheenyu bhanú muroorokereribhwa na Omutima Omurabhu, mumukemere na mumuhindye kwa obhunyoohu. Nawe, mwiyangararire mutaaja okusakibhwa okubha na enteemo kya yaaye. 2 Mubhenga murabheerana emijigo emirito. Kwa okukora ego, nho, murakunaanʼya amaragiriryo ga Kiristu.a 3 Mbe, omuntu wowonse unú areerora ega, yaana obhwera okukira abharikyaye, enu ataana obhwera bhobhonse, uyo areengʼeena omwene! 4 Kira omuntu yeeyikomye enteemo yaaye omwene. Nyoore omuntu arakora amajomu, hayo aratura okwigungya eguru ya amajomu ganú omwene akoreri. Nawe, ateeringʼaanʼya na amangʼana ganú omuntu oundi akoreri, 5 kwa okubha kira omuntu arigega omujigo gwaye omwene.6 Omwihigira wa eringʼana rya Waryubha, abhenga aramugabhira-ko omwihigirya waaye, ebhintu ebhijomu bhinú aranyoora. 7 Muteengʼeena, Waryubha atakujabhurwa. Ekintu kinú omuntu arahamba, nkyo arigesa. 8 Mbe, omuntu unú aroorokereribhwa na orunamba orubhiibhi rwa omubhiri, arigesa engʼanga okurekana na orunamba ruyo. Nawe, unú aroorokereribhwa na Omutima Omurabhu, arigesa obhuhoru bhwa koko, okurwa ku Mutima Omurabhu. 9 Kwa ego, tutarosa okukora amajomu! Nyoore tureegumirirye kukukora amajomu, turinyoora omugeso omujomu hanú eribhaga rya okugesa ririhika. 10 Mbe, eribhaga ryoryonse hanú turanyoora omweya, tukorere abhantu bhonsego amajomu, nawe, ekinene kubheekirirya abharikyetu.
Amangʼana ga obhuteero
11 Mumaahe amangʼoore gaani ga eginyuguta eginene gayo, bhoono, ndaamba okubhangʼoorera kwa okubhoko kwani omwene. 12 Abhantu bhanú bharabhabhandirirya bheenyu musaarwe, bhareenda ego, naho bhasuukwe. Bhareenda bhatariija okunyankibhwa kurusumo rwa okuraarika eguru ya oruku rwa Kiristu kumusarabha. 13 Na kora bhanú bhaasaarwa, abheene bhonse bhatakugwata amaragiriryo gonsego. Nawe, bhareenda ega, bheenyu musaarwe, naho bheegungye eguru ya okusaarwa kwenyu.
14 Oni ntaana eringʼana ryoryonse rya okwigungirya, nawe, ndeegungya eguru ya oruku rwa Omukuru weetu Yeesu Kiristu kumusarabha. Okurekana na oruku rwaye, amangʼana gonsego ga ekyaro kinu, gataana obhwera kuoni. Obhuhoru bhwani bhwa akare, bhwakwa nawe kumusarabha. 15 Okusaarwa kasi okutiga okusaarwa, kutaana obhwera bhobhonse. Ekintu ekinene kya obhwera, nu-kukorwa na Waryubha okubha omuhya.b 16 Omurembe na ekyabhira bhinú bhirarwa ku Waryubha, bhibhe na abhantu bhonsego bhanú bharagwata obhuheene bhuyo, bhayo mbo abhantu bha Waryubha.c
17 Mbe, okurwa bhoonwego, omuntu wowonse atannyankya kweki, eguru ya eringʼana riyo, kwa okubha oni niina ebhimoa kumubhiri gwani, kurusumo rwa okumukorera emirimu Yeesu.
18 Abhahiiri bhaani kuimani, eriruguto rya Omukuru weetu Yeesu Kiristu, ribhe hamwi na bheenyu bhonsego. Amina.