4
Mbe, ndabhakeerya ega, wowonse unú aragabha ebhintu bhya esewaabho akyari omwana, arabha kya omugaya, onyoora ebhintu bhyonsego m-byaye. 2 Eribhaga riyo ryonsego oranyoora akyari omwana, oranyoora aringi insi ya abheemiririri na abhaangarariri, okuhikira kwibhaga rinú esewaabho yaaseemya ega, aratura okubhiimiririra. 3 Na bheetu bhonsego niigo ego. Hanú Kiristu yaaringa ataraaja, twaringa kya abhaana, twaringa abhagaya bha eginkoro egimbiibhi ginú giratunga ekyaro kinu.a 4 Nawe, eribhaga rinú ryaringa riseemiibhwe hanú ryahika, Waryubha akamutuma Omwana waaye mukyaro munu. Omwana uyo, yeebhurwa na omukari kya ego na bheetu tweebhurwa, akabha insi wa amaragiriryo. 5 Yaatumwa, naho atutungurye bheetu bhanú twaringa abhagaya insi wa amaragiriryo. Yaakora ego, naho bheetu bhonsego tubhe abhaana bha Waryubha.6 Na kwa okubha bheenyu mubheeri abhaana bha Waryubha, Waryubha yaatuma Omutima wa Omwana waaye, mumitima gyetu. Omutima uyo, ngʼo aratukora tumubhirikire Waryubha “Aba”, ensonga yaaye niiga, “Taata.” 7 Bhoono, bheenyu mutaringi abhagaya kweki, nawe, muringi abhaana bha Waryubha. Kwa ego, murihaanwa engabho ya obhuhoru bhwa koko, inú Waryubha yaabhiikira abhaana bhaaye.
Pauro arabhakemera Abhagaratia
8 Akare hayo, bheenyu mutaaringa mumumanyiri Waryubha. Eribhaga riyo, mwaringa abhagaya bha abhakuru bhanú bhataringi Waryubha. 9 Nawe bhoono, mumumanyiri Waryubha, na omwene wonse abhamanyiri bhukongʼu. Bhoono n-kwaki, kweki mureenda okusyengera eginkoro egimbiibhi ginú giratunga ekyaro kinu? Eginkoro giyo gitaana obhuturo kasi obhwera bhobhonse. Kasi kweki mureenda okubha abhagaya bhaagyo? 10 Kwaki mukyagwatanga eginyangi gyenyu gya Ekiyahudi? Murasuuka orusiku nyabhurebhe kubhutuuro, kumweri na kumwaka, ega, ni-ginyangi gya okumusuuka Waryubha. 11 Niina enkubhi eguru yeenyu ega, hamwi emirimu gyani gyonsego ginú naakora kubheenyu, gyahita bhusa. 12 Abhahiiri bhaani kuimani, ndabheesasaama mwiyagaare kya ego oni niyagaariri, kwa okubha oni n-kya bheenyu.
Hanú naaringa hamwi na bheenyu, mutaankorera obhubhiibhi bhobhonse. 13 Mumanyiri ega, obhurweri bhwani, mbo bhwakora nkanyoora omweya gwa okubharaarikira Amangʼana Amajomu, orwa mbere. 14 Onyoora obhurweri bhwani bhwabhareetera amasakyo, mutaanjeera kasi okunyanga. Nawe, mwanyikirirya kya maraika wa Waryubha, kasi kya Kiristu Yeesu. 15 Obhujomerwa bhwenyu bhunú mwaringa nabho kwibhaga rirya bhwagiiri-ha? M-maheene ega, kwibhaga rirya, mukaaturiri kora okwiha ameeso geenyu mungʼaane. 16 Bhoono, naabheeri omusigu weenyu kwa okubha ndabhakeerya obhuheene?
17 Abheehigirya bha obhubheehi bhayo, bhareegomba okubhanyankira, nawe, etaringi kwa obhujomu. Bhareenda okubhaahukanʼya na oni, naho bheenyu mwigombe okubhakorera emirimu bheeki. 18 M-bujomu okukora ekituunyo, nawe, ebhe kwa okukora amajomu. Mukorenga ego, eribhaga ryonsego, kora kwa eribhaga rinú ntaringi hamwi na bheenyu. 19 Abhaana bhaani abhahanje kuimani, rinu ni-ribhaga erindi kweki kuoni, okubheegwira obhururu, kya ego omukari wa enda, ararumwa obhusungu hanú areenda okwibhura. Oni ndeeyigwenga egoego, okuhikira hanú Kiristu arimaahikana gati yeenyu. 20 Ndeegomba nkaabheeri hamwi na bheenyu kwibhaga rinu, nkaahairi na bheenyu kwa obhunyoohu. Niina enkubhi eguru yeenyu!
Ekirengyo kya Hajiri na Saara
21 Munkeerye, bheenyu bhanú mureenda okubha abhagaya insi wa amaragiriryo ga Musa, bhoono, mumanyiri kya ego amaragiriryo garagamba? 22 Engʼoorerwe mu Mangʼoore Amarabhu ega, Abhurahamu yaaringa na abhaana bhabhiri. Oumwi yaamwibhura na Hajiri unú yaaringa omugaya waaye, na oundi yaamwibhura na omukari waaye Saara unú ataaringa omugaya. 23 Omwana waaye unú yeebhura na omugaya waaye, yaamwibhura kwa enjira ya omubhiri ogwenego. Nawe, omwana waaye unú yeebhura na omukari waaye Saara, weeki yeebhurwa kwa endago ya Waryubha. 24 Abhakari abhabhiri bhayo, bharatura okubha ekirengyo kya okwimiririra amaragano gabhiri. Hajiri areemiririra eriragano rya akare, rinú ryakorekera munkuku ya Sinai. Abhaana bhaaye, bheebhurwa kya abhagaya insi ya amaragiriryo. 25 Hajiri areemiririra enkuku ya Sinai mukyaro kya Arabhia, kweki areemiririra omugi gwa Yerusaremu ya bhoonwego, kwa okubha abhaana bhaaye bharingi mubhugaya bhwa amaragiriryo ganú bhaahaanwa munkuku ya Sinai. 26 Nawe, Saara areemiririra omugi gwa Yerusaremu ya murwire, inú iiyagaariri, iyo ngʼyo maayi. 27 Mu Mangʼoore Amarabhu, engʼoorerwe ega,
“Ojomerwe uuwe omugumba unú otakwibhura,
kuura kwa eriisi erinene kwa obhujomerwa, uuwe unú otaakeegwiri obhusungu,
kwa okubha abhaana bha unú yaatigwa na omusaaja m-baaru,
okukira abha unú yaana omusaaja.”b
28 Mbe bhoono, abhahiiri bhaani kuimani, bheenyu m-baana bha Waryubha okurekana na endago yaaye, kya ego Esaaka yaaringa. 29 Nawe, kuginsiku girya, omwana unú yeebhurwa kwa enjira ya omubhiri, yaamunyankya omwana unú yeebhurwa kwa enjira ya Omutima Omurabhu. Niigo ego na kuginsiku ginu, abhantu bhanú bharingi insi wa amaragiriryo, bharabhanyankya bheenyu bhanú mureeyagaara. 30 Nawe, Amangʼoore Amarabhu garagamba-ki? Garagamba ega, “Okenyie omukari omugaya unu, hamwi na omwana waaye, kwa okubha omwana wa omugaya unu, atakutura okugabha engabho hamwi na omwana wa omukari unú ataringi omugaya.”c 31 Kwa ego, abhahiiri bhaani kuimani, bheetu tutaringi abhaana bha omukari omugaya, turingi abhaana bha omukari omutetwa.