Obhurori bhwa Pauro na obhunyooheeru bhwaye
12
Ndeenderwa okwigungya, onyoora kutaana obhwera bhobhonse. Nawe, ndeenda okwigungya eguru ya obhurori na amangʼana agandi ganú Omukuru yanyorokerye. 2 Mmumanyiri omuntu oumwi Omukiristu,a unú emyaka ekumi na ena ginú gyahita, yaagegwa okugya murwire rwa eguru bhukongʼu.b Ntakumanya nyoore yaagegwa okugya eyo na omubhiri gwaye, kasi bira omubhiri gwaye. Waryubha omwene ngʼo amanyiri. 3 Kweki, oni ntamanyiri nyoore omuntu uyo yaagegwa na omubhiri gwaye, kasi nyoore ataaringa na omubhiri hanú yaagegwa. Waryubha ngʼo amanyiri. Nawe, kinú mmanyiri niiga, omuntu uyo, 4 yaagegwa okuhikira Paradiso.c Eyo akeegwa amangʼana ga okuruguurya bhukongʼu, ganú omuntu atakutura okugamba, kweki atakwenderwa agagambe. 5 Bhoono, ndeegungya eguru ya omuntu kya uyo, nawe, ntariigungya kya ego ndingi. Nawe, ndiigungya eguru ya obhunyooheeru bhwani obhwenego. 6 Kora nkaabheeri ndeenda okwigungya, ntakaabheeri omukangi, kwa okubha nkaabheeri ndagamba ga heene. Nawe, ndeeribhira okwigungya, naho omuntu wowonse atige okummaaha ega, oni ndeenderwa bhukongʼu okukira ganú bharamaaha na okugeegwa okurwa kuoni.7 Nawe, naanyoora enyanko enduru kumubhiri gwani, inú eringi kya amahwa. Omuchaama wa Erisambwa yaatumwa, naho yaannyankye, naho ntaaja okwigungya bhukongʼu, eguru ya amaaru ga okuruguurya ganú Omukuru yanyorokerye. 8 Naamwisasaama Omukuru mara kasatu yantuurye okurwa munyanko iyo. 9 Nawe, weeki akankeerya ega, “Eriruguto ryani rirakwisa, kwa okubha mubhunyooheeru mmo eginguru gyani giramaahikana.” Kwa ego, ndabhanga ndeegungya kwa obhujomerwa obhwaru eguru ya obhunyooheeru bhwani, naho eginguru gya Kiristu gibhe hamwi na oni. 10 Kwa ego, niina obhujomerwa eguru ya obhunyooheeru bhwani, kweki eguru ya okutukwa, etaabhu, enyanko, na amakongʼu eguru ya Kiristu. Niina obhujomerwa, kwa okubha hanú ndabha omunyooheeru, nho ndabha na eginguru.
Enkubhi ya Pauro eguru ya Abhakorinto
11 Ngambiri kya omukangi, kwa okubha bheenyu mbo mukoreri ngambe ego. Bheenyu mwaringa mureenderwa okungungya. Onyoora ndamaahikana ega, ntakwenderwa, oni ntaringi omutumwa omuke okukira bhanú muragamba ega, mbo abhatumwa abhakuru. 12 M-maheene ega, ganú garoorokya omuntu ega, oni m-mutumwa, gaakoreka kubheenyu. Naakora ebhimanyiiriryo, ebhiruguuryo na ebhika kwa obhwigumirirya obhunene. 13 Ritariho eringʼana ryoryonse rinú naakora mumakanisa agandi, rinú ntarakora kubheenyu. Ririho eringʼana rimwi ego, rinú ntaakora kubheenyu, ntaabha omujigo kubheenyu. Ndeegwa muragamba ega, riyo ndyo obhubhiibhi bhwani! Bhoono, heene mureenda mbasabhe munyabhire?
14 Bhoono, ndeeseemya okuuja kubheenyu rwa kasatu, nawe, ntaribha omujigo kubheenyu. Ndagamba ego, kwa okubha ntakwenda ebhintu bhyenyu, nawe, ndabheenda bheenyu. Ndagamba riyo, kwa okubha abhaana bhatakwenderwa okubhiika ebhintu kurusumo rwa abheebhuri bhaabho, nawe, abheebhuri mbo bhareenderwa okubhiika ebhintu, kurusumo rwa abhaana bhaabho. 15 Oni ndijomerwa okuruusya ebhintu bhyani, na okwiruusya oni omwene, naho mbabheere. Nawe, bhoono eramaahikana ega, hanú oni ndagendererya okubhahanja bhukongʼu, nho bheenyu murasuuhya obhuhanje bhwenyu kuoni.
16 Mureekirirya ega, ntaaringa omujigo kubheenyu, nawe, abhandi gati yeenyu bharagamba ega, oni m-mungʼeeni, mbanyooreri kwa okubhangʼeenererya. 17 Bhoono, naabharuusya kyokyonse okuhitira kubhantu bhanú naatuma kubheenyu? 18 Naamukomererya Tiito yaaje kubheenyu, hamwi na omuhiiri weetu oundi kuimani. Bhoono, Tiito yaabharuusya ekintu kyokyonse? Bhoono, mutakurora ega, oni na weeki n-kintu kimwi kumirimu? Na kweki ega, enteemo yeetu ngʼ-imwi?
19 Hamwi murakanya ega, eribhaga rinu ryonsego, twiyibhagiriiri. Nawe, tugambiri ganu, embere ya Waryubha, enu tugwateeni na Kiristu. Abhahanje bhaani, ganu gonsego turakora kurusumo rwa okubhabheera bheenyu, munage kuimani. 20 Ndoobhoha ega, eribhaga rinú ndiija kubheenyu, ndibhanyoora muuna eginteemo ginú gitakunjomera. Riyo ririkora nkore ganú gatakubhajomera bheenyu. Ndoobhoha ega, ndatura okubhanyoora muuna eritoongʼana, orwango, enkoro, eginhaka, obhugambani, obhubheehi, ameeheemo na eriihe. 21 Kweki ndoobhoha ega, hanú ndiija kubheenyu, Waryubha waani arikora ndore eginsoni embere yeenyu. Ndisurumbara okurora abhantu abhaaru gati yeenyu bhanú bhaakora obhusarya bhatareehunjura obhusarya bhwabho. Bhakyakoranga amangʼana ga obhusimbe, obhusuunu na amangʼana agandi ga eginsoni ganú bhaaringa nago.