2 Abhakorinto 11

Pauro na abhatumwa bha obhubheehi

Kora nyoore ndagamba kya omukangi, ndasabha munyitegeerere. Mbe, munyitegeerere! 2 Oni niina erihari na bheenyu, erihari rinú rirarwa ku Waryubha, kwa okubha muringi kya omuhara unú atamanyiri omusaaja, unú naamurombera obhuko na omusaaja oumwi, unú n-Kiristu. 3 Nawe bhoono, ndoobhoha ega, kya ego Haawa yaangʼeenwa na enjoka engʼeeni irya, na bheenyu mutakaaja okungʼeenwa, mutige okumuhanja Kiristu kwa obhuheene na kwa omutima omujomu. 4 Ndagamba ego, kwa okubha bheenyu m-bangu okuturuungʼana omuntu, unú araaja okuraarika amangʼana eguru ya Yeesu ganú bheetu tutaabharaarikira. Kweki, mureekirirya bhwangu omutima ogundi kasi amangʼana agandi, ganú bheetu tutaabharaarikira.

5 Oni ntakwirora ega, ndingi omutumwa omuke okukira bhanú muragamba ega, mbo abhatumwa abhakuru. 6 Onyoora ndamaahikana ega, ntakugamba bhujomu, nawe, niina obhumanyi. Eringʼana riyo turyorokerye harabhu kubheenyu, kira ahasi eribhaga ryonsego.

7 Bhoono, naakora obhusarya okwisuuhya, naho mbeenure kwa okubharaarikira Amangʼana Amajomu ga Waryubha, bira amariho? 8 Hanú naakoranga emirimu kubheenyu, naaringa ndanyoora obhubheeri okurwa mumakanisa agandi. N-kya muna naaringa ndabharuusya ebhintu bhyabho, naho mbabheere bheenyu bira bheenyu okuruusya ekintu kyenyu kyokyonse. 9 Hanú naaringa hamwi na bheenyu, ntaaringa omujigo kumuntu wowonse, kubhusuuhirwa bhwani. Ndagamba ego, kwa okubha abheekirirya bhanú bhaarwa mukyaro kya Makedonia bhaangʼaana bhinú naaringa ndasuuhirwa. Naaringa ndeeyangararira, naho ntabha omujigo kubheenyu kora ahake, kweki ndagendererya okwiyangararira. 10 Kya ego obhuheene bhwa Kiristu bhuringi munsi waani, atariho omuntu kora oumwi mukyaro kyenyu kya Akaya kyonsego, unú arindibha omunwa kukwigungya eguru ya amangʼana gayo. 11 Ntakugamba ego, kwa okubha ntabhahanjiri. Waryubha amanyiri ega, mbahanjiri.

12 Nawe, rinú ndakora ndagendererya okurikora, naho ntabhahaana omweya bhayo bharagamba ega, mbo abhatumwa abhakuru, bhatige okwigungya ega, bharakora emirimu kya bheetu. 13 Abhantu kya bhayo m-batumwa bha obhubheehi, bharakora emirimu kwa okungʼeena abhantu, bhareekorya ega, m-batumwa bha Kiristu. 14 Eringʼana riyo ritaringi rya okuruguurya, kwa okubha Erisambwa ryonse, rireehunjura na okubha kya maraika wa obhurabhu. 15 Kwa ego, ritaringi eringʼana rya okuruguurya, hanú abhakori bha emirimu bhaaryo bhonse, bhareekorya kya abhakori bha emirimu bha heene. Nawe, kubhuteero bhwabho, bheeki bharinyoora ganú gararingʼaana na amakorwa gaabho.

Pauro areegungya eguru ya eginyanko gyaye

16 Kweki ndabhakeerya ega, omuntu wowonse ateeganirirya ega, oni m-mukangi! Nawe, kora nyoore muramanya ega, oni m-mukangi, ndabhasabha munyitegeerere na obhukangi bhwani bhunu, naho oni nonse nigungye nyakara hakego. 17 Amangʼana ga okwigungya ganú ndagamba bhoonwego, gataarwa ku Mukuru, nawe, ndagamba kya omuntu omukangi. 18 Abhaaru bhareegungya kurusumo rwa amangʼana ga mukyaro kinu, kwa ego mbe, na oni nonse tiga nigungye. 19 Mbe, tiga nigungye, kwa okubha bheenyu muuna obhungʼeeni, na mureegumirirya abhakangi kwa obhujomerwa. 20 Mureegumirirya kora omuntu unú arabhatuura mubhugaya, unú arabheebhira na okubharuusya ebhintu bhyenyu, kweki unú areerora ega, m-munene okukira bheenyu na omuntu unú arabhatema mubhusu. 21 Bheetu tutaabhakorera amangʼana gayo, kwa okubha bheetu m-banyoohu bhukongʼu. Kuriyo, tutakurora eginsoni kwa okwanga okubha kya abhantu abharuru!

Bhoono ndagamba kya omukangi ega, nyoore ariho omuntu wowonse unú arasakya okwigungya eguru ya eringʼana ryoryonse, na oni nonse ndasakya okwigungirya eringʼana riyo. 22 Nyoore bheeki m-Baebhurania, na oni nonse m-Mwibhurania. Nyoore bheeki m-Baisiraeri, na oni nonse m-Mwisiraeri. Nyoore bheeki m-bahiiri Abhurahamu, na oni nonse m-muhiiri Abhurahamu. 23 Bhoono tiga ngambe muna ndangeeni, ega, nyoore bheeki m-bakori bha emirimu bha Kiristu, oni m-mukori wa emirimu wa Kiristu okubhakira bheeki. Naakora emirimu emikongʼu bhukongʼu, naabhohwa mara kaaru mwigereja, naatemwa bhukongʼu na mara kaaru naaringa mungʼanga ya oruku. 24 Abhayahudi bhaantandika ebhibhoko mirongo esatu na kenda (39), mara kataanu. 25 Abharuumi bhaantema egingʼimbo, mara kasatu, naatemwa na amagina rumwigo, eryato ryansarikira mara kasatu munyanja, eribhaga erindi neekara munyanja, obhutiku na omubhasu. 26 Mara kaaru kurugendo rwani, naaringa mungʼanga ya okungʼuurwa na eginyuji, mungʼanga ya okutumbarirwa, mungʼanga ya okurwa ku Bhayahudi abharikyani na kubhanú bhataringi Abhayahudi. Naaringa mungʼanga mumigi, mwisisi, na munyanja. Naaringa mungʼanga ya okunyankibhwa na bhanú bhareekorya ega, m-beekirirya abharikyetu. 27 Naakora emirimu emikongʼu na okunyanka, mara kaaru naaringa ndabhurwa omweya gwa okuraara, naaringa na omweko na enyonta. Na mara kaaru naabhurwanga ebhyakurya, na okwikara mumbeho bira emyenda gya okwisa okungʼaana eribhiriira. 28 Hamwi na gayo gonsego, kira orusiku ndeeganirirya eguru ya emirimu ginú ndeenderwa okukora kurusumo rwa amakanisa gonsego. 29 Nyoore oumwi m-munyooheeru, na oni nonse ndeeyigwa m-munyooheeru. Nyoore oumwi bhamuhabhirye, ajeeme na okukora obhusarya, na oni nonse ndabhihirirwa.

30 Nyoore ndeenderwa okwigungya, ndeegungirye amangʼana ga obhunyooheeru bhwani. 31 Waryubha, Taata wa Omukuru Yeesu, unú areenderwa okugungibhwa koko na koko, amanyiri ega, ntakugamba obhubheehi. 32 Hanú naaringa mumugi gwa Damasikasi, omutungi wa omugi guyo unú yaaringa insi ya omukama Areta, yaaringa ateeri abhaangarariri mumugi guyo, naho bhangwate. 33 Nawe, abhantu nyabhurebhe bhakantuura mugukapo gunú gwaringa gubhoherwe kwa egingoye. Kimwi bhakanyituumirya mugukapo muyo okuhitira mukisyeri kya orugito runú rwaringa rwinaariri omugi guyo, nkahona okugwatwa.