Pauro arabhakyukya bhanú bharamujeera
10
Mbe, abhandi bharagamba ega, oni m-munyoohu hanú ndingi hamwi na bheenyu, na ega, m-mururu hanú ndingi ahare na bheenyu. Nawe, oni omwene Pauro, ndabhakomererya kwa obhwisuuhya na obhunyoohu bhwa Kiristu. 2 Ndabhasabha ega, hanú ndibha niijiri kubheenyu, mutankora okubha omururu. Ndagamba ego, kwa okubha mmanyiri ega, ndatura okubha omururu kubhantu bhonsego bhanú bhareeganirirya ega, bheetu tureekara kya abhantu abhandi mukyaro kinu. 3 Onyoora tureekara mukyaro munu, tutakurwana eriihe kya abhantu bha mukyaro kinu. 4 Ebhigwato bhya eriihe ryetu bhitaringi bhya mukyaro kinu, nawe, bhiina eginguru okurwa ku Waryubha gya okugwisya eginkambi gya abhasigu bheetu. 5 Na turasarya amangʼana gonsego ga obhubheehi, na amangʼana ga okwigungya ganú gararibhira abhantu bhatamumanya Waryubha. Kweki turahunjura ameetegeerero gonsego ga abhantu, naho gamwigwe Kiristu. 6 Na hanú muribha muramwigwa kimwi, bheetu turibha tumariri okwiseemya okujibhya amangʼana gonsego ganú gataringi ga obhwigwa.7 Bheenyu muramaaha kya ego ebhintu bhiramaahikana kwa kibhara ego. Omuntu wowonse unú areerora ega, weeki ngʼ-wa Kiristu, amanye ega, na bheetu turingi abhantu bha Kiristu, kya weeki. 8 Ntakurora eginsoni kora nkeegungya bhukongʼu eguru ya obhutungi bhunú Omukuru atuheeri, kwa okubha obhutungi bhuyo bhutakubhasarya, nawe, bhurabhakora munage kuimani. 9 Ntakwenda mmaahikane kubheenyu ega, ndeenda okubhakangirirya kuginyarubha ginú ndabhangʼoorera. 10 Ndagamba ego, kwa okubha abhandi bharagamba ega, “Eginyarubha gya Pauro giina amangʼana amahaari, kweki giina amangʼana amakongʼu. Nawe, hanú aringi hamwi na bheetu arabha ataana eginguru, kweki amangʼana gaaye garabha gataana ensonga.” 11 Omuntu unú aragamba amangʼana gayo, amanye ega, amangʼana ganú turabhangʼoorera hanú turingi ahare, ngo gayogayo turikora hanú turibha hamwi na bheenyu.
12 Bheetu tutakusakya okwibhara kora na okwiringʼaanʼya na abhantu bhanú bhareekomba abheene. Bheeki m-bakangi, bhareerenga abheene kwa abheene na okwiringʼaanʼya abheene kwa abheene. 13 Nawe, bheetu tutariigungya okukira endengo. Okwigungya kwetu kuritama kundengo ya emirimu ginú Waryubha yaatuhaana. Emirimu giyo, ngyo turakora kora kubheenyu. 14 Okwigungya kwetu kutaaringa kuraambuka endengo, kya ego ekaabheeri nyoore tutaakaajiri kubheenyu. Nawe, bheetu mbo twabha abha mbere okubhareetera Amangʼana Amajomu eguru ya Kiristu. 15 Kweki tutakwigungya eguru ya emirimu gya abhantu abhandi, emirimu ginú bheetu tutaahaanwa. Nawe, tureesigira ega, kya ego eimani yeenyu eragendererya okwaruha, niigo emirimu gyetu gatigati yeenyu girabha giraaruha. 16 Hayo nho, turitura okuraarika Amangʼana Amajomu mubhyaro ebhindi bhinú amangʼana gayo gataakaraarikirwe. Na tutariigungya eguru ya emirimu ginú abhantu abhandi bhaakora ahasi nyabhurebhe. 17 Amangʼoore Amarabhu garagamba ega, “Omuntu wowonse unú areegungya, yeegungye kurusumo rwa Omukuru.”a 18 Kwa ego, omuntu wowonse unú areegungya omwene atakwikiriribhwa, nawe, unú aragungibhwa na Omukuru, ngʼo areekiriribhwa.