Obhubheeri kubheekirirya bha Yerusaremu
9
Ntakwenderwa mbangʼoorere mara kaaru eguru ya okubhabheera abheekirirya bha Yerusaremu, 2 kwa okubha mmanyiri ega, muuna omutima gwa okubhabheera abhandi. Kweki, oni ndeegungya eguru yeenyu kubhantu bha Makedonia, ndabhakeerya ega, bheenyu abhantu bha erikanisa rya mukyaro kya Akaya, mweeseemya okuruusya okurwa omwaka guyo gwahita. Ekituunyo kyenyu kiyo, kyabhakora abhaaru gati yaabho, okubha na omutima gwa okuruusya. 3 Mbe, ndabhatuma abhahiiri bheetu bhanu, naho muture okoorokya ega, heene mweeseemya, kya ego naabhakeerya abhantu bha Makedonia. Ntakwenda ega, amangʼana ganú neegungya kurusumo rwenyu, gamaahikane ega, gataana obhwera. 4 Ndabhakomererya ego, kwa okubha nkaaja eyo na Abhamakedonia, tunyoore ega, mutareeseemya, hayo orinyoora mutusuukirye eguru ya obhwisige bhwetu kubheenyu. Kora na bheenyu bhonse muribha musuukiri muriiri ebhiraasi. 5 Kwa ego, nduuji ega, m-bujomu mbakomererye abhahiiri bheetu bhanu, bhatukangatire okuuja eyo, naho bhaseemye ebhintu bhinú mwaraga. Kwa enjira iyo muribha muruusirye kwa okwiyigwa, etaringi kwa okubhandiriribhwa.Okuruusya kwa omutima gwa obhujomerwa
6 Ndabhahiitukya eringʼana rinu ega, “Omuntu unú arahamba ebhike, aragesa ebhike, na unú arahamba ebhyaru, aragesa ebhyaru.” 7 Kira omuntu aruusye okuringʼaana na kya ego areeyigwa mumutima gwaye. Ataruusya kwa okusurumbara kasi kwa okubhandiriribhwa, kwa okubha Waryubha amuhanjiri omuntu unú araruusya kwa omutima gumwi. 8 Waryubha aratura okubhanonka okukira kya ego mureenda, naho eribhaga ryonsego mubhe na ebhintu bhyonsego bhinú mureenda, naho mubhe abhantu bha okukora amajomu amaaru ga okubheera abhandi. 9 N-kya ego yaangʼoorwa mu Mangʼoore Amarabhu ega,
“Aruusirye kwa omutima gumwi, okuhaana abhatobhu,
obhuheene bhwaye, m-bwa koko.”a
10 Waryubha ngʼo arahaana omuntu egimbusuro gya okuhamba na ebhyakurya. Egoego aribhahaana bheenyu egimbusuro gya okuhamba na okugyongerya. Niiga, aribhahaana na okubhoongerya omutima gwa obhuserenʼya. 11 Aribhanga arabhahaana obhuniibhi kugonsego, naho mubhe abhaserenʼya eginsiku gyonsego. Hayo nho, abhantu bharibhanga bharamukumya Waryubha kurusumo rwa ebhintu bhinú turabhahirira okurwa kubheenyu. 12 Eribha ego, kwa okubha emirimu ginú murakora, gitakubheera abheekirirya bha Yerusaremu bhanú bharasuuhirwa abheenego, nawe girakora abhantu abhaaru, bhamukumye Waryubha bhukongʼu. 13 Bharimugungya Waryubha, kwa okubha emirimu gyenyu, giroorokya ega, bheenyu m-bakori bha emirimu abhajomu. Kweki bharimugungya kurusumo rwa obhwigwa bhwenyu obhwa okwikirirya Amangʼana Amajomu eguru ya Kiristu embere ya abhantu, na kurusumo rwa obhuserenʼya bhwenyu bhwa okubhabheera bheeki na abhandi bhonsego. 14 Na bharibhasabhira ku Waryubha kwa obhuhanje, okurekana na eriruguto eryaru rinú Waryubha abhaheeri bheenyu. 15 Tubhenga turamukumya Waryubha kwa ekibharo kyaye, kinú tutakutura okukigungya okurekana na obhukuru bhwakyo!