Omutima gwa okubheera abhandi
8
Bhoono, abhahiiri bheetu kuimani, tureenda tubhakeerye kya ego eriruguto rya Waryubha ryakora emirimu kubhantu bha amakanisa ga mukyaro kya Makedonia.a 2 Abhantu bhayo m-batobhu bhukongʼu, kweki bhaanyoora amasakyo amaaru, na eginyanko, nawe, bhaaringa na obhujomerwa obhwaru, bhunú bhwabhakora bhakabha abhaserenʼya bhukongʼu bha okuruusya ebhintu bhyabho. 3 Ndabheemiririra ega, bhaaruusya ebhintu ebhyaru, kora okukira obhuturo bhwabho. Na bhaaruusya kwa obhwendi bhwabho abheene. 4 Bhaatukomereryanga ega, bhonse bhanyoore omweya gwa okugwatana kumirimu giyo gya okubheera abheekirirya bha Yerusaremu.b 5 Bhaakora ego, okukira kya ego twaringa turakanya ega, bharikora. Bheeruusya ku Mukuru mbere, bhakamara bhakeeruusya na kubheetu bhonse, okurekana na obhwendi bhwa Waryubha. 6 Kwa ego, tukamukomererya Tiito ega, yaaje abhabheere bheenyu okumara emirimu gya eriruguto giyo, kwa okubha ngʼo yaagyambisya kubheenyu. 7 Mbe, muringi na obhwaru bhwa ebhintu bhyonsego. Muuna eimani, obhuturo bhwa okugamba bhujomu, obhumanyi, ekituunyo kya amajomu gonsego na obhuhanje bhwenyu kubheetu.c Egoego mubhe na obhwaru bhwa ekibharo kya okuruusya.8 Ntakugamba gayo, naho mbabhandirirye, nawe, ndeenda okurora nyoore obhuhanje bhwenyu m-bwa maheene, kwa okubhoorokya kya ego abhantu abhandi bhaaruusya kwa ekituunyo. 9 Bheenyu mumanyiri eriruguto rya Omukuru weetu Yeesu Kiristu ega, yeekora omutobhu kurusumo rwenyu, onyoora yaaringa omuniibhi, naho okuhitira kubhutobhu bhwaye, bheenyu mubhe abhaniibhi. 10 Bhoono, eguru ya omusororyo guyo ndabhatongera rinú rireenderwa kubheenyu. Omwaka gunú gwahwerid mwabha abha mbere okoorokya enamba ya okusororya, na abha mbere okusororya. 11 Bhoono, mukunaanʼye ganú mwambisya kya ego mwaringa mwigomberi, mukore ekituunyo kya okuruusya ebhintu okuringʼaana na obhuturo bhwenyu. 12 Nyoore omuntu yaana omutima gwa okuruusya, Waryubha areekirirya kyokyonse kinú araruusya okuringʼaana na kinú yaanakyo. Waryubha atakutonga omuntu kinú ataanakyo. 13 Ntakugamba ego, naho abhandi bhanyoore obhujomerwa, bheenyu munyoore enyanko, tiigo-ha! 14 Kinú ndeenda niiga, bhonsego muringʼaane. Eribhaga rinu bheenyu muuna ebhintu ebhyaru, kwa ego mubhabheere-ko bhanú bhataanabhyo, naho bhonse hanú orinyoora bhanyooreri ebhintu ebhyaru, bhariija okubhahaana-ko na bheenyu bhonse hanú orinyoora musuuhiirwe. Kwa okukora ego, murabha muringʼeeni, 15 kya ego yaangʼoorwa mu Mangʼoore Amarabhu ega, “Unú yaakumanʼya ebhyaru, ataabha na ebhya okutama, na unú yaakumanʼya ebhike, ataasuuhirwa.”e
Tiito na abharikyaye bharatumwa Korinto
16 Ndamukumya Waryubha unú amuheeri Tiito omutima gunú oni niinago ogwa okubhabheera bheenyu. 17 Ndagamba ego, kwa okubha hanú twamusabha yaaje kubheenyu eyo, akeekirirya. Kweki omwene areegomba bhukongʼu, okuuja eyo okubhabheera. 18 Hamwi na weeki turamutuma na omuhiiri weetu oundi kuimani, unú eginkuma gyaye ku Mangʼana Amajomu ga Waryubha, ginyarageeni mumakanisa gonsego. 19 Kweki ritaringi riyo eryenego eguru yaaye, weeki yaasorwa na amakanisa agyenga hamwi na bheetu hanú turahira omusororyo kubheekirirya bha Yerusaremu. Emirimu gya eriruguto giyo, girakora Omukuru agungibhwe, kweki giroorokya kya ego tuuna omutima gwa okubheera abhandi.
20 Tutakwenda amasoro okurwa kumuntu wowonse, eguru ya obhwimiririri bhwetu bhwa okuhira ebhintu bhinú abhantu bharuusirye, kwa obhuserenʼya bhwabho. 21 Ensonga yeetu, etaringi okukora amajomu embere ya Omukuru omwenego, nawe, ensonga yeetu nu-kukora amajomu na kubhantu.
22 Turamutuma omuhiiri weetu kuimani oundi, abhe hamwi na bha Tiito. Omuhiiri weetu uyo, yeeyorokerye kubheetu mara kaaru kwa eginjira hagari hagari ega, yaana enamba okukora emirimu, na bhoono yaana enamba bhukongʼu okukira obhwa mbere, kwa okubha arabheesigira bheenyu bhukongʼu. 23 Bhoono, nyoore omuntu areenda okumanya amangʼana eguru ya Tiito, weeki m-mukori wa emirimu hamwi na oni kwa enjira ya okubhabheera bheenyu. Na nyoore omuntu areenda okumanya eguru ya abhandi bhanú bharaaja hamwi nawe, bhayo m-bahiiri bheetu kuimani, bhatumirwe na amakanisa, bhonse bharamugungya Kiristu. 24 Kwa ego, mubhoorokye obhuhanje bhwenyu, naho amakanisa bhamanye ega, tuuna ekisigo kya okwigungya kurusumo rwenyu.