Obhukemeri bhwa obhuteero
13
Inu eraabhe mara yaani ya kasatu okuuja kubheenyu. Amangʼoore Amarabhu garagamba ega, “Kira ekiina kibhuturwe kwa obhwimiririri bhwa abhantu bhabhiri kasi bhasatu.”a 2 Hanú naaja kubheenyu orwa kabhiri, naabhakeerya bhanú bhaakora obhusarya ega, hanú ndiija kubheenyu kweki, ntaribhaabhira bheeki. Bhoono, ndabhakeerya riyo kweki ega, ntaribhaabhira abhantu bhayo na abhandi bhonsego bhanú bharakora obhusarya. 3 Ndikora riyo, kwa okubha mureenda ekimanyiiriryo kya okumanya ega, Kiristu aragamba okuhitira kuoni. Kiristu ataringi omunyooheeru kubheenyu, nawe yaana eginguru gya okukora emirimu gati weenyu. 4 Ndagamba ego, kwa okubha Kiristu yaabhambwa kumusarabha kwa obhunyooheeru bhwaye, nawe, bhoono m-muhoru kwa eginguru gya Waryubha. Egoego, bheetu bhonse turingi abhanyooheeru, kya ego Kiristu yaaringa omunyooheeru, nawe, kwa okubhakorera emirimu bheenyu, bheetu turibha abhahoru hamwi na weeki kwa eginguru gya Waryubha.5 Bhoono, mwirenge bheenyu abheene, naho mumanye ega, muuna eimani. Mwiyikomye bheenyu abheene. Mutamanyiri ega, Yeesu Kiristu aringi munsi weenyu? Nyoore mutamanyiri, hayo murabha mutamirwe okuhikira endengo. 6 Nawe, ndeesiga ega, bheenyu mumanyiri ega, bheetu tutaatamwa okoorokya obhutungi bhwetu. 7 Turamusabha Waryubha ega, mutakora eringʼana ryoryonse eribhiibhi. Etaringi ega, bheetu tureenda tumaahikane ega, tuhikiiri endengo iyo. Nawe, kinú tureenda niiga, mukore amangʼana amajomu, kora nyoore bheetu turamaahikana ega, tutamirwe okoorokya obhutungi bhwetu. 8 Ndagamba ego, kwa okubha tutaana eginguru gya okuribhira obhuheene, nawe, tuuna eginguru gya okubhwibhagirira egyenego. 9 Turajomerwa, kwa okubha bheetu turingi abhanyooheeru, nawe, bheenyu muuna eginguru. Turamusabha Waryubha abhabheere mubhe mukuneeni kunteemo yeenyu. 10 Ndabhangʼoorera amangʼana ganu eribhaga nkyari okuuja kubheenyu, naho hanú ndibha kubheenyu, ntariija okubha omururu eguru ya obhutungi bhunú Omukuru yangʼeeri. Ndagamba ego, kwa okubha Omukuru ataangʼaana obhutungi bhwa okubhasarya, nawe, bhwa okubhabheera munage kuimani.
Okukeeranʼya kwa okuraga
11 Bhoono, abhahiiri bhaani kuimani, turimaahana!b Mubhe mukuneeni kunteemo yeenyu, muhorisanʼye, mubhe na obhumwi, mubhe na omurembe. Na Waryubha wa obhuhanje na omurembe aribha hamwi na bheenyu. 12 Mukeeranʼyenga kwa obhuhanje bhwa Ekikiristu. Abheekirirya bhonsego bhanú bharingi hanu bharabhakeeranʼya. 13 Eriruguto rya Omukuru Yeesu Kiristu, na obhuhanje bhwa Waryubha, na obhugwatani bhwa Omutima Omurabhu, bhibhe hamwi na bheenyu bhonsego.