5
Emibhiri gyetu n-kya amabhuru mukyaro munu. Nawe, tumanyiri ega, hanú garihaanyuka, Waryubha arituhaana eginyumba murwire, gya koko, ginú gitakuhagaajwa kwa amabhoko ga abhantu. 2 Kumibhiri gyetu gya bhoonwego turanyahaarika enu tureegomba bhukongʼu okuhaanwa eginyumba eginhya, na okwibhohibhwa emibhiri gyetu emihya ginú giringi murwire. 3 Hanú turiibhohibhwa emibhiri emihya, tutaribha kinaabhi. 4 Kwa ego niiga, eribhaga rinú tukyari na amabhuru geetu, turanyahaarika mumitima gyetu, kwa okubha amangʼana amaaru garaturitohera. Etaringi ega, bhoono tureenda okuruusibhwa emibhiri ginú girakwa, nawe, kinú tureenda n-kwibhohibhwa emibhiri ginú gitakukwa, naho emibhiri ginú girakwa gimirwe na ginú gitakukwa. 5 Waryubha ngʼo yaatuseemya kurusumo rwa amangʼana gayo, na atuheeri Omutima waaye, naho abhe obhutungurya bhwa amangʼana gayo.6 Kwa ego, eribhaga ryonsego tuuna obhwisige, onyoora tumanyiri ega, hanú tuuna emibhiri ginu, turingi ahare na Omukuru. 7 Tureekara okurekana na eimani, etaringi kwa enjira ya bhinú bhiramaahikana. 8 Maheene tuuna obhwisige, kweki turamaaha nyakara tukaagitigiri emibhiri ginu, na okugya okwikara na Omukuru. 9 Mbe, tubhe mumibhiri munu, kasi tutige okubha-mo, ensonga yeetu nu-kumukora ajomerwe. 10 Niigo, kwa okubha bheetu bhonsego turiimirira embere ya ekitumbi kya Kiristu, ekya okubhuturira ekiina, naho kira oumwi ahaanwe amariho okuringʼaana na ganú yaakora kwa omubhiri gunu, gabhe amajomu kasi gabhe amabhiibhi.
Emirimu gya okwigwanʼya
11 Mbe, tumanyiri ega, tureenderwa okumusuuka Omukuru. Kwa ego, turakora ekituunyo okuruta abhantu abhandi, naho bhamwikirirye. Waryubha atumanyiri bhujomu kya ego turingi, na oni ndeesiga ega, na bheenyu mutumanyiri bhujomu mumeetegeerero geenyu. 12 Tutakwenda okwikomba kweki kubheenyu, nawe, tureenda okubhahaana omweya gwa okwigungya kurusumo rwetu. Okurekana na riyo, muribha na amangʼana ga okubhakyukya bhanú bhareegungya embere ya abhantu kwa amangʼana ga kibhara, kora bhatakwigungya kwa amangʼana ga mumitima gyabho. 13 Nyoore turamaahikana ega, twadangana, turingi ego, kurusumo rwa Waryubha, nawe, nyoore turamaahikana ega, tuuna obhungʼeeni, riyo n-kurusumo rwa obhwera bhwenyu. 14 Obhuhanje bhwa Kiristu bhuratoorokererya bheetu, kwa okubha tumanyiri ega, oumwi yaakwa kurusumo rwa abhantu bhonsego, ensonga yaaye niiga, abhantu bhonsego bhaakwa. 15 Wonse yaakwa kurusumo rwa bhonsego, naho bhanú bharingi abhahoru bhatabha abhahoru kweki kurusumo rwa omweya gwabho abheene, nawe, kurusumo rwa unú yaakwa na okuhyuka kurusumo rwabho.
16 Kwa ego, okwambira bhoono, tutakumumaaha omuntu wowonse kya ego abhantu bhanú bhatakumwikirirya Kiristu, bharamumaaha. Onyoora eribhaga nyabhurebhe twamumaaha Kiristu kya ego abhantu bhanú bhatakumwikirirya bharamumaaha. Nawe, bhoono tutakukora ego kweki. 17 Omuntu wowonse unú araagwatane na Kiristu, arabha omuntu omuhya,a aga akare gahitiri, bhoono gabheeri amahya! 18 Nawe, gayo gonsego gararwa ku Waryubha unú yaamutuma Kiristu atwigwanʼye bheetu na weeki.b Na bheetu atuheeri emirimu gya okubhoorokya abhantu enjira ya okwigwanibhwa na Waryubha. 19 Nko okugamba ega, okuhitira ku Kiristu, Waryubha yaaringa areegwanʼya abhantu mukyaro kyonsego na weeki, bira okubhabharira obhusarya bhwabho. Na bheetu atuheeri emirimu gya okubharaarikira abhantu amangʼana ga okwigwanibhwa na Waryubha.
20 Mbe, Kiristu atutumiri okukora emirimu gyaye, na okuhitira kubheetu, Waryubha arabhakomererya ega, mwigwanibhwe na weeki. Nkyo kirakora turasabha ku Kiristu ega, mwigwanibhwe na Waryubha. 21 Kiristu ataaringa na obhusarya, nawe, Waryubha yaamubharira obhusarya bhwetu bhonsego, naho bheetu tubharwe okubha abhaheene embere ya Waryubha okuhitira kuweeki.