6
Bhoono, kwa okubha turakora emirimu hamwi na Waryubha, turabhakomererya ega, eriruguto rya Waryubha rinú munyooreri, mutaritiga ribhure bhusa. 2 Ndabhakeerya ego, kwa okubha Waryubha aragamba mu Mangʼoore Amarabhu ega,“Eribhaga rinú ryeenderwanga, naakwigwa,
orusiku rwa obhutuurya, naakubheera.”a
Itegeerera, eribhaga rinú rireenderwa n-dinu, orusiku rwa obhutuurya n-dunu!
Okwigumirirya kumirimu gya Waryubha
3 Tutakumukorera omuntu wowonse, eringʼana ryoryonse rinú riraakore abhihirwe, naho obhukori bhwa emirimu bhwetu bhutagambwa bhubhiibhi. 4 Nawe, turoorokya kumangʼana gonsego ega, turingi abhakori bha emirimu bha Waryubha, kwa okubha tureegumirirya bhukongʼu eginyanko, egitaabhu na egintambara. 5 Eribhaga erindi turatemwa, turabhohwa mwigereja, turajiiririrwa na emiganda gya abhantu, turakora emirimu emikongʼu, turabhurwa omweya gwa okuraara na turabhurwa ebhyakurya. 6 Kweki turoorokya ega, bheetu m-bakori bha emirimu bha Waryubha kwa omutima omujomu, kwa obhumanyi, kwa obhwigumirirya, kwa obhuserenʼya, kwa enjira ya okoorokereribhwa na Omutima Omurabhu, kwa obhuhanje bhunú bhutaana orwambe, 7 kweki kwa enjira ya okuraarika amangʼana ga obhuheene. Turakora gayo gonsego, kwa eginguru gya Waryubha. Obhuheene mbo ekirwaniro kyetu, orubhaara rwa obhuryo na orwa obhumosi.b 8 Bheetu twiruusirye, abhantu bhatusuuke kasi bhatujeere, bhatugungye kasi bhatugambe bhubhiibhi. Turamaahikana ega, turingi abhabheehi, nawe, turagamba aga maheene. 9 Turamaahikana ega, tutamanyikeeni, bhoono mbe, tumanyikeeni bhujomu. Turamaahikana ega, turakwa, bhoono mbe, turingi abhahoru. Tutemerwe bhukongʼu, nawe, tutareetwa. 10 Kweki turamaahikana ega, tusurumbeeri, nawe, eribhaga ryonsego tuuna obhujomerwa. Turamaahikana ega, turingi abhatobhu, nawe, abhaaru tubhaniibhirye. Turamaahikana ega, tutaana ekintu kyokyonse, nawe, tuuna ebhintu bhyonsego.
11 Bheenyu Abhakorinto, twahaiiri na bheenyu kubhurabhu, kweki kwa obhuhanje obhwaru. 12 Bheetu tutaratiga okubhahanja bheenyu, nawe, bheenyu mbo mwatigiri okutuhanja bheetu. 13 Bhoono, ndagamba na bheenyu muna ega, ndagamba na abhaana ega, mubhe na obhuhanje obhwaru kubheetu, kya bhunú bheetu tuunabho kubheenyu.
Obhugwatani na abhantu bhanú bhataringi abheekirirya
14 Mutagwatana na abhantu bhanú bhataringi abheekirirya. Bhoono, obhuheene na obhusarya bhiratura okubha hamwi kwa egaki? Kasi obhurabhu na ekisunte bhiratura okubha hamwi? 15 Kweki m-bwigwirani-ki bhuriho gati ya Kiristu na Erisambwa?c Kasi m-bugwatani-ki bhuriho gati ya omwikirirya na unú ataringi omwikirirya? 16 M-meekiriranʼyo-ki gariho gati ya erisyengerero rya Waryubha na ebhisusano? Bheetu ni-risyengerero rya Waryubha omuhoru!d N-kya ego Waryubha omwene yaagamba ega,
“Ndiikara gati yaabho na okugenda hamwi nabho.
Ndibha Waryubha waabho, bhonse bharibha abhantu bhaani.”e
17 Kwa ego, Omukuru yaagamba kweki ega,
“Murwe gatigati waabho, mwiyahure nabho.
Mutakuunʼya ekintu ekikonu,
na oni, nho, ndibhaturuungʼana.f
18 Ndibha Eseweenyu,
na bheenyu muribha abhaana bhaani bha ekimura na abha ekihara.
Omukuru Waryubha wa obhuturo bhonsego, aragamba!”g