Eginguru gya Waryubha kubhintu bhya obhutoto
4
Mbe, kwa okubha Waryubha atuheeri emirimu ginu kwa ekyabhira kyaye, tutakukwa omutima. 2 Bheetu twangiri, tutakukora amangʼana ga ekinyerera na aga eginsoni. Tutakungʼeena abhantu, kora okusanganʼya eringʼana rya Waryubha na obhubheehi. Nawe, tureekomba kwa okugamba obhuheene kubhurabhu, naho abhantu bhonsego bhamanye mumeetegeerero gaabho ega, turingi abhaheene embere ya Waryubha. 3 Nawe, nyoore Amangʼana Amajomu ganú turaraarika, garibhiirwe gatamanyikana, garabha garibhiirwe kubhanú bharabhura. 4 Abhantu bhayo bhatakumwikirirya Yeesu, kwa okubha Erisambwa, rinú riratunga ekyaro kinu, rikundikiirye obhungʼeeni bhwabho. Kiyo nkyo kirakora bhatamwe okurora endingaasi ya Amangʼana Amajomu ga obhukuru bhwa Kiristu. Kiristu ngʼo ekirengekanʼyo kya Waryubha. 5 Bheetu tutakuraarika amangʼana eguru yeetu abheene, nawe, turaraarika ega, Kiristu Yeesu ngʼo Omukuru, na kweki turaraarika ega, bheetu turingi abhagaya bheenyu kwa enjira ya okumukorera emirimu Yeesu. 6 Waryubha yaagamba ega, “Obhurabhu bhumirike mukisunte.”a Na weeki ngʼo yaamirika emitima gyetu, na okutukora tumanye obhukuru bhwaye, bhunú bhurangʼesangʼesa mubhusu bhwa Yeesu Kiristu.7 Mbe, tuheerwe ekibhumbiko kiyo, bheetu bhanú turingi kya eginsengo gya obhutoto. Nawe, emanyikane ega, eginguru eginjaru gya okuruguurya, egya okukora emirimu giyo, gitaringi gyetu, girarwa ku Waryubha. 8 Turanyoora eginyanko amanga amaaru, nawe, tutakuhigwa. Kora hanú oranyoora tutamanyiri kinú turaakore, nawe, tutakukwa omutima. 9 Abhantu bharatunyankya, nawe, Waryubha atakututiga bheetu abheene. Na onyoora bharatugwisya hansi, nawe, tutakusikibhwa. 10 Eginsiku gyonsego emibhiri gyetu giringi mungʼanga ya okukwa, kya Yeesu, naho obhuhoru bhwa Yeesu, bhumaahikane kumibhiri gyetu. 11 Kwa ego, bheetu bhanú turingi abhahoru, turagenda na oruku eribhaga ryonsego, kurusumo rwa Yeesu, naho obhuhoru bhwaye, bhumaahikane kumibhiri gyetu ginú girakwa. 12 Mbe, bheetu turingi mungʼanga ya okukwa okurekana na emirimu gyetu, nawe, emirimu gyetu ngyo girakora bheenyu muranyoora obhuhoru.
13 Amangʼoore Amarabhu garagamba ega, “Naamwikirirya Waryubha, nkyo kyakora nkagamba.”b Na bheetu tuuna eimani ya ekabhira iyo, nkyo kirakora turagamba. 14 Tumanyiri ega, Waryubha unú yaamuhyukya Omukuru Yeesu, arituhyukya na bheetu, na aritutuura embere yaaye hamwi na bheenyu. 15 Amangʼana gonsego ganú garatunyoora, garatunyoora kurusumo rwenyu, naho eriruguto rya Waryubha rihikiire abhantu abhaaru bhukongʼu, bhamukumye bhukongʼu Waryubha. Okurekana na riyo, Waryubha arigendererya okugungibhwa.
Obhukuru bhwa koko
16 Ego, tutakukwa omutima, onyoora emibhiri gyetu kwa kibhara giragunda, nawe, munsi weetu, Waryubha aratukora abhahya eginsiku gyonsego. 17 Ndagamba ego, kwa okubha eginyanko gyetu ni-nhuhu na n-gya eribhaga ekego. Kweki, giratuseemerya obhukuru bhwa koko. Obhukuru bhuyo, m-bunene bhukongʼu, bhuratukora okurora ega, eginyanko giyo, ni-nkego. 18 Tutakwiganirirya eguru ya ebhintu bhinú bhiramaahikana, kwa okubha bhyeki m-bya eribhaga ekego. Nawe, tureeganirirya eguru ya ebhintu bhinú bhitakumaahikana, kwa okubha bhyeki, m-bya koko.