Abhakori bha emirimu bha eriragano erihya
3
Bhoono, mureeganirirya ega, turaamba kweki okwikomba kubheenyu? Bheetu tutaringi kya abhantu abhandi bhanú bharabhareetera eginyarubha gya okwitonda kubheenyu, kasi okusabha eginyarubha kubheenyu egya okwitonda kubhantu abhandi. 2 Bheenyu mbo enyarubha yeetu, inú engʼoorerwe mumitima gyetu, na abhantu bhonsego bharatura okuisoma na okuimanya. 3 Muroorokya kubhurabhu ega, bheenyu mbo enyarubha ya Kiristu, inú eroorokya emirimu ginú twakora kubheenyu. Enyarubha iyo, etaangʼoorwa kwa obhwino, nawe, yaangʼoorwa na Omutima wa Waryubhaa omuhoru. Kweki etaangʼoorwa kubhibhaara bhya amagina, nawe, yaangʼoorwa mumitima gya abhantu.b 4 Turagamba gayo, kwa okubha riyo ndyo obhwisige bhwetu ku Waryubha, okuhitira ku Kiristu. 5 Etaringi ega, turamanya ega, ekintu kyokyonse kinú turakora, turatura okukikora kwa eginguru gyetu bheetu abheene, nawe, obhuturo bhwetu bhurarwa ku Waryubha. 6 Weeki ngʼo yaatuhaana obhuturo bhwa okubha abhakori bha emirimu bha eriraganoc erihya,d rinú rirarwa ku Mutima Omurabhu. Eriragano riyo, ritaringi amaragiriryo ganú gaangʼoorwa, kwa okubha amaragiriryo ganú gaangʼoorwa garareeta oruku, nawe, Omutima Omurabhu arareeta obhuhoru.
Obhukuru bhwa eriragano erihya
7 Amaragiriryo ganú gaangʼoorwa kumagina, ganú garareeta oruku, gaaja kwa obhukuru bhunú bhurangʼesangʼesa, okuhikira Abhaisiraeri bhakatamwa okumumaaha Musae mubhusu, onyoora obhukuru bhuyo, bhwangʼesangʼesa kwa eribhaga ekego.f Nyoore emirimu gya amaragiriryo gayo, gyaaja kwa obhukuru kya bhuyo, 8 bhoono, emirimu gya Omutima Omurabhu, gitaribha na obhukuru obhwaru bhukongʼu? 9 Nyoore emirimu ginú girakora abhantu okubhuturirwa ekiina, giina obhukuru, maheene emirimu ginú girakora abhantu okubha abhaheene embere ya Waryubha, giribha na obhukuru obhwaru bhukongʼu. 10 Bhoono, obhukuru bhwa eriragano rya akare rirya, bhutaaringa kya obhukuru bhunu bhwa eriragano erihya, kwa okubha obhukuru bhwa eriragano erihya, m-bunene bhukongʼu. 11 Nyoore ekintu kya eribhaga ekego, kyaringa na obhukuru, ekya eribhaga ryonsego kiina obhukuru obhwaru bhukongʼu.
12 Mbe, kwa okubha tuuna obhwisige bhuyo, turagamba kwa obhuhaari. 13 Bheetu tutaringi kya Musa, unú yeeribha obhusu kwa ekitambaara, naho Abhaisiraeri bhatarora obhuteero bhwa obhungʼesingʼesi bhunú bhwaringa bhurakwirirana.g 14 Nawe, obhungʼeeni bhwabho bhwaringa bhuribhirwe. Nawanyareero, hanú eriragano rya akare rirasomwa, bharatamwa okumanya obhuheene, bharabha muna bharibhirwe ekitambaara kirya. Ekitambaara kirya kitararuusibhwa-ho, kiraruusibhwa-ho kwa enjira ya okumwikirirya Kiristu okwenego. 15 M-maheene, nawanyareero, hanú bharasoma ebhitabho bhya amaragiriryo ga Musa,h emitima gyabho giraribhwa na ekitambaara kirya, bharatamwa okumanya obhuheene. 16 Nawe, omuntu wowonse unú aramwihunjurira Omukuru, Omukuru aramuruusya ekitambaara kiyo. 17 Mbe, Omukuru ngʼo Omutima, hanú Omutima wa Omukuru aringi, hayo nho haana obhwiyagaari. 18 Bhoono, bheetu bhonsego bhanú tutakwiribha obhusu na ekitambaara, turoorokya obhukuru bhwa Omukuru, kya ego ekirore kiroorokya ekisusa. Na bheetu turahunjurwa, naho tutuubhane nawe, kwa obhukuru obhwaru bhukongʼu. Obhukuru bhuyo bhurarwa ku Mukuru, unú weeki ngʼo Omutima.