2
Kwa ego naamura ega, m-bujomu ntaaja kubheenyu, naho ntakora musurumbare kweki. 2 Naamura ego, kwa okubha nyoore oni nkaabhakoreri bheenyu musurumbare, atariho unú arinkora oni njomerwe, nawe m-beenyu bhanú oni naabhakora musurumbare! 3 Kiyo nkyo kyakora nkabhangʼoorera munyarubha irya ega, ntariija kubheenyu, naho ntariija okusurumbaribhwa na abhantu bhanú bheenderwanga okunkora njomerwe. Niina obhuheene ega, hanú oni ndaabhe na obhujomerwa, na bheenyu bhonsego murabha na obhujomerwa. 4 Naabhangʼoorera enyarubha irya nsurumbeeri bhukongʼu, kwa enyanko enduru na kwa ameesori amaaru. Ensonga yaani etaaringa okubhasurumbarya, nawe, naaringa ndeenda mumanye kya ego mbahanjiri bhukongʼu.Okwabhirwa kwa omusarya
5 Bhoono, omuntu unú akoreri omurikyaye asurumbeeri, atansurumbeerye oni omwenego, abhasurumbeerye na bheenyu bhonsego. Nawe bhoono, ntakwenda nkore eringʼana riyo ribhe erikongʼu bhukongʼu. 6 Obhujibhu bhunú omuntu uyo yaajibhibhwa okurwa kubhantu abhaaru gati yeenyu, bhumwisiri. 7 Mbe bhoono, mureenderwa okumwabhira na okumuhorisya omuntu uyo, naho atariija okusurumbara bhukongʼu, okuhikira okukwa omutima. 8 Kwa ego, ndabhakomererya ega, mumoorokye ega, mumuhanjiri. 9 Ensonga yaani eindi inú yaakora nkabhangʼoorera enyarubha irya, yaaringa nu-kubheekomya, nyoore mukaabheeri abheegwa kumangʼana gonsego. 10 Omuntu wowonse unú muraabhire, oni nonse ndamwabhira. Na nyoore ririho eringʼana rinú ndeenderwa okwabhira, ndaryabhira embere ya Kiristu kurusumo rwenyu, 11 naho Erisambwaa ritariija okutuhiga, kwa okubha tumanyiri obhungʼeenererya bhwaryo.
Pauro mumugi gwa Turoa
12 Mbe, hanú naahika mumugi gwa Turoa, okuraarika Amangʼana Amajomu eguru ya Kiristu, nkanyoora Omukuru amariri okunsiikurira ekiseku kya okukora emirimu gyaye muyo. 13 Nawe, nteeyigwa bhwaheene mumutima gwani, kwa okubha ntaamunyoora eyo Tiito, omuhiiri waani kuimani. Kwa ego, nkaraga abhantu nkagya Makedonia.
Okuraarika obhuhigi bhwa Kiristu
14 Nawe, turamukumya Waryubha, kwa okubha aratoorokererya eribhaga ryonsego okukiririrya obhuhigi bhwa Kiristu, eguru ya abhasigu bhaaye. Kweki aratukora bheetu okunyaraganʼya obhumanyi bhwa amangʼana eguru ya Kiristu, kira ahasi, kya ego obhurangasiru obhujomu bhuranyaragana kira ahasi. 15 Niigo eringi, kwa okubha bheetu n-kya obhurange obhujomu bhunú Kiristu aramuruusirya Waryubha. Obhurange bhuyo, bhurahikiira abhantu bhonsego, bhanú bharatuuribhwa na bhanú bharabhura. 16 Kubhanú bharabhura, obhurange bhuyo, m-bubhiibhi bhurareeta oruku, nawe, kubhanú bharatuuribhwa, obhurange bhuyo, m-bujomu bhurareeta obhuhoru. Bhoono, niwi aratura okukora emirimu giyo? 17 Bheetu tutaringi kya abhantu abhandi abhaaru, bhanú bharakora eringʼana rya Waryubha, kya ekintu kya okugurya, naho bhanyoore obhwera. Nawe, bheetu kwa eginguru gya Kiristu, turaraarika eringʼana rya Waryubha kwa obhuheene bhonsego embere ya Waryubha, kwa okubha weeki ngʼo yaatutuma.