Enyarubha ya kabhiri eya Pauro ku
Abhakorinto
Pauro arakeeranʼya Abhakorinto
1
Enyarubha inu, erwiri kuoni Pauro, unú Waryubha yaambirikira kwa obhwendi bhwaye, naho mbe omutumwaa wa Kiristu Yeesu. Oni na omuhiiri weetu kuimani Timoteo, turabhangʼoorera bheenyu bhanú muringi mwikanisa rya Waryubha, erya mumugi gwa Korinto eyo. Turabhangʼoorera bheenyu hamwi na abhantu bhonsego bha Waryubha bhanú bharingi mukyaro kya Akaya.2 Turabheendera eriruguto na omurembe okurwa ku Taata Waryubha, na ku Mukuru Yeesu Kiristu bhibhe hamwi na bheenyu.
Waryubha arahorisya munyanko
3 Agungibhwe Waryubha, Taata wa Omukuru weetu Yeesu Kiristu, Taata wa ekyabhira, kweki ngʼo Waryubha unú aratuhorisya kugonsego. 4 Weeki ngʼo aratuhorisya muginyanko gyetu gyonsego, naho na bheetu bhonse tuture okubhahorisya abhandi bhanú bharingi muginyanko amanga hagari hagari. Turabhahorisya kya ego Waryubha aratuhorisya bheetu. 5 Kya ego turagendererya okunyoora eginyanko kurusumo rwa Kiristu, egoego Waryubha aragendererya okutuhorisya bhukongʼu, okuhitira ku Kiristu. 6 Hanú turanyanka, turanyanka kurusumo rwa obhuhorisya bhwenyu na obhutuurya bhwenyu. Kweki, hanú bheetu turahorisibhwa, nho na bheenyu bhonse muranyoora obhuhorisya. Obhuhorisya bhuyo bhurakora bheenyu mwigumirirye eginyanko ginú na bheetu bhonse turanyanka. 7 Obhwisige bhwetu kubheenyu m-bunene, kwa okubha tumanyiri kya ego muranyanka kya bheetu, niigo murahorisibhwa kya bheetu.
8 Abhahiiri bheetu kuimani, tureenda mumanye kya ego twanyanka mukyaro kya Asia.b Eginyanko ginú gyatunyoora, gyaturitohera bhukongʼu okukira eginguru gyetu, kora tukeeganirirya ega, tukaakwiri. 9 M-buheene ega, tweeganirirya muna ega, tubhuturiirwe ekiina kya okwitwa. Riyo ryeebhuka, naho tuteesigira eginguru gyetu abheene, nawe, tumwisigire Waryubha unú arahyukya abhaku. 10 Weeki ngʼo yaatutuurya hanú twaringa mungʼanga enene ya okukwa, kweki arigendererya okututuurya. Bheetu turamwisigira weeki ega, aribhanga arakora ego eribhaga ryonsego. 11 Na bheenyu bhonse murabheerana na bheetu okumusabha Waryubha kurusumo rwetu. Hayo nho weeki ariigwa amasabho geenyu na aritunonka bheetu. Kwa ego, abhantu abhaaru bharimukumya Waryubha kurusumo rwetu.
Pauro arakubhya orugendo rwaye orwa okugya Korinto
12 Mbe, ekisigo kinú kirakora tureegungya niiga, ameetegeerero geetu garatwimiririra ega, eginteemo gyetu ni-njomu mukyaro hanu, ekinene n-kubhugwatani bhwetu na bheenyu. Twikeeri kwa omutima omujomu na obhuheene bhunú bhurarwa ku Waryubha. Tutaakora ego, kwa egintungwa gyetu abheenego, nawe, eriruguto rya Waryubha, ndyo ryakora tukakora gayo. 13 Tutakubhangʼoorera amangʼana amakongʼu, nawe ganú muratura okusoma na okugamanya bhujomu. Ndeesiga ega, muritumanya bhujomu, 14 onyoora bhoonwego mutumanyiri hakego. Nawe, orusiku runú Omukuru weetu Yeesu arihunjuka, murimanya bhujomu ega, bheetu mbo ekisigo kya okwigungya kwenyu, kya ego bheenyu muringi ekisigo kya okwigungya kwetu.
15 Oni naaringa na obhwisige bhuyo, na kiyo nkyo kyakora neendanga okuhika kubheenyu eyo mbere, naho munyoore obhwera mara kabhiri. 16 Naaringa ndeenda okuhita kubheenyu hayo, eribhaga rya okugya mukyaro kya Makedonia, na kweki kwibhaga rya okuhunjuka okurwa Makedonia, naho munsororerye kurugendo rwani rwa okugya Yudea. 17 Bhoono, hanú naakubhya orugendo rwani rwa okuhunjuka kubheenyu eyo, mweeganirirya ega, ntaaringa niimiri? Kasi gayo ndaamura mureeganirirya ega, ndagaamura kwa ameetegeerero gaani omwene, ega ngambe, “Yee,” mmare kweki ngambe, “Tiigo-ha”?
18 Nawe bhoono, kya ego Waryubha aringi omuheene, amangʼana ganú twabhakeerya bheenyu, gataaringa ga omuntu, ega, agambe, “Yee,” amare kweki agambe, “Tiigo-ha.” 19 Ndagamba ego, kwa okubha Yeesu Kiristu, Omwana wa Waryubha,c unú oni, Siriwanod na Timoteo twabharaarikira bheenyu, ataaringa omuntu wa okusanganʼya amangʼana agambe ega, “Yee,” na amare agambe ega, “Tiigo-ha.” Nawe, kuweeki amangʼana gonsego n-ga maheene, “Yee.” 20 Niigo eringi, kwa okubha gonsego ganú Waryubha yaaturaga ega, arituhaana kwa enjira ya Kiristu, n-ga maheene. Kiyo nkyo kirakora turagamba ku Kiristu ega, “Amina,” kurusumo rwa okumugungya Waryubha. 21 Mbe, Waryubha ngʼo aratukora bheetu hamwi na bheenyu, turanaga kukugwatana kwetu na Kiristu. Atusoreri 22 na okututema orubhaaso rwaye, kwa okutuhaana Omutima Omurabhue mumitima gyetu, naho abhe obhutungurya kugonsego ganú Waryubha arituhaana.f
23 Ntaahunjuka Korinto eyo, kwa okubha nteenda munyahaarike mumitima gyenyu. Ganú ndagamba n-ga maheene, kora Waryubha wonse amanyiri ego! 24 Etaringi ega, turatunga eimani yeenyu, nawe, bheetu m-bakori bha emirimu hamwi na bheenyu, kurusumo rwa obhujomerwa bhwenyu, kwa okubha eimani yeenyu enagiri.