Okuhyuka kwa Kiristu
15
Mbe bhoono, abhahiiri bhaani kuimani, ndabhahiitukya Amangʼana Amajomu ganú naabharaarikira na bheenyu mukagagwata. Gayo ngo garabhakora muranaga kuimani inú muunayo. 2 Nyoore muragendererya okugagwata amangʼana ganú naabharaarikira, hayo Waryubha arabhatuurya. Nawe nyoore mutakugendererya okugagwata, eimani yeenyu erabha etaana obhwera.3 Naabheehigirya ameehigiryo ga obhwera ganú oni omwene naagagwata, kya ego engʼoorerwe mu Mangʼoore Amarabhu ega, Kiristu yaakwa kurusumo rwa obhusarya bhwetu.a 4 Kweki ega, akabhiikwa, na ega, orusiku rwa kasatu okurwa okukwa kwaye, akahyuka kya ego engʼoorerwe mu Mangʼoore Amarabhu.b 5 Akamwibhukira Kefa, akamara akabheebhukira abhatumwa ekumi na bhabhiri bharya. 6 Eribhaga erindi akabheebhukira abheekirirya bhanú bhaaringa bharaambuka magana gataanu kwa hamwi. Abhaaru gati ya bhayo, bhakyaringa-ho okuhikira bhoono, na abhandi bhaabho bhaamara okukwa. 7 Kimwi akamwibhukira Yakobho, akamara akabheebhukira abhatumwa bhonsego. 8 Hanú yaamara okubheebhukira abhantu bhonsego, akanyibhukira na oni nonse, oni unú ndingi kya omuntu unú yeebhurwa kwibhaga rinú ritaringi eryaye. 9 Oni m-mutumwa wa obhusuuku obhuke gati ya abhatumwa bhonsego, kora ntakwenderwa okubhirikirwa omutumwa, kwa okubha naanyankyanga erikanisa rya Waryubha. 10 Nawe, n-kwa eriruguto rya Waryubha nkyo kirakora oni m-mutumwa. Eriruguto ryaye kuoni m-bwera obhunene, kwa okubha okurekana na eriruguto riyo, naakora emirimu okukira abhatumwa bhonsego. Ntaakora gayo kwa eginguru gyani omwene, nawe eriruguto rya Waryubha ndyo ryakora emirimu hamwi na oni. 11 Mbe bhoono, nkaabha oni ngʼo ndaraarika, kasi abhatumwa abhandi bharya, bhonsego turaraarika amangʼana garyagarya, na ngo mweekirirya.
Obhuhyuki bhwa abhaku
12 Bhoono, nyoore Kiristu araraarikwa ega, yaahyuka okurwa mubhaku, erabha egaki abhandi gati yeenyu bharagamba ega, obhuhyuki bhwa abhaku bhutariho? 13 Nyoore obhuhyuki bhwa abhaku bhutariho, mbe, Kiristu wonse ataahyuka. 14 Na nyoore Kiristu ataahyuka, okuraarika kwetu kurabha kutaana obhwera, kora eimani yeenyu erabha etaana obhwera. 15 Kweki bheetu tukaamaahikeeni ega, turingi abheemiririri bha obhubheehi eguru ya amangʼana ga Waryubha, kwa okubha tureemiririra ega, Waryubha yaamuhyukya Kiristu okurwa mubhaku. Nawe, nyoore abhaku bhatakuhyukibhwa, mbe, Waryubha ataamuhyukya. 16 Ndagamba ego, kwa okubha nyoore abhaku bhatakuhyukibhwa, mbe, Kiristu wonse ataahyuka. 17 Na nyoore Kiristu ataahyuka, mbe, eimani yeenyu erabha etaana obhwera na murabha mukyari okutuuribhwa okurwa mubhusarya bhwenyu. 18 Nyoore niigo, abhantu bhonsego bhanú bhaakwa bhamwikiriirye Kiristu, bhaabhura kimwi. 19 Nyoore obhwisige bhwetu ku Kiristu, m-bwa okunyoora obhuhoru bhwa mukyaro kinu ekyenego, hayo turabha abhantu bha okwabhirwa okukira abhantu abhandi bhonsego.
20 Nawe bhoono, obhuheene niiga, Kiristu yaahyuka okurwa mubhaku, weeki ngʼo owa mbere okuhyuka kubhanú bhaakwa. 21 Kya ego oruku rwareetwa na omuntu oumwi mukyaro, egoego obhuhyuki bhwa abhaku bhonse, bhwareetwa na omuntu oumwi. 22 Na kya ego, abhantu bhonsego bharakwa kwa ekisigo kya okugwatana kwabho na Adamu, egoego bhonsego bharihyukibhwa kwa ekisigo kya okugwatana kwabho na Kiristu. 23 Nawe, kira omuntu arihyuka kwibhaga ryaye, Kiristu ngʼo owa mbere okuhyuka, eribhaga erindi abhantu bhaaye bharihyukibhwa hanú ariija. 24 Hayo nho, bhuriija obhuteero bhwa bhyonsego, hanú Kiristu arimugwatya Waryubha Taata obhukama, hanú arisikya obhutungi bhonsego, obhuturo bhonsego na eginguru gyonsego, egya abhasigu bhonsego. 25 Ndagamba ego, kwa okubha Kiristu areenderwa atunge okuhikira abhahige abhasigu bhaaye bhonsego na okubhatuura mubhutungi bhwaye.c 26 Omusigu wa obhuteero okusikibhwa, n-duku. 27 Amangʼoore Amarabhu garagamba ega, “Waryubha yaatuura ebhintu bhyonsego mubhutungi bhwaye.”d Etaringi ega, Waryubha wonse yaatuurwa mubhutungi bhuyo. Tiigo-ha, kwa okubha Waryubha ngʼo ateeri ebhintu bhyonsego mubhutungi bhwa Kiristu. 28 Mbe, hanú ebhintu bhyonsego bhiribha bhiteerwe mubhutungi bhwa Omwana waaye,e nho Omwana wonse, ariituura mubhutungi bhwa Waryubha unú ateeri ebhintu bhyonsego mubhutungi bhwa Omwana waaye, naho Waryubha abhe omutungi wa bhyonsego.
29 Bhoono, abhantu bhanú bharabhatiijwa kurusumo rwa abhaku, bhareesigira okunyoora obhwera-ki? Nyoore abhaku bhatakuhyukibhwa kora orusiku rumwi, kwaki abhantu bharabhatiijwa kurusumo rwabho? 30 Na bheetu kwaki twituure mungʼanga kira eribhaga? 31 Abhahiiri bhaani kuimani, kira orusiku oni ndingi mungʼanga ya okukwa. Na bhunu m-buheene, kya ego ndeegungya kurusumo rwenyu, kwa okugwatana kwani na Kiristu Yeesu Omukuru weetu. 32 Nyoore obhwisige bhwani bhukaabheeri bhwa mukyaro kinu ekyenego, okurwana kwani na egintyenyi egihaari mumugi gwa Efeso, kukaabheeri na obhwera-ki? Na nyoore abhaku bhatakuhyukibhwa, mbe,
“Tubhenga turarya na okunywa,
kwa okubha ejo twakakwe.”f
33 Mutangʼeenwa na abhantu bhanú bharagamba ego, kwa okubha, “Abhasaani abhabhiibhi bharasarya enteemo enjomu.” 34 Mungʼeenihe, mwiganirirye bhujomu, mutige okukora obhusarya, kwa okubha abhandi gati weenyu bhatamumanyiri Waryubha. Ndagamba gayo, naho mbasuukye.
Kya ego omubhiri guribha orusiku rwa obhuhyuki
35 Omuntu aratura okubhuurya ega, “Abhaku bharahyukibhwa egaki? Na bharibha na omubhiri gwa egaki?” 36 Gayo m-mabhuuryo ga ekikangi! Okaahamba embusuro, etakutura okumera bira okukwa. 37 Embusuro inú murahamba, ebhe engano kasi embusuro eindi, etakuhunkana na ekiimerya kyayo. 38 Waryubha arahaana embusuro omubhiri kya ego omwene areenda, na kira embusuro araihaana omubhiri gwayo eyeene.
39 Ebhibhumbwa bhyonsego bhiina emibhiri, nawe, emibhiri giyo gitakuhunkana, emibhiri gya abhantu n-gimwi, na egya egintyenyi giringi bhundi, egya ebhinyonyi giringi bhundi, na egya eginswi giringi bhundi. 40 Kweki giriho emibhiri gya murwire na emibhiri gya mukyaro. Nawe, obhujomu bhwa emibhiri gya murwire bhuringi bhundi, na obhujomu bhwa emibhiri gya mukyaro bhuringi bhundi. 41 Obhujomu bhwa eryubha bhuringi bhundi, obhujomu bhwa omweri bhuringi bhundi na obhujomu bhwa eginjota bhuringi bhundi. Na kira enjota eimwi iina obhujomu bhwayo.
42 Ego niigo eribha, eribhaga rinú abhaku bharihyuka. Kya ego embusuro erahambwa mwirobha, omubhiri gunú gurabhiikwa mwirobha oranyoora gusarikiri, nawe, gurahyukibhwa gunú gutakusarika. 43 Omubhiri hanú gurabhiikwa gurajeerwa, nawe, hanú gurahyukibhwa gurajoma. Hanú gurabhiikwa, gurabha mubhunyooheeru, nawe, hanú gurahyukibhwa gurabha na eginguru. 44 Omubhiri gunú gurabhiikwa, n-gwa obhusimuka, nawe, gunú gurahyukibhwa m-mubhiri omuhya gunú gurarekana na Omutima Omurabhu. Guriho omubhiri gwa obhusimuka, na ego guriho kora omubhiri omuhya gunú Omutima Omurabhu arituhaana.
45 Mu Mangʼoore Amarabhu engʼoorerwe ega, “Omuntu owa embere Adamu, yaabhumbwa akabha omuntu omuhoru,”g nawe, Adamu wa obhuteero, Kiristu, ngʼo Omutima unú arabhahaana abhantu obhuhoru. 46 Omubhiri gunú gurakangata m-mubhiri gwa obhusimuka, nho, guuja omubhiri omuhya gunú turihaanwa na Omutima Omurabhu. 47 Omuntu owa embere yaaringa wa mukyaro, yaabhumbwa okurekana na obhutoto. Omuntu wa kabhiri yaarwa murwire. 48 Abhantu bhonsego bha mukyaro bhaana omubhiri gwa mukyaro kya omubhiri gwa Adamu. Na abhantu bhonsego bha murwire bharibha na omubhiri gwa murwire kya omubhiri gwa Kiristu. 49 Na kya ego tutuubheeni na unú yaabhumbwa okurekana na obhutoto, egoego turituubhana na unú aringi murwire.
50 Abhahiiri bhaani kuimani, kinú ndeenda okubhakeerya niiga, omubhiri gunú tuunago bhoonwego gutakutura okugabha obhukama bhwa Waryubha,h na kinú kirasarika kitakutura okubha na obhuhoru bhwa koko.
51 Mwitegeerere, ndabhakeerya ekinyerera, ega, bheetu tutarikwa bhonsego, nawe bhonsego turihunjurwa. 52 Riyo ririibhuka rumwigo, kya okuhindirirya na okumogora, eribhaga rinú enkombi ya obhuteero erikuura. Hayo nho, abhaku bharihyukibhwa na bharibha na emibhiri ginú gitakusarika kweki, na bheetu bhanú turingi abhahoru turihunjurwa. 53 Eribha ego, kwa okubha emibhiri ginú girasarika gireenderwa gihunjurwe gibhe emibhiri ginú gitakusarika, na emibhiri ginú girakwa gireenderwa gihunjurwe gibhe emibhiri ginú gitakukwa. 54 Mbe bhoono, emibhiri ginú girasarika na okukwa, hanú girihunjurwa okubha emibhiri ginú gitakusarika na okukwa, hayo nho ririkunaana, eringʼana rinú ryangʼoorwa mu Mangʼoore Amarabhu ega,
“Waryubha asikirye oruku kwa obhuhigi!”i
55 “Oruku, obhuhigi bhwaho bhuringi-ha?
Giringi-ha eginguru gyaho gya okureeta obhururu?”j
56 Eginguru gya oruku girarekana na obhusarya bhunú turakora, na amaragiriryo ngo garakora turamanya ega, turakora obhusarya. 57 Nawe, tumukumye Waryubha. Weeki aratuhaana obhuhigi kwa enjira ya Omukuru weetu Yeesu Kiristu.
58 Mbe, abhahiiri bhaani abhahanje kuimani, mwimirire bhwima na munage, mugendererye okukora emirimu gya Omukuru kwa ekituunyo eginsiku gyonsego, kwa okubha mumanyiri ega, emirimu ginú murakora kurusumo rwa Omukuru, gitaringi gya bhusa.