Omusororyo gwa okubhabheera abheekirirya
16
Bhoono, ndagamba eguru ya omusororyo gwa okubhabheera abheekirirya bha Yerusaremu.a Bheenyu bhonse mukorenga kya ego naaragirirya amakanisa ga Abhagaratia. 2 Orusiku rwa okwamba orwa kira obhutuuro,b kira oumwi weenyu, abhenga arabhiika emongo okuringʼaana na obhunyoori bhwaye, naho hanú ndiija eyo, kutariija okubha-ho na omusororyo. 3 Hanú ndiija ndibhahaana eginyarubha gya obhumanyiiriryo, abhantu bhanú murisora, naho bhahire omusororyo gwenyu mwikanisa rya Yerusaremu. 4 Na nyoore erimaahikana ega, oni nonse ndeenderwa okugya, ndigya hamwi nabho.Pauro areeseemya okugya Korinto
5 Ndiija kubheenyu eyo, hanú ndirwa mukyaro kya Makedonia, kwa okubha ndeenda mbere okuhitira Makedonia. 6 Hanú ndiija, hamwi ndiikara na bheenyu kwa eribhaga nyabhurebhe kasi kwibhaga ryonsego rya embeho, naho mumbeere okugendererya na orugendo rwani rwa okugya hohonse hanú ndyenda okugya. 7 Ntakwenda tumaahane na bheenyu bhoonwego kwa okuhitiranʼya ego. Ndeesiga okwikara kubheenyu eribhaga nyabhurebhe, nyoore Omukuru arinyikiririrya. 8 Nawe bhoono, ndeekara mumugi gwa Efeso hanu, okuhikira orusiku rwa enyangi ya Epentekosite.c 9 Erabha ego, kwa okubha Waryubha yansiikuriiri ekiseku hanu, okukora emirimu emirito, onyoora abhantu bhanú bharandibhira m-baaru.
10 Bhoono, Timoteo hanú ariija kubheenyu eyo, mumwangararire bhujomu, naho yeekare bira obhoobha, kwa okubha wonse arakora emirimu gya Omukuru kya oni omwene. 11 Omuntu wowonse atamujeera, nawe, mumubheere yeemuke eyo kwa omurembe, naho ahunjuke kuoni, kwa okubha oni ndamuganyirira hamwi na abheekirirya abharikyetu.
12 Eguru ya omwikirirya omurikyetu Apooro, mmukomereerye bhukongʼu ega, yaaje kubheenyu eyo, hamwi na abheekirirya abhandi, nawe, weeki atakwiyigwa okuuja kwibhaga rinu. Ariija kwibhaga rinú arinyoora omweya.
Okukeeranʼya kwa okuraga
13 Mutengeeje, munage kuimani, kweki mubhe abhasajasaaja na abha eginguru. 14 Amangʼana geenyu gonsego gakoreke kwa obhuhanje.
15 Bhoono, abhahiiri bhaani kuimani, mumanyiri ega, abhantu bha owa Sitefano mbo bhaabha abha mbere okumwikirirya Yeesu Kiristu, mukyaro kya Akaya, na bheeki bheeruusya okubhakorera emirimu, abhantu bha Waryubha. Ego, ndabhakomererya 16 na bheenyu, mubhenga murabheegwa abhantu kya bhayo, na kira omuntu unú arakora emirimu hamwi nabho kwa ekituunyo.
17 Naajomeerwe bhukongʼu hanú Sitefano, Fotunato na Akaiko, bhaahikiri hanu, kwa okubha bheeki bhambeereri amaaru kuganú naasuuhirwanga kwa okwanga okubha-ho kwenyu. 18 Bheeki bhasambaarukirye omutima gwani, na egyenyu gyonse. Mbe bhoono, mubhamanye bhukongʼu abhantu kya bhanu.
19 Amakanisa ga mukyaro kya Asia,d bharabhakeeranʼya. Akira na omukari waaye Pirisikira, hamwi na abheekirirya bhanú bhareekumanʼya iika owaabho, bharabhakeeranʼya bhukongʼu kuriina rya Omukuru. 20 Abheekirirya bhonsego bha hanu bharabhakeeranʼya. Bheenyu bhonse mukeeranʼyenga kwa obhuhanje bhwa Ekikiristu.
21 Oni Pauro, ndangʼoora enkeeranʼya inu kwa okubhoko kwani omwene. 22 Omuntu wowonse unú atamuhanjiri Omukuru, yeehiimwe. Omukuru weetu uuje!