Ekibharo kya okuruusya obhurooti//na ekya okugamba ebhigambo ebhindi
14
Mwikongʼererye okubha na obhuhanje na mukore ekituunyo okunyoora ebhibharo bhya Omutima Omurabhu, ekinene ekibharo kya okuruusya obhurooti. 2 Omuntu unú aragamba ekigambo ekindi, atakugamba na abhantu, nawe aragamba na Waryubha, kwa okubha ganú aragamba omuntu oundi wowonse atakugamanya. Weeki arabha aragamba kwa eginguru gya Omutima Omurabhu amangʼana ganú geebhisiri.a 3 Nawe, unú araruusya obhurooti, aragamba na abhantu amangʼana ga okubhakora bhanage kuimani, aga okubhahorisya na aga okubhateremya emitima. 4 Unú aragamba ekigambo ekindi, areenagya omwene kuimani, nawe, unú araruusya obhurooti arakora abheekirirya abhandi bhanage kuimani.5 Oni ndeenda bheenyu bhonsego mubhenga muragamba ebhigambo ebhindi, nawe, ekinene ndeenda mubhenga muraruusya obhurooti, kwa okubha emirimu gya okuruusya obhurooti giina obhwera bhukongʼu kubheekirirya abhandi, okukira okugamba ebhigambo ebhindi. Nawe, omuntu unú aragamba ekigambo ekindi akihunjure, naho okubheera abheekirirya abhandi bhanage kuimani. 6 Bhoono, abhahiiri bhaani kuimani, nyoore ndaaje kubheenyu na okugamba ebhigambo ebhindi, muratura okunyoora obhwera-ki? Mutakunyoora obhwera bhobhonse. Nawe, nyoore ndaabhakeerye ganú Waryubha yaantubhuriiri, kasi ndaabhahaane obhumanyi, ndaaruusye obhurooti kasi ndeehigirye, hayo muranyoora obhwera. 7 Niigo eringi kora kubhintu bhinú bhitaringi ebhihoru, hanú bhiraruusya eriisi, ebhe ekironge, kasi eritungu. Nyoore bhiraaruusye eriisi bhuyagayaga, omuntu aratura egaki okumanya eriimbo? 8 Kora enkombi ekaaruusya eriisi rinú ritamanyikeeni kubhantu, niwi unú areeseemye okugya mwiihe? 9 Niigo eringi na kubheenyu, nyoore muragamba amangʼana ganú gatamanyikeeni, niwi unú aratura okumanya kinú muragamba? Hayo ganú muragamba garibha garagya na omuyaga.
10 Mukyaro bhirimo ebhigambo amanga amaaru, nawe, kitariho kora ekimwi kinú kitaana ensonga yaakyo. 11 Bhoono, nyoore ntamanyiri ekigambo kinú oundi aragamba, ndabha omugeni kumuntu uyo, na wonse arabha omugeni kuoni. 12 Niigo eringi na kubheenyu. Bhoono, kwa okubha mureenda bhukongʼu okubha na ebhibharo bhya Omutima Omurabhu, mwikongʼererye okubha na ebhibharo bhinú bhirakora abheekirirya abhandi bhanage kuimani. 13 Kwa ego, omuntu unú aragamba ekigambo ekindi, amusabhe Waryubha, amubheere okuhunjura kinú aragamba. 14 Ndagamba ego, kwa okubha nyoore nkaasabha kwa ekigambo ekindi, omutima gwani ngo gurasabha, nawe obhungʼeeni bhwani, bhurabha bhutaana obhwera. 15 Bhoono ndeenderwa nkore-ki? Nsabhe kwa omutima kwa ekigambo ekindi, kweki nsabhe kwa obhungʼeeni, niimbe kwa omutima kwa ekigambo ekindi, kweki niimbe kwa obhungʼeeni. 16 Okaamugungya Waryubha kwa omutima ogwenego, omuntu oundi unú atamanyiri kinú ogambiri, ngʼyeetabha egaki, “Amina”? 17 Kuuwe, m-maheene orabha oramukumya Waryubha bhujomu, nawe, oundi okukumya kwaho kutakumubheera okunaga kuimani.
18 Ndamukumya Waryubha, kwa okubha ndagamba kwa ebhigambo ebhindi okukira bheenyu bhonsego, 19 nawe mwikanisa, nhanjiri bhukongʼu okugamba kwa obhungʼeeni, amangʼana gataanu ganú garamanyikana, naho mbeehigirye abhandi. Riyo ndyo erijomu okukira okugamba amangʼana ebhiku ekumi kwa ekigambo ekindi.
20 Abhahiiri bhaani kuimani, muteeganirirya kya abhaana, nawe mubhenga mureeganirirya kya abhantu abhakuru. Nawe, eguru ya obhubhiibhi, mubhe kya abhaana abharera. 21 Mu Mangʼoore Amarabhu engʼoorerwe ega,
“Omukuru Waryubha aragamba ega,
‘Ndigamba na abhantu bhanu okuhitira abhageni
bhanú bharagamba ebhigambo ebhindi,
kora ego, bhatarinyitegeerera.’”b
22 Kwa ego, ekibharo kya okugamba ebhigambo ebhindi, n-kimanyiiriryo kya eginguru gya Waryubha eguru ya bhanú bhatakwikirirya, kitaringi eguru ya bhanú bhareekirirya. Nawe, ekibharo kya okuruusya obhurooti n-kurusumo rwa bhanú bhareekirirya, kitaringi kurusumo rwa bhanú bhatakwikirirya. 23 Mbe, nyoore abheekirirya bhareekumanʼye okusabha, bhonsego bhaambe okugamba kwa ebhigambo ebhindi, kimwi abhantu bhanú bhatamanyiri ekintu, kasi bhanú bhataringi abheekirirya bharaasohe-mo, bhoono bhataagambe ega, mudangeeni? 24 Nawe, bhonsego bhakaabha bhararuusya obhurooti, omuntu unú atamanyiri ekintu, kasi unú ataringi omwikirirya asohe-mo, ganú areegwe okurwa kubhonsego garamukora okumanya obhubhiibhi bhwaye. Kweki gonsego ganú areegwe garamubhuturira ekiina. 25 Ganú geebhisiri mumutima gwaye, garitubhurwa, nho aritema ebhiru na okumusyengera Waryubha aragamba ega, “M-maheene Waryubha aringi gati yeenyu!”
Kya ego ereenderwa okumusabha Waryubha
26 Abhahiiri bhaani kuimani, tugambe egaki? Hanú mureekumanʼya okusabha, oumwi yeembe, oundi yeehigirye, oundi agambe ganú Waryubha amutubhuriiri, oundi agambe ekigambo ekindi, na oundi ahunjure ganú garagambwa kwa ekigambo ekindi. Gonsego gakoreke kurusumo rwa okukora abheekirirya bhanage kuimani. 27 Nyoore abhantu bharaagambenga kwa ebhigambo ebhindi, abhagambi bhabhe abhabhiri kasi abhasatu ego, bhatakira hayo, na bhagambenga kiumwi umwi, kweki na abhenga-ho omuntu wa okuhunjura ganú bharagamba. 28 Nyoore atariho omuntu wa okuhunjura, omugambi wa ekigambo ekindi atige okugamba mwikanisa, nawe agambe na Waryubha mumutima gwaye.
29 Na bhanú bhararuusya obhurooti bhonse, bharuusye abhabhiri kasi abhasatu, na abhandi bheekomye amangʼana gayo. 30 Nawe, nyoore oundi kubhanú bhareetegeerera atubhuriirwe eringʼana okurwa ku Waryubha, owa mbere unú yaari araraarika akire. 31 Kira oumwi abhe na omweya gwa okugamba obhurooti, naho abhantu bhonsego bheehigiribhwe na okuteremibhwa omutima. 32 Ekibharo kya okuruusya obhurooti, kiratungwa na omwene ekibharo kiyo, 33 kwa okubha Waryubha weetu ataringi wa eritoongʼana, ngʼ-wa omurembe.
Kya ego eringi mumakanisa gonsego ga abhantu bha Waryubha, 34 abhakari bhareenderwa bhakirenga mwikanisa, kwa okubha bhatakwiriribhwa okugamba. Bhabhe abheegwa kya ego amaragiriryo ga Musa gonse garagamba. 35 Nyoore bhareenda okumanya eringʼana nyabhurebhe, bhabhenga bharabhuurya abhasaaja bhaabho iika owaabho, kwa okubha ni-nsoni omukari okugamba mwikanisa.
36 Bhoono, eringʼana rya Waryubha ryareka kubheenyu? Kasi ribhahikiiri bheenyu abheenego? 37 Nyoore omuntu areerora ega, yaana ekibharo kya okuruusya obhurooti, kasi ega, yaana ekibharo ekindi kya Omutima Omurabhu, amanye ega, ganú ndabhangʼoorera, m-maragiriryo okurwa ku Mukuru. 38 Nawe, omuntu unú arajeera gayo, wonse ajeerwe.c