Obhuhanje
13
Kora nkaagamba kwa ebhigambo bhya abhantu na ebhigambo bhya bhamaraika, nawe nyoore ntaana obhuhanje, ndabha kya ekituri kya eridebhe rinú ritaana ekintu na kya ekituri kya enkengere inú eratemwa bhusa. 2 Kweki kora nkaabha ndaruusya obhurooti na okumanya gonsego ganú geebhisiri, na okubha na obhumanyi bhonsego, kora nkaabha na eimani enene ya okutura okungʼanʼya eginkuku, nawe nyoore ntaana obhuhanje, oni m-busa. 3 Kweki nkaaruusya ebhintu bhyani bhyonsego okubhahaana abhatobhu, na kora nkaaruusya omubhiri gwani, naho gusambwe mumururo,a nawe nyoore ntaana obhuhanje, ntakunyoora obhwera bhobhonse.4 Obhuhanje bhuramukora omuntu abhe omwigumirirya, abhe omuserenʼya, abhe ataana orwango, abhe ataana ekisiraani na abhe atakwiheema. 5 Obhuhanje bhuramukora omuntu abhe arabhasuuka abhandi, bhutakumukora yeeganirirye eguru yaaye omwenego, kora bhutakukora omuntu ajime bhwangu, kora abhiike ekisiiyomba. 6 Obhuhanje bhuramukora omuntu atajomererwa obhubhiibhi, nawe bhuramukora ajomererwe obhuheene. 7 Obhuhanje bhuramukora abhe areegumirirya kugonsego, abhe yaana eimani eribhaga ryonsego, abhe yaana obhwisige eribhaga ryonsego, kweki abhe omwikongʼererya kugonsego.
8 Obhuhanje bhutaana obhuteero kora hake. Nawe ebhibharo bhya okuruusya obhurooti, okugamba ebhigambo ebhindi, na okubha na obhumanyi, bhyeki bhiina obhuteero. 9 Erabha ego, kwa okubha tumanyiri amangʼana amakego, na turaruusya obhurooti obhukego. 10 Nawe, eribhaga rinú amangʼana ganú gakunaaniri gariija, amake gayo gatakunaaniri garihwa. 11 Hanú naaringa omwana, naaringa ndagamba aga ekyana, ameetegeerero gaani gaaringa aga ekyana, na naaringa ndeeganirirya aga ekyana. Nawe bhoono, kwa okubha ndingi omukuru, aga ekyana naagatiga. 12 Kya ego turamaaha bhoono, n-kya okumaaha ebhintu mukitu, nawe eribhaga erindi, turibhirora bhyonsego kubhurabhu. Eribhaga rinu mmanyiri hakego, nawe eribhaga erindi ndimanya bhukongʼu kya ego Waryubha aramanya oni. 13 Mbe bhoono, ebhintu ebhisatu bhinu bhitarihwa, eimani, obhwisige na obhuhanje. Na kubhiyo, eringʼana erikuru okukira gonsego m-buhanje.