Ebhibharo bhya Omutima Omurabhu
12
Bhoono, abhahiiri bhaani kuimani, ndagamba eguru ya ebhibharo bhinú bhirarwa ku Mutima Omurabhu,a kwa okubha ndeenda mubhimanye bhujomu. 2 Mumanyiri ega, hanú mwaringa mutamumanyiri Waryubha, mwahabhibhwa na okoorokereribhwa okusyengera ebhisusano bhinú bhitakuhaira. 3 Kwa ego, ndeenda mumanye ega, omuntu wowonse unú aroorokereribhwa na Omutima wa Waryubha atakutura okugamba ega, “Yeesu yeehiimwe.” Kweki omuntu wowonse nyoore atakoorokereribhwa na Omutima Omurabhu, atakutura okugamba ega, “Yeesu m-Mukuru.”4 Mbe, bhiriho ebhibharo amanga amaaru, nawe unú aragabha ebhibharo bhiyo m-Mutima uyouyo. 5 Kweki okumukorera emirimu Omukuru kuriho kwa amanga amaaru, nawe, Omukuru ngʼ-uyouyo. 6 Kweki kuriho okukora emirimu kwa amanga amaaru, nawe, Waryubha unú aratubheera bhonsego okukora emirimu giyo ngʼ-uyouyo. 7 Omutima arakora emirimu munsi wa kira omuntu, naho abhantu bhonsego bhabhe bharanyoora obhwera. 8 Omutima aramuhaana omuntu oumwi okugamba amangʼana ga egintungwa, na oundi okugamba amangʼana ga obhumanyi. Omutima uyouyo ngʼo araruusya ebhibharo bhiyo kya ego areenda. 9 Omutima uyouyo, aramuhaana omuntu oundi ekibharo kya okubha na eimani enene, oundi ekibharo kya okuhwenʼya, 10 oundi ekibharo kya okukora ebhika, oundi ekibharo kya obhurooti, oundi ekibharo kya okumanya omutima omubhiibhi na Omutima Omurabhu, oundi ekibharo kya okugamba ebhigambo ebhindi, na oundi ekibharo kya okuhunjura ebhigambo bhiyo. 11 Emirimu giyo gyonsego, Omutima oumwi uyo, ngʼo arakora. Weeki aramugabhira kira omuntu ekibharo kyaye okuringʼaana na kya ego omwene areenda.
Ebhiroobhero bhya omubhiri m-byaru, nawe omubhiri n-gumwi
12 Omubhiri guuna ebhiroobhero ebhyaru, nawe, ebhiroobhero bhiyo, mbyo bhigwateeni okubha omubhiri gumwi. Mbe bhoono, kya ego omubhiri guringi, niigo ego Kiristu aringi. 13 Ndagamba ego, kwa okubha bheetu bhonsego, tubhe Abhayahudi kasi abhantu bha ebhyaro ebhindi, tubhe abhagaya kasi tubhe tureeyagaara, twabhatiijwa kwa Omutima oumwi na okuhaanwa Omutima oumwi uyouyo, naho tubhe omubhiri gumwi.
14 Mbe, omubhiri gutaana ekiroobhero kimwi ego, nawe guuna ebhiroobhero ebhyaru. 15 Nyoore okuguru kukaagamba ega, “Kwa okubha oni ntaringi okubhoko, ego, oni ntaringi ekiroobhero kya omubhiri,” bhoono kutakubha kwa omubhiri kwa ekisigo kiyo? 16 Kweki okutwi kukaagamba ega, “Kwa okubha oni ntaringi eriiso, ego, oni ntaringi ekiroobhero kya omubhiri,” bhoono kutakubha kya omubhiri kwa ekisigo kiyo? 17 Nyoore omubhiri gonsego gukaabheeri eriiso, ekaabheeri egaki okwigwa? Kasi omubhiri gonsego gukaabheeri okutwi, ekaabheeri egaki okwinyunkirirya? 18 Nawe bhoono, Waryubha yaatuura kira ekiroobhero kumubhiri, kya ego omwene yeenda. 19 Omubhiri gutakaabheeri omubhiri, nyoore gukaabheeri ekiroobhero kimwi ego. 20 Bhoono mbe, ebhiroobhero bhya omubhiri m-byaru, nawe omubhiri n-gumwi.
21 Eriiso ritakutura okukeerya okubhoko ega, “Uuwe ntakukwenda.” Kora omutwe gutakutura okukeerya amaguru ega, “Bheenyu ntakubheenda.” 22 Okutiga gayo, ebhiroobhero bhya omubhiri bhinú bhiramaahikana ega, m-binyooheeru, mbyo bhireenderwa bhukongʼu. 23 Kweki ebhiroobhero bhya omubhiri bhinú bhiramaahikana ega, bhitakwenderwa okusuukwa, mbyo turabhisuuka bhukongʼu. Na ebhiroobhero bhya omubhiri bhinú bhiramaahikana ega, bhirareeta eginsoni, bhiyo mbyo turabhyangararira bhwaheene. 24 Kweki ebhiroobhero bhya omubhiri bhinú bhitakureeta eginsoni, bhitakwenderwa okwangararirwa kya ebhindi. Waryubha omwene agwateenʼye omubhiri bhujomu. Ebhiroobhero bhya omubhiri bhinú bhirasuuhirwa obhusuuku, yaabhikora bhisuukwe, 25 naho omubhiri gutaahukana, nawe, ebhiroobhero bhya omubhiri bhyonsego bhibheerane. 26 Na ekiroobhero ekimwi kikaanyahaarika, bhyonsego bhiranyahaarika hamwi nakyo. Kweki ekiroobhero ekimwi kikaagungibhwa, bhyonsego bhirajomerwa hamwi nakyo.
27 Mbe, bheenyu bhonsego m-mubhiri gwa Kiristu, na kira oumwi weenyu n-kiroobhero kumubhiri guyo. 28 Waryubha yaatuura abhantu mwikanisa okurekana na ebhibharo bhyabho. Yaatuura-mo abhatumwa, abharooti, na abheehigirya. Kweki akatuura abhakori bha ebhika, abha ekibharo kya okuhwenʼya abharweri, abha ekibharo kya okubheerana, abha ekibharo kya obhutungi, na abha ekibharo kya okugamba ebhigambo ebhindi. 29 Bhoono, abhantu bhonsego m-batumwa? Abhantu bhonsego m-barooti? Abhantu bhonsego m-beehigirya? Abhantu bhonsego m-bakori bha ebhika? 30 Abhantu bhonsego bhaana ekibharo kya okuhwenʼya abharweri? Abhantu bhonsego bharagamba ebhigambo ebhindi? Kweki abhantu bhonsego bhaana ekibharo kya okuhunjura ebhigambo bhiyo? 31 Mbe bhoono, mukore ekituunyo okutuna ebhibharo ebhikuru. Nawe bhoono, ndabhoorokya enjira enjomu okukira gyonsego.