11
Munyihigire oni, kya ego oni nonse ndamwihigira Kiristu.Kya ego mureenderwa okwibhoha hanú murasabha
2 Ndabhagungya kwa okubha muranhiituka kumangʼana gonsego, na okugwata ameehigiryo kya ego naabheehigirya. 3 Nawe, bhoono ndeenda mumanye ega, omutwea gwa omusaaja wowonse omwikirirya n-Kiristu, omutwe gwa omukari m-musaaja waaye na omutwe gwa Kiristu ngʼ-Waryubha. 4 Kwa ego, omusaaja wowonse omwikirirya unú arakundikirya omutwe hanú arasabha, kasi hanú araruusya obhurooti, uyo arasuukya omutwe gwaye, omutwe guyo n-Kiristu. 5 Omukari omwikirirya wonse unú atakukundikirya omutwe hanú arasabha, kasi hanú araruusya obhurooti, uyo arasuukya omutwe gwaye, omutwe guyo m-musaaja waaye. Ndagamba ego, kwa okubha arabha kya omukari unú amwegeri orutubhwi.b 6 Nyoore omukari atakukundikirya omutwe, ereenderwa amwege egintuukya gyaye. Nawe, kwa okubha ni-ginsoni kumukari okumwega egintuukya, ereenderwa akundikirye omutwe gwaye. 7 Etakwenderwa omusaaja akundikirye omutwe gwaye, kwa okubha weeki arahunkanibhwa na Waryubha, kweki aroorokya obhukuru bhwa Waryubha. Nawe, omukari aroorokya obhukuru bhwa omusaaja waaye. 8 Ndagamba ego, kwa okubha Waryubha ataamubhumba omusaaja okurwa kumukari, nawe yaabhumba omukari okurwa kumusaaja. 9 Kora omusaaja ataabhumbwa kurusumo rwa omukari, nawe omukari ngʼo yaabhumbwa kurusumo rwa omusaaja. 10 Kwa ekisigo kiyo, kweki kwa ekisigo kya bhamaraika, omukari areenderwa okukundikirya omutwe gwaye, okoorokya ega, aringi insi ya obhutungi bhwa omusaaja waaye.c
11 Nawe, kubhumwi bhwetu na Omukuru, omukari atakutura okukora ryoryonse bira omusaaja, kora omusaaja atakutura okukora ryoryonse bira omukari. 12 Ndagamba ego, kwa okubha kya ego omukari yaabhumbwa okurwa kumusaaja, bhoono, omusaaja wonse areebhurwa na omukari. Nawe ebhintu bhyonsego bhirarwa ku Waryubha. 13 Bhoono mwamure abheene, m-bujomu omukari okumusabha Waryubha bira okukundikirya omutwe? 14 Ndeegwa kora emibhiri egyene giroorokya ega, ni-nsoni kumusaaja okubha na egintuukya egintambi! 15 Nawe, omukari okubha na egintuukya egintambi kuramukora asuukwe,d kwa okubha aheerwe egintuukya egintambi gibhe kya emyenda gya okukundikirya omutwe. 16 Nawe, nyoore omuntu areende okuhakaana eguru ya amangʼana gayo, bheetu tutaana egimiira egindi okukira giyo, kora amakanisa ga Waryubha gonse gataanagyo.
Abhakorinto bhatakurya ebhyakurya bhya Omukuru//kya ego ereenderwa
17 Ntakubhagungya eguru ya ganú ndeenda okubhakomererya, kwa okubha hanú oranyoora mwikumeenʼye hamwi mutakukora ga obhwera, nawe, murakora ganú gataana obhwera. 18 Nigwiri ega, hanú oranyoora mwikumeenʼye hamwi abheekirirya bhonsego mutakwigwana. Kugayo nigwiri, agandi ndeekiriranʼya nago. 19 Obhwahukani bhureebhuka gati yeenyu, naho bhanú bharingi abhaheene bhamanyikane. 20 Nawe bhoono, hanú oranyoora mwikumeenʼye hamwi mutakurya ebhyakurya bhya Omukuru kya ego ereenderwa, 21 kwa okubha kira omuntu ararya ebhyakurya bhyaye bira okuganyirira abhandi. Riyo rirakora abhandi bhatame na omweko na abhandi bharehwe. 22 Bhoono, mutaana eginyumba enú muratura okwikara, naho murye na okunywa? Kwaki murajeera erikanisa rya Waryubha na okubhasuukya bhanú bhataana ekintu? Mbakeerye-ki? Mbagungye? Tiigo-ha! Ntakubhagungya kurusumo rwa gayo.
Okurya ebhyakurya bhya Omukuru kya ego ereenderwa
23 Ameehigiryo ganú naanyoora okurwa ku Mukuru Yeesu ngo naabhahaana bheenyu ega, obhutiku bhurya yaakorerwa eniku, yaagega omukaate, 24 akamukumya Waryubha, akagusuunura, akagamba ega, “Gunu ngo omubhiri gwani, gunú gwakaruusibhwe kurusumo rwenyu. Mukorenga ego, kwa okunhiituka oni!” 25 Egoego, hanú bhaamara okurya ebhyakurya, akagega ekikombe kya edivai,e akagamba ega, “Ekikombe kinu kireemiririra eriraganof erihya rinú rirakoreka okuhitira amanyinga gaani. Mukorenga ego, kira hanú muranywera ekikombe kiyo, kwa okunhiituka oni!” 26 Kwa ego, hanú murarya omukaate guyo, na okunywera ekikombe kiyo, murabha muraraarika oruku rwa Omukuru okuhikira hanú ariija.
27 Omuntu wowonse unú ararya omukaate guyo, kasi okunywera ekikombe kiyo, kya ego etakwenderwa, arabha akoreri obhusarya, kwa okubha ajeereri omubhiri na amanyinga ga Omukuru. 28 Kwa ego, kira omuntu yeeyikomye weeki omwene, nho arye omukaate na okunywera ekikombe. 29 Ndagamba ego, kwa okubha omuntu unú ararya omukaate na okunywera ekikombe bira okumanya obhumwi bhwaye na omubhiri gwa Omukuru, uyo arabha areetuura omwene mubhubhuturi bhwa ekiina bhwa Waryubha. 30 Kiyo nkyo ekisigo kinú kirakora gati yeenyu abhaaru m-banyooheeru na abharweri, kweki abhandi bhakwiri. 31 Nawe tukaabheeri tureeyikomya bheetu abheene, Waryubha atakaatubhuturiiri ekiina. 32 Nawe bhoono, hanú turabhuturirwa ekiina na Omukuru, hayo turabha tureehigiribhwa, naho Waryubha atariija okutubhuturira ekiina kya ego arabhabhuturira ekiina abhantu bhanú bhatamumanyiri weeki. 33 Kwa ego, abhahiiri bhaani kuimani, hanú mureekumanʼya okurya ebhyakurya bhya Omukuru, muganyiriranenga. 34 Nyoore omuntu yaana omweko, abhenga ararya iika owaaye, naho okwikumanʼya kwenyu kubhyakurya bhya Omukuru kutabhakora mubhuturirwe ekiina. Nawe, hanú ndiija, ndituura bhujomu amangʼana agandi ganú gatamiri.