Mutabha muramusarirya Waryubha
10
Abhahiiri bhaani kuimani, ndeenda mumanye ega, eribhaga rinú bhajaaji weetu bhaarwanga Misiri, bhonsego bhoorokereribhwanga na erisaaru,a kweki bhonsego bhaahita gatigati ya enyanja. 2 Eribhaga rinú bhoorokereribhwanga na erisaaru na okuhita gatigati ya enyanja, bhonsego bhakabha bhabhatiijiibhwe okubha abheehigira bha Musa.b 3 Bhonsego bhaarya ebhyakurya bhiryabhirya bhyarwanga murwire.c 4 Kweki bhonsego bhaanywa amanji garyagarya Waryubha yaabhahaana kwa enjira ya ekika, okurwa kwitare.d Eritare riyo ryaringa n-Kiristu. Weeki yaaringa arasoorana nabho hamwi. 5 Nawe, abhaaru gati yaabho, bhaaringa bharakora ganú gataamujomeranga Waryubha, kwa ego bhakasikibhwa na emibhiri gyabho gikanyaragana kukibhara.6 Mbe, amangʼana gayo gonsego m-birengekanʼyo kubheetu, naho tutabha na orunamba rwa amabhiibhi kya ego bheeki bhaaringa na orunamba rwa amabhiibhi. 7 Mutasyengera ebhisusano, kya ego abhandi gati yaabho bhaakoranga. Eguru yaabho engʼoorerwe mu Mangʼoore Amarabhu ega, “Abhantu bheekaranga okurya na okunywa, hanú bhaamaranga bhareemirira okubhina.”e 8 Kweki tutakora obhusimbe, kya ego abhandi gati yaabho bhaakoranga, okuhikira orusiku rumwi bhakasikibhwa abhantu ebhiku mirongo ebhiri na bhisatu (23,000).f 9 Kora tutamusakya Omukuru,g kya ego abhandi gati yaabho bhaamusakya, bhakarumwa na enjoka, bhakakwa.h 10 Kweki muteengʼeheerya kya ego abhandi gati yaabho bheengʼeheerya, bhakasikibhwa na maraika omusikya.i
11 Mbe, amangʼana gayo gonsego gaabhanyoora bhajaaji weetu, gaangʼoorwa naho gabhe ebhirengekanʼyo bhya okutukemera bheetu bhanú tureekara kuginsiku ginu gya obhuteero. 12 Kwa ego, unú areerora ega, yeemiriiri anagiri kuimani, yeeyangararire, naho atariija okugwa. 13 Amasakyo ganú gabhanyooreri, n-kya ganú abhantu abhandi bharanyoora. Nawe, Waryubha m-muheene, weeki ataabhatige musakibhwe okukira eginguru gyenyu. Hanú bheenyu murasakibhwa, Waryubha arabhahaana eginguru gya okwigumirirya na enjira ya okuhurukira.
Obhukemeri eguru ya eginyangi gya ebhisusano//na ebhyakurya bhya Omukuru
14 Kwa ego, abhahanje bhaani, mwiyangararire mutasyengera ebhisusano! 15 Ndahaira na bheenyu abhantu bha obhumanyi, mwiganirirye bheenyu abheene eguru ya ganú ndagamba. 16 Bhoono, hanú turamukumya Waryubha kurusumo rwa ekikombe kya enonkwe kirya turanywera, kwibhaga rya ebhyakurya bhya Omukuru, tutakubha tusangiri amanyinga ga Kiristu? Na hanú turasuunura omukaate, tutakubha tusangiri omubhiri gwa Kiristu? 17 Omukaate guyo turasanga bheetu bhonsego n-gumwi. Kwa ego, bheetu bhonsego m-mubhiri gumwi, onyoora turingi abhaaru.
18 Murore ekirengekanʼyo ku Bhaisiraeri. Bhonsego bhanú bharasanga hamwi okurya ebhimwenso bhinú bhimwenseerwe Waryubha, bharagwatana okumusyengera Waryubha.j 19 Bhoono ndeenda okugamba-ki? Ebhyakurya bhinú bhimwenseerwe ebhisusano bhiina obhwera bhobhonse? Kasi ebhisusano bhyonse n-kintu? 20 Tiigo-ha! Ndeenda okugamba ega, ebhimwenso bhinú bhararuusya abhantu bhanú bhatamumanyiri Waryubha, bhatakumuruusirya Waryubha, nawe bhararuusirya ebhihwi. Na oni ntakwenda bheenyu musange na ebhihwi. 21 Mutakwenderwa munywere ekikombe kya Omukuru, na ekya ebhihwi. Egoego mutakwenderwa okurya ebhyakurya bhya Omukuru, na ebhya ebhihwi. 22 Kasi, tureenda okumukora Omukuru abhe na erihari? Mureeganirirya ega, tuuna eginguru okumukira?
Abheekirirya bhakorenga amangʼana//ganú garamutogoonʼya Waryubha
23 Abhantu abhandi gati yeenyu bharagamba ega, “Ebhintu bhyonsego bhiikiririibhwe.” Nawe, oni ndagamba ega, bhitaringi bhyonsego bhinú bhiina obhwera kubheetu. Kweki bharagamba ega, “Ebhintu bhyonsego bhiikiririibhwe.” Nawe oni ndagamba ega, bhitaringi bhyonsego bhinú bhirakora eimani enage. 24 Omuntu atatuna ganú garamubheera weeki omwenego, nawe atune ganú garabheera abharikyaye.
25 Muryenga enyama yoyonse inú eraguribhwa kumudiira, mutabhuuririrya bhuuririrya, kurusumo rwa ameetegeerero geenyu, 26 kwa okubha Amangʼoore Amarabhu garagamba ega, “Ekyaro na ebhintu bhyonsego bhinú bhirimo m-bya Omukuru Waryubha.”k
27 Nyoore omuntu unú ataringi omwikirirya araabhagenihye okurya, na nyoore mureekirirye okugya, murye enyama yoyonse inú abhaseemeerye, mutabhuuririrya bhuuririrya, kurusumo rwa ameetegeerero geenyu. 28 Nawe, nyoore omuntu araabhakeerye ega, “Ebhyakurya bhinu bhimwenseerwe ebhisusano,” mutarya ebhyakurya bhiyo, kurusumo rwa omuntu unú abhakeererye, kweki kurusumo rwa enyanko ya ameetegeerero. 29 Hanú ndagamba ega, “Kurusumo rwa enyanko ya ameetegeerero,” ntakugamba eguru ya ameetegeerero geenyu, nawe, ndagamba eguru ya ameetegeerero ga omuntu unú abhakeererye. Bhoono, omuntu aratura okubhuurya ega, “Kwaki enyanko ya ameetegeerero ga omuntu oundi, eribhire okwiyagaara kwani? 30 Nyoore oni ndarya ebhyakurya bhiyo kwa okumukumya Waryubha, kwaki ntukwe kwa ekisigo kya ebhyakurya bhinú mmukumirye Waryubha?”
31 Mbe bhoono, kyokyonse kinú murakora, ebhe okurya, ebhe okunywa, kasi ekintu ekindi, mukikore naho Waryubha agungibhwe. 32 Mutabhahabhya Abhayahudi, abhantu bhanú bhataringi Abhayahudi, na kora erikanisa rya Waryubha. 33 Mubhe kya ego oni ndingi. Ndeekongʼererya okubhangʼarira abhantu bhonsego, kumangʼana gonsego ganú ndakora. Etaringi ega, ndakora ego, kurusumo rwa obhwera bhwani omwene, nawe ndakora ego, kurusumo rwa obhwera bhwa abhantu abhaaru, naho bheeki bhatuuribhwe.