Abhakori bha emirimu bhareenderwa bhahaanwe-ko ebhintu
9
Bhoono, oni ntakwiyagaara? Oni ntaringi omutumwa? Oni ntaamurora Omukuru weetu Yeesu? Emirimu ginú oni naakora tigyo gyakora bheenyu mumwikirirye Omukuru? 2 Kora nyoore abhantu abhandi bhararora ega, oni ntaringi omutumwa, nawe, kubheenyu oni m-mutumwa, kwa okubha eimani yeenyu ku Kiristu n-dubhaaso rwa okoorokya ega, oni naatumwa na Omukuru.3 Abhantu bhanú bharanhakaanʼya oni ega, ntaringi omutumwa, ndabhakeerya ega, 4 bheetu tutakwenderwa okuhaanwa ebhyakurya na ebhya okunywa kurusumo rwa emirimu gyetu gya obhutumwa? 5 Bhoono, mureeganirirya ega, bheetu tutakwikiriribhwa okugya na abhakari abheekirirya, kurugendo rwa okuraarika amangʼana eguru ya Kiristu, kya ego abhatumwa abhandi, na abhamura bhaabho Omukuru Yeesu bharagenda nabho, na kora Kefa? 6 Kasi nooni na Bharinabha abheenego mbo tureenderwa okukora emirimu, naho tunyoore ebhintu kurusumo rwa obhuhoru bhwetu? 7 M-musirikare-ki unú aragya mwiihe kwa okwiriha omwene? M-murimi-ki unú arahamba emijabhibhu mumugunda gwaye atige okurya emisumo gyendeko? Kasi m-muriisya-ki unú arariisya egintugo atige okunywa amabheere ga egintugo giyo?
8 Amangʼana ganú ndagamba, gataringi ameetegeerero ga abhantu, kora amaragiriryo ga Musaa gonse, garagamba egoego. 9 Mumaragiriryo ga Musa engʼoorerwe ega, “Hanú engʼombe erahuura obhuro, otaibhoha omunwa.”b Bhoono, nko okugamba ega, Waryubha areeganirirya eguru ya egingʼombe? 10 Kasi aragamba amangʼana gayo kurusumo rwetu? Niigo eringi! Amangʼoore gayo gaangʼoorwa kurusumo rwetu, kwa okubha omurimi wa obhuro, na omugesi wa obhuro, kira oumwi areenderwa okwisiga ega, arinyoora omugabho gwaye. 11 Bheetu twabharaarikira amangʼana eguru ya Kiristu, kya omuntu unú arahamba egimbusuro. Bhoono, ni-ringʼana erikongʼu kubheenyu okutuhaana ebhintu bhya okurya na okunywa, naho tunyoore obhwera, kya omuntu unú aragesa? 12 Nyoore abhandi bhareenderwa okuhaanwa ebhintu kya bhiyo okurwa kubheenyu, bhoono bheetu, tutakwenderwa bhukongʼu okuhaanwa okukira bhayo?
Nawe, bheetu tutaabhatonga ganú tureenderwa okuhaanwa na bheenyu. Twigumiriirye kugonsego, naho tutabharibhira abhantu okwikirirya Amangʼana Amajomu eguru ya Kiristu. 13 Bhoono, mutamanyiri ega, bhanú bharakora emirimu mwisyengerero erikuru rya Waryubha,c bharanyoora ebhyakurya bhyabho okurwa mwisyengerero muyo? Kweki mutamanyiri ega, bhanú bharakora emirimu ahasi ha okumwensera, bhonse bharanyoora omugabho gwabho, okurwa kubhinú bhiraruusibhwa ekimwenso? 14 Omukuru Yeesu wonse yaaragirirya egoego, ega, bhanú bhararaarika Amangʼana Amajomu, bhabhenga bharanyoora ebhintu okurekana na emirimu giyo.
15 Nawe oni, ntaakabhatongeri kora ekimwi kubhinú ndeenderwa okuhaanwa. Kweki ntakungʼoora ego, naho nhaanwe bhiyo. Kuoni nyakara okukwa, okukira okubheerwa ebhintu okurwa kubheenyu, kwa okubha ntakwenda omuntu wowonse yaandibhire okwigungya kurusumo rwa okuraarika Amangʼana Amajomu, kwa enjira ya okungʼaana ebhintu. 16 Oni ntakwenderwa okwigungya kwa ekisigo kya okuraarika Amangʼana Amajomu, kwa okubha emirimu ginu, ngyo naakomereribhwa okukora. Kweki ndikirora-ko, nyoore ntaaraarike Amangʼana Amajomu gayo. 17 Nyoore nkaabheeri nsoreri emirimu ginu kwa obhwendi bhwani omwene, nkaaganyiriranga omutuho, nawe bhoono, ndeenderwa okugikora kwa okubha Waryubha yangʼeeri emirimu ginu, kwa obhwendi bhwaye. 18 Bhoono, omutuho gwani n-guha? Omutuho gwani n-kuraarika Amangʼana Amajomu bira amariho, bira okutonga ebhintu bhinú ndeenderwa okuhaanwa kurusumo rwa okugaraarika.
Amangʼana ganú abhatumwa bhareenderwa okukora
19 Oni ntaringi omugaya wa omuntu wowonse, ndeeyagaara. Nawe, niikoreri okubha omugaya wa abhantu bhonsego, naho okubhabheera abhantu abhaaru bhamwikirirye Kiristu. 20 Ku Bhayahudi, neekora kya Omuyahudi, naho okubhabheera bhamwikirirye Kiristu. Oni omwene ntaringi insi wa amaragiriryo ga Musa, nawe, neetuura insi wa amaragiriryo gayo, naho bhanú bharingi insi wa amaragiriryo bhamwikirirye Kiristu. 21 Kubhanú bhataana amaragiriryo, nonse neekora ntaana amaragiriryo, naho okubhabheera bhamwikirirye Kiristu. Etaringi ega, ntaana amaragiriryo embere ya Waryubha, nawe niinago kwa okubha ndatungwa na amaragiriryo ga Kiristu. 22 Na kubhanú bhataranaga kuimani, nonse neekora muna ntaranaga kuimani, naho okubhabheera bhamwikirirye Kiristu. Naakora gonsego kubhantu bhonsego, naho kwa enjira yoyonse irya, nture okutuurya abhantu abhandi gati yaabho. 23 Ndakora gayo gonsego kurusumo rwa Amangʼana Amajomu, naho nsange hamwi na abhandi kunonkwe inú erarekana na Amangʼana Amajomu gayo.
24 Bhoono mutamanyiri ega, abhantu bhanú bharasongana okukenya, bharakenya bhonsego, nawe, unú aranyoora omutuho ngʼ-umwi ego? Mbe, mubhenga murakenya bhukongʼu, naho munyoore omutuho. 25 Bhanú bharasongana kumihooyo, bhareeribhira amangʼana amaaru, naho bhanyoore omutuho gwa eribhaga ekego. Nawe bheetu turakora ego, naho tunyoore omutuho gunú guraguma koko. 26 Kora oni nonse, ntakukenya kya omuntu unú atakwenda obhuhigi. Kweki egoego ntakurwana kya omuntu unú ararekera eginkundi bhusa. 27 Nawe, ndanyankya omubhiri gwani, na okugunarya okwigumirirya, naho hanú ndimara okuraarikira abhantu Amangʼana Amajomu, oni omwene ntariija okwangwa embere ya Waryubha.