Ebhyakurya bhinú bhimwenseerwe ebhisusano
8
Bhoono ndagamba eguru ya ebhyakurya bhinú bhimwenseerwe ebhisusano.a Tumanyiri ega, “Bheetu bhonsego tuuna obhumanyi,” kya ego bheenyu muragamba. Nawe, obhumanyi bhurakora abhantu bheeheeme. Na obhuhanje bhurakora abhantu bhanage kuimani. 2 Nyoore omuntu areerora ega, amanyiri eringʼana nyabhurebhe, uyo oranyoora ataramanya kya ego areenderwa okumanya. 3 Nawe, omuntu unú aramuhanja Waryubha, uyo ngʼo aramanyikana ku Waryubha.4 Bhoono, eguru ya okurya ebhyakurya bhinú bhimwenseerwe ebhisusano, tumanyiri ega, ebhisusano bhinú bhirasyengerwa, bhitaringi ekintu mukyaro munu. Kweki tumanyiri ega, ariho Waryubha oumwi omwenego. 5 Maheene abhantu abhandi bhareeganirirya ega, bhariho abhakuru murwire na mukyaro. Kweki bhiriho ebhintu ebhyaru bhinú abhantu bharabhibhirikira ega, abhakuru kasi abhatungi. 6 Nawe, kubheetu, ariho Waryubha umwi omwenego, ngʼo Taata, ngʼo yaabhumba ebhintu bhyonsego. Bheetu tureekara kurusumo rwaye. Kweki ariho Omukuru umwi ego, ngʼo Yeesu Kiristu, na ebhintu bhyonsego bhyabhumbwa okuhitira kuweeki, kweki turingi abhahoru okurekana na weeki.
7 Nawe, etaringi ega, abhantu bhonsego bhaana obhumanyi bhuyo, kwa okubha bhariho abhantu abhandi bhanú bhaaringa na egimiira gya okubhisyengera ebhisusano. Kora bhoono, hanú bhararya ebhyakurya bhinú bhimwenseerwe ebhisusano, ebhyakurya bhiyo bhirabhahiitukya ebhisusano. Hayo bhareerora mumeetegeerero ega, bharakora obhusarya, kwa okubha bhataranaga kuimani. 8 Bhoono, ebhyakurya bhitakututuura tubhe haangʼi na Waryubha, kwa okubha tukaatiga okurya, tutakusuuhirwa ekintu, kweki kora tukaarya, tutakoongeribhwa ekintu.
9 Nawe, mwiyangararire, obhwiyagaari bhwenyu bhutabha bhurabhagwisya bhanú bhataranaga kuimani. 10 Ndagamba ego, kwa okubha omuntu unú ataranaga kuimani, hanú araakurore uuwe unú omanyiri ega, ebhisusano bhitaana obhuhoru, orarya ebhyakurya mwisyengerero rya ebhisusano, ateeganirirye mumeetegeerero ega, wonse areenderwa okurya ebhyakurya bhinú bhimwenseerwe ebhisusano? 11 Kwa enjira iyo, omwikirirya omurikyaho uyo, ataranaga kuimani, unú Kiristu yaamukwira, arabhura okurekana na obhumanyi bhwaho.
12 Ego, nyoore muraabhasarirye abheekirirya abharikyenyu bhanú bhataranaga kuimani, bhakore obhusarya, na okubhanyahaara ameetegeerero gaabho, hayo muribha mumusariirye Kiristu omwene. 13 Kwa ego, nyoore ebhyakurya bhinú ndarya, bhiramukora omwikirirya omurikyani akore obhusarya, mbe, ntakyarya kweki ebhyakurya bhya ekabhira iyo, naho ntariija okukora omwikirirya omurikyani akore obhusarya.