Obhutongeri eguru ya obhutetani
7
Bhoono, ndagamba eguru ya amangʼana ganú mwanngʼoorera. Muragamba ega, “M-bujomu omusaaja atakora ameega na omukari.”a 2 Nawe, kwa ekisigo kya amasakyo ga okukora obhusimbe, kira omusaaja abhe na omukari waaye omwene, na kira omukari abhe na omusaaja waaye omwene. 3 Omusaaja abhenga aramukorera omukari waaye kya ego ereenderwa, omukari wonse abhenga aramukorera omusaaja waaye kya ego ereenderwa. 4 Omukari ataana obhwamuri eguru ya omubhiri gwaye, nawe omusaaja waaye ngʼo yaana obhwamuri. Omusaaja wonse ataana obhwamuri eguru ya omubhiri gwaye, nawe omukari waaye ngʼo yaana obhwamuri. 5 Muteemana, nawe nyoore mureekiriranʼye okutigana kwa eribhaga ekego, naho munyoore omweya gwa okumusabha Waryubha. Mumare muhindirane kweki, naho Erisambwa ritariija okubhasakya okukora obhusimbe kwa okubha mutakutura okwigumirirya.6 Amangʼana eguru ya okutigana kwa eribhaga ekego, m-butongeri, gataringi ga okubhabhandirirya. 7 Bhoono, oni nkaahanjiri abhantu bhonsego bhabhe kya ego ndingi,b nawe etaringi ego, kwa okubha kira omuntu Waryubha amuheeri ekibharo kyaye, oundi kinu, oundi kirya.
8 Nawe, ndabhakeerya ega, gati yeenyu bhanú bhatarateta na abhasino, m-bujomu bhagendererye okwikara abheene, bhatateta kasi okutetwa, kya ego oni ndingi. 9 Nyoore bhatakunagya okwiribhira, m-bujomu bhatete kasi okutetwa, kwa okubha nyakara okukora ego, okukira okubha na orunamba orubhiibhi rwa omubhiri.
10 Kubhanú bhaamara okutetana, ndabhahaana eriragiriryo. Eriragiriryo riyo ritaringi ryani, nawe rirwiri ku Mukuru Yeesu, ega, omukari atatigana na omusaaja waaye.c 11 Nawe, nyoore araatigane nawe, atatetwa na omusaaja oundi, nyoore tiigo, yeegwane na omusaaja waaye na okuhindirana. Omusaaja wonse, atamutiga omukari waaye.
12 Bhoono, ndagamba na abheekirirya abhandi. Amangʼana ganú ndabhakeerya m-meetegeerero gaani, gataringi amaragiriryo ga Omukuru Yeesu. Nyoore omusaaja omwikirirya ateteri omukari unú ataringi omwikirirya, na omukari uyo yeekirirye okugendererya okwikarana nawe, atamutiga. 13 Egoego, omukari omwikirirya, nyoore ateterwe na omusaaja unú ataringi omwikirirya, na omusaaja uyo yeekirirye okugendererya okwikarana nawe, atamutiga. 14 Ndagamba ego, kwa okubha Waryubha aramuraama omusaaja unú ataringi omwikirirya, okuhitira kumukari waaye. Na omukari unú ataringi omwikirirya wonse, Waryubha aramuraama okuhitira kumusaaja waaye. Nyoore etakaabheeri ego, abhaana bheenyu bhatakaabheeri abhaana bha Waryubha, nawe bhoono m-baana bha Waryubha.
15 Nawe, nyoore unú ataringi omwikirirya areenda okutigana na omurikyaye omwikirirya, mutige agye. Hayo omwikirirya uyo, atakubhohwa na obhutetani bhuyo. Nawe Waryubha atubhirikiiri, naho twikare kwa omurembe.d 16 Uuwe omukari omwikirirya, otakutura okumanya! Hamwi omusaaja waaho aratura okubha omwikirirya okuhitira kuimani yaaho. Na uuwe omusaaja omwikirirya, otakutura okumanya! Hamwi omukari waaho aratura okubha omwikirirya okuhitira kuimani yaaho.
Okwikara kya ego waaringa eribhaga waabhirikirwa na Waryubha
17 Kira omuntu yeekare kya ego Omukuru yaamutuura okubha, na agendererye okubha kya ego yaaringa hanú Waryubha yaamubhirikira. Ego niigo ndaragirirya mumakanisa gonsego. 18 Nyoore omuntu yaabhirikirwa na Waryubha, eribhaga amariri okusaarwa, ateekorya ega, atarasaarwa. Kweki, nyoore omuntu yaabhirikirwa na Waryubha, eribhaga atarasaarwa, uyo atasaarwa. 19 Okusaarwa kutaana obhwera na okwanga okusaarwa kutaana obhwera. Kinú kiina obhwera n-kugwata amaragiriryo ga Waryubha.
20 Bhoono, kira omuntu agendererye okubha kya ego yaaringa hanú Waryubha yaamubhirikira. 21 Nyoore Waryubha yaakubhirikira eribhaga waaringa omugaya, riyo ritakutunʼya. Nawe oraanyoore omweya gwa okwiyagaara, otumire omweya guyo. 22 Ngambiri ega, riyo ritakutunʼya, kwa okubha omuntu unú yaaringa omugaya eribhaga rinú yaabhirikirwa na Omukuru, uyo areeyagaara, embere ya Omukuru. Na unú yaaringa areeyagaara eribhaga rinú yaabhirikirwa, uyo m-mugaya wa Kiristu. 23 Mwatunguribhwa kwa obhuguri obhunene bhukongʼu. Ego, mutabha abhagaya bha abhantu. 24 Abhahiiri bhaani kuimani, kira omuntu agendererye okubha embere ya Waryubha kya ego yaaringa hanú Waryubha yaamubhirikira.
Obhutongeri kubhanú bhataratetwa, na abhasino
25 Bhoono, kubhahara bhanú bhataratetwa,e ntaana amaragiriryo eguru yaabho, okurwa ku Mukuru Yeesu. Nawe, ndabhatongera kwa ameetegeerero gaani, oni unú ndeekiriribhwa kwa ekisigo kya ekyabhira kya Waryubha. 26 Mbe, okurekana na enyanko inú eriho, ndamanya ekaabheeri bhujomu omuntu atame kya ego aringi. 27 Nyoore waateta, oteenda okutigana na mukaaho. Nyoore otarateta, otatuna omukari. 28 Nawe, nyoore oraatete, otaabhe okoreri obhusarya. Na omuhara wonse, nyoore araatetwe, ataabhe akoreri obhusarya. Nawe, bhanú bhateteeni bharinyoora enyanko mukyaro. Na oni nkeenderi enyanko iyo, etariija okubhanyoora.
29 Abhahiiri bhaani kuimani, ndeenda okugamba ega, eribhaga rinú ryatamiri Kiristu ahunjuke, ni-kego. Mbe, okurwa bhoono, bhanú bhaana abhakari bhatige okwiganirirya abhakari bhaabho abheenego, naho bhakore emirimu gya Omukuru. 30 Na bhanú bharakuura, bhanú bharajomerwa, bhanú bharagura ebhintu, 31 na bhanú bharatunibhwa na obhuhoru bhwa mukyaro kinu, bhayo bhonsego bhatanyanka bhukongʼu na amangʼana gayo. Bhareenderwa bhakore emirimu gya Omukuru, kwa okubha ekyaro kinu kya ego turakimaaha kirahita.
32 Ndeenda muteeganirirya okukira hayo, eguru ya obhuhoru bhwa mukyaro kinu. Omuntu unú atateteri, oranyoora yeeruusirye okukora emirimu gya Omukuru, areeganirirya kya ego araamusambaarukye Omukuru. 33 Nawe, omuntu unú ateteri, oranyoora yeeruusirye okukora ga obhuhoru bhwa mukyaro kinu, areeganirirya kya ego araamujomerye omukari waaye, 34 ameetegeerero gaaye garibha mbaara ebhiri. Omukari kasi omuhara unú atateterwe, oranyoora yeeruusirye okukora emirimu gya Omukuru, ature okwiruusya kwa omubhiri na omutima ku Mukuru. Nawe omukari unú ateterwe, oranyoora yeeruusirye okukora ga obhuhoru bhwa mukyaro kinu, areeganirirya kya ego araamujomerye omusaaja waaye. 35 Ndagamba amangʼana gayo, kwa obhwera bhwenyu abheene, etaringi ega, ndeenda okubharibhira. Ndeenda ega, mubhenga mureekara kya ego ereenderwa, mumukorerenga Omukuru emirimu, kwa emitima gyenyu gyonsego.
36 Nawe, omuntu wowonse unú araarore ega, etaringi bhujomu okutiga okumuteta omuhara unú amurombeeri obhuko, kweki eribhaga rya obhuhara bhwaye erya okutetwa ryahwa,f na omuntu uyo ararora ega, ereenderwa bhatetane, akore kya ego areenda, bhatetane. Hayo aribha atakoreri obhusarya. 37 Na nyoore omuntu araamure okurwa mumutima gwaye omwene ega atakuteta, na kitariho ekintu kinú kiramubhandirirya okuteta, kweki aratura okwiribhira enamba yaaye, na yaamure ega, atakumuteta omuhara uyo, aribha akoreri bhwaheene. 38 Kwa ego, unú araamura okuteta omuhara unú arombeeri obhuko, arakora bhujomu, na unú aratiga okumuteta arakora bhujomu bhukongʼu.g
39 Omukari unú ateterwe, arabhohwa na obhutetwa eribhaga ryonsego rya obhuhoru bhwa omusaaja waaye. Nyoore omusaaja waaye akwiri, hayo arabha na obhwiyagaari, bhwa okutetwa na omusaaja wowonse unú areende, nawe omusaaja uyo, abhe omwikirirya wa Omukuru. 40 Nawe, nyakara omusino uyo, atakaateterwe. Ego niigo oni ndarora, na ndeeganirirya ega, kora oni nonse ndoorokereribhwa na Omutima wa Waryubha okugamba amangʼana gayo.