Okujongerana gati ya abheekirirya
6
Nyoore oumwi gati weenyu yaana eritoongʼana na omwikirirya omurikyaye, kwaki abhe na obhuhaari bhwa okumujongera kubhantu bhanú bhataringi abheekirirya? N-kwaki atige okumuhira kubhantu bha Waryubha? 2 Mutamanyiri ega, abhantu bha Waryubha bharibhuturira ekiina ekyaro kinu kyonsego? Na nyoore ekyaro kinu kiribhuturirwa ekiina na bheenyu, kwaki mutamwe okubhutura ekiina kya amangʼana amake gati yeenyu? 3 Mutamanyiri ega, turibhabhuturira ekiina kora bhamaraika? Nyoore niigo, mbe, mureenderwa okubhutura ekiina kya amangʼana ga obhuhoru bhwa kira orusiku. 4 Bhoono, hanú mutoongʼeeni abheene kwa abheene, eguru ya amangʼana ga obhuhoru bhwa kira orusiku, kwaki murahira obhujongeri bhwenyu kubhabhuturi bha ekiina bhanú bhataringi abheekirirya kora bhatakusuukwa na erikanisa? 5 Ndagamba ego, naho murore eginsoni. Bhoono, gati weenyu atariho kora omuntu oumwi unú yaana egintungwa, unú aratura okubhutura ekiina kyenyu? 6 Nawe, bheenyu muuna enteemo ya omuntu okumujongera omwikirirya omurikyaye mwibharaja, kweki kubhantu bhanú bhataringi abheekirirya!7 Okujongerana kuyo, kuroorokya ega, mutamirwe kimwi. Ekaabheeri bhujomu bhukongʼu, okutiga omuntu akuraarire kasi akuruusye ebhintu bhyaho. 8 Nawe bhoono, bheenyu mbo muraraarira abhantu na okubharuusya ebhintu bhyabho. Murakorera kora abheekirirya abharikyenyu. 9 Kasi mutamanyiri ega, abhakori bha amabhiibhi bhatarisoha mubhukama bhwa Waryubha? Mutangʼeenwa! Abhasimbe, abhantu bhanú bharasyengera ebhisusano, abhasuunu, abhasaaja bhanú bharakora ameega na abhasaaja abharikyabho, 10 abheebhi, abha orunamba rwa ebhintu, abhareebhi, abhagambi bha abhandi, na bhanú bhararuusya abhantu ebhintu bhyabho kwa eginguru, bhayo bhonsego bhatarisoha mubhukama bhwa Waryubha. 11 Abhandi gati weenyu mwaringa na eginteemo kya giyo. Nawe bhoono, kwa okuhitira ku Mukuru weetu Yeesu Kiristu, na kwa eginguru gya Omutima wa Waryubha weetu, moogiibhwe obhubhiibhi bhwenyu, musorerwe okubha abhantu bha Waryubha, na okubharwa ega, muringi abhaheene embere ya yaaye.
Abheekirirya bhatige kimwi obhusimbe
12 Abhantu abhandi gati yeenyu bharagamba ega, “Tureekiriribhwa okukora ebhintu bhyonsego bhinú tureenda.” Nawe, oni ndagamba ega, bhitaringi bhyonsego bhinú bhiina obhwera kubheetu. Onyoora muragamba ega, “Tureekiriribhwa okukora ebhintu bhyonsego bhinú tureenda,” nawe, oni ntakubha omugaya wa ekintu kyokyonse. 13 Abhandi gati yeenyu bharagamba ega, “Hanú tuuna omweko tureenderwa okurya, kwa okubha emibhiri gyetu gireenda ebhyakurya.” Niigo eringi, nawe, riraaja eribhaga rinú Waryubha arihunjura emibhiri gyetu gibhe gitakwenda ebhyakurya. Mutagamba ega, tureenderwa okukora obhusimbe, kya ego tureenderwa okurya ebhyakurya hanú tuuna omweko. Ndagamba ego, kwa okubha Waryubha ataabhumba emibhiri gyetu kurusumo rwa obhusimbe, nawe yaagibhumba kurusumo rwa okumukorera emirimu Omukuru, na Omukuru wonse aragituga bhwaheene. 14 Kweki Waryubha arituhyukya bheetu kwa obhuturo bhwaye, kya ego yaamuhyukya Omukuru Yeesu okurwa muruku.
15 Bhoono, mutamanyiri ega, emibhiri gyenyu, m-biroobhero bhya Kiristu? Bhoono, muratura okugwatanʼya ebhiroobhero bhya Kiristu na emibhiri gya abhasimbe? Tiigo-ha kora hake! 16 Mutamanyiri ega, omuntu wowonse unú aragwatana na omusimbe, arabha omubhiri gumwi nawe? Kwa okubha engʼoorerwe mu Mangʼoore Amarabhu ega, “Abhabhiri bhayo, bharibha omubhiri gumwi.”a 17 Nawe, omuntu wowonse unú aragwatana na Omukuru Yeesu Kiristu, arabha omutima gumwi na weeki.
18 Mwiyangararire mutakora obhusimbe. Obhusarya obhundi bhonsego, omuntu arakora kibhara ya omubhiri gwaye, nawe, omuntu unú arataara kibhara, uyo aragukorera obhusarya omubhiri gwaye omwenego. 19 Mutamanyiri ega, emibhiri gyenyu ni-risyengerero rya Omutima Omurabhu, unú Waryubha yaabhahaana, kweki ega, Omutima Omurabhu areekara munsi weenyu? Bhoono emibhiri giyo gitaringi gyenyu, nawe, n-gya Waryubha, 20 kwa okubha mwatunguribhwa kwa obhuguri obhunene bhukongʼu. Bhoono mbe, mumugungye Waryubha mumibhiri gyenyu.