Obhusimbe bhutakwenderwa mwikanisa
5
Maheene amangʼana ganyarageeni ega, gati yeenyu bhurimo obhusimbe. Obhusimbe kya bhuyo, bhutaakeebhukiri kora kubhantu bhanú bhatamumanyiri Waryubha, obhusimbe bhwa omuntu okutaara na omukari wa esewaabho. 2 Nawe, bheenyu mureeheema! Kora mutakusurumbara, na okumwahura omuntu unú arakora ego, arwe gati yeenyu. 3 Onyoora oni ndingi ahare na bheenyu, nawe omutima gwani guringi hamwi na bheenyu. Mbe bhoono, mmariri okumubhuturira ekiina omuntu uyo, kya ego nkaakoreri hanú nkaabheeri eyo. 4 Eribhaga mureekumanʼya kuriina rya Omukuru weetu Yeesu, oni nonse ndabha hamwi na bheenyu kwa omutima, na obhuturo bhwa Omukuru weetu Yeesu bhonse, bhurabha hamwi na bheenyu. 5 Hayo mumugwatye omuntu uyo mubhutungi bhwa Erisambwa,a naho enteemo yaaye ya obhusarya esikibhwe, nawe, weeki omwene atuuribhwe orusiku rwa okuhunjuka kwa Omukuru Yeesu.6 Okwigungya kwenyu kutakwenderwa. Mutamanyiri ega, ekimera ekikego, kirabhimbya eriguma erigima? 7 Ego, mubhenga mureeraama, kwa enjira ya okwahura omuntu omusarya uyo okurwa kubheenyu, kya okuruusya ekimera kya akare. Hayo muribha abhantu bhanú mutaana amasoro, kya eriguma erihya rinú ritaana ekimera. Na ego niigo mwamariri okubha, kwa okubha Kiristu, Omwana wa Eringʼondi weetu wa Epasaka,b yaamara okuruusibhwa okubha ekimwenso, naho atutuurye. 8 Bhoono, tutakora Epasaka kwa ekimera kya akare, yaani kwa obhubhiibhi na obhusarya, nawe tuikore kwa emikaate ginú gitakutuurwa-mo ekimera,c yaani kwa omutima omujomu na kwa obhuheene.
9 Munyarubha inú naabhangʼoorera, naabhakeerya ega, mutagwatana na abhasimbe. 10 Ensonga yaani etaaringa ega, mutagwatana kora hake na abhasimbe bha mukyaro kinu, kasi abha orunamba rwa ebhintu, na bhanú bhararuusya abhantu ebhintu bhyabho kwa eginguru, kora bhanú bharasyengera ebhisusano, kwa okubha riyo rikaabhakoreri murwe mukyaro munu. 11 Nawe naabhangʼoorera ega, mutagwatana na abhantu bhanú bhareebhirikira abheekirirya abharikyenyu, enu bharingi abhasimbe, abhantu bha orunamba rwa ebhintu, abhantu bhanú bharasyengera ebhisusano, abhagambi bha abhandi, abhareebhi na bhanú bhararuusya abhantu ebhintu bhyabho kwa eginguru. Abhantu kya bhayo, kora mutige okurya nabho.
12-13 Mbe bhoono, etakuntunʼya okubhuturira ekiina abhantu bhanú bhataringi abheekirirya. Bhayo, Waryubha omwene ngʼo aribhabhuturira ekiina. Nawe bheenyu mureenderwa okubhuturira ekiina bhanú bharingi mwikanisa, kya ego yaangʼoorwa mu Mangʼoore Amarabhu ega, “Omuntu omusarya gati weenyu mumukenyie.”d