Emirimu gya abhatumwa
4
Kwa ego, abhantu bhatubhare ega, bheetu m-bakori bha emirimu bha Kiristu, tuheerwe emirimu gya okuraarika amangʼana ga Waryubha ganú gaaringa geebhisiri. 2 Bhoono, omuntu unú aheerwe emirimu, areenderwa abhe omuheene. 3 Nawe kuoni, ntakurora ega, n-kintu nkaajongerwa na bheenyu, kora nkaabhuturirwa ekiina na eribharaja. Nawe oni omwene ntakwijongera, 4 kwa okubha ntakunyahaarika na ryoryonse mumutima gwani. Nawe, riyo ritakunkora mbe ntaana amasoro. Omukuru Yeesu ngʼo arambuturira ekiina. 5 Mbe bhoono, mutabhuturira ekiina abhantu eribhaga ryabho ritarahika, muganye okuhikira orusiku runú Omukuru ariija. Weeki ngʼo aritubhura ebhintu bhyonsego bhinú bhibhisirwe mukisunte na okoorokya ganú garingi mumitima gya abhantu. Nho kira omuntu arinyoora eginkuma gyaye ginú areenderwa, okurwa ku Waryubha.6 Abhahiiri bhaani kuimani, ngambiri amangʼana gayo gonsego, eguru yaani na Apooro, naho tubhe ekirengekanʼyo kurusumo rwenyu. Okurekana na ekirengekanʼyo kiyo, mugwate ganú garagambwa mungamba inu, “Mutatuuma ganú gaangʼoorwa mu Mangʼoore Amarabhu.” Kwa okukora ego, ataabhe-ho omuntu wowonse unú areeheemere omuntu oumwi na okumujeera oundi. 7 Bhoono, niwi unú yaabhakora bheenyu okubha abha eguru okukira abhandi? N-kintu-ki kinú muunakyo kinú mutaahaanwa na Waryubha? Nyoore mwahaanwa, kwaki mureegungya muna mutaahaanwa?
8 Bhoono, mureerora mwigutiri! Mureerora muringi abhaniibhi! Mureerora muringi abhakama bira bheetu! Nyakara nyoore mukaabheeri abhakama heene, naho bheetu, tutunge hamwi na bheenyu! 9 Nawe, ndeeganirirya ega, Waryubha yaatukora bheetu abhatumwa okubha abhantu bha okujeerwa okukira bhonsego. Turingi kya abhantu bhanú bhaabhuturiirwe ekiina okwitwa. Tukorerwe okubha abhantu bha okusekwa mukyaro, kubhamaraikaa na kubhantu. 10 Bheetu turamaahikana ega, turingi abhakangi, kwa okubha turakora emirimu gya Kiristu, nawe bheenyu mureerora ega, muringi abha egintungwa kwa okubha murasoorana Kiristu. Bheetu turamaahikana ega, turingi abhanyooheeru, nawe bheenyu mureerora ega, muuna eginguru. Bheetu turajeerwa, nawe bheenyu mureerora ega, muringi abhasuukwa. 11 Kora bhoonwego tuuna omweko na enyonta, kweki tutaana emyenda, turatemwa, kora tutaana aha okwikara. 12 Turanyanka enu turakora emirimu kwa amabhoko geetu abheene. Hanú abhantu bharatutuka, bheetu turabhanonka. Hanú abhantu bharatunyankya, tureegumirirya. 13 Hanú bharatuhaamirirya amabhiibhi, bheetu turabhakyukya bhujomu. Tukorerwe muna obhunyanku bhwa ekyaro okuhikira bhoonwego, kweki tutakwenderwa kuryoryonse.
14 Ntakubhangʼoorera amangʼana gayo, naho mumaahe eginsoni, nawe ndeenda okubhakemera kya abhaana bhaani abhahanje, 15 kwa okubha onyoora muuna abhantu muna ebhiku ekumi bhanú bharabheehigirya eguru ya Kiristu, nawe eseweenyu ngʼ-umwi. Oni nooni naabheebhura ku Kiristu Yeesu, kwa okubharaarikira Amangʼana Amajomu. 16 Bhoono, ndabhakomererya ega, mubhenga murakora kya ego oni ndakora. 17 Kiyo nkyo kikoreri mmutumiri Timoteo, omwana waani omuhanje kuimani. Weeki m-muheene kumirimu gya Omukuru. Mmutumiri naho abhenga arabhahiitukya ganú oni ndagwata kubhuhoru bhwani na Kiristu, ganú ndeehigirya abhantu kira ahasi mumakanisa gonsego.
18 Bhoono, abhandi gati yeenyu, bhareeheema, kwa okubha bhareeganirirya ega, ntakyaaja kweki kubheenyu eyo. 19 Nawe, Omukuru Yeesu akaahanja, ndaaje kubheenyu eyo bhwangu hanu. Hayo nho ndimanya amangʼana ganú bharagamba abhantu bhanú bhareeheema. Na etaringi okumanya amangʼana gayo ageenego, nawe kora okumanya eginguru gyabho gya eimani. 20 Ndagamba ego, kwa okubha obhukama bhwa Waryubha,b bhutakumaahikana kwa amangʼana ageenego, nawe ekinene kwa eginguru gya eimani. 21 Bhoono, bheenyu mureenda egaki? Niije kubheenyu eyo na engʼimbo? Kasi niije kwa obhuhanje na obhunyoohu?