Obhumwi kumirimu gya Waryubha
3
Abhahiiri bhaani kuimani, hanú naaringa kubheenyu, ntaaringa ndagamba na bheenyu kya abhantu bhanú bharoorokereribhwa na Omutima Omurabhu. Nawe, naaringa ndagamba na bheenyu kya abhantu bhanú bharoorokereribhwa na amangʼana ga ekyaro, kweki kya abhaana abharera kukumwikirirya Kiristu. 2 Abhaana abharera, bharanywa amabheere ageenego, bhatakuhaanwa ebhyakurya kwa okubha bhatakubhinagya. Egoego, oni nonse naabhahaana ameehigiryo amanyoohu kwa okubha mwaringa mutaranaga. Na kora bhoono mutaranaga, 3 kwa okubha mukyoorokereribhwa na amangʼana ga ekyaro. Neegwiri ega, gati yeenyu muuna orwango na eritoongʼana. Bhoono, gayo gatakoorokya ega, mukyoorokereribhwa na amangʼana ga ekyaro na mukyeekara kya abhantu bha ekyaro? 4 Ndagamba ego, kwa okubha kira omuntu aragamba bhwaye, oumwi aragamba ega, “Oni ngʼ-wa Pauro,” oundi aragamba ega, “Oni ngʼ-wa Apooro.” Bhoono, gayo gatakoorokya ega, mukyakora kya abhantu bha ekyaro?5 Mbe bhoono, Apooro niwi? Na oni Pauro niwi? Bheetu turingi abhakori bha emirimu bhanú Waryubha yaatutuma okubhabheera bheenyu mumwikirirye. Kira oumwi arakora emirimu kya ego yaahaanwa na Omukuru. 6 Oni naahamba egimbusuro, Apooro akeetiriira amanji, nawe Waryubha ngʼo yaagimerya na okugikiinʼya. 7 Ego, unú arahamba egimbusuro ataringi ekintu, kora unú areetiriira, nawe Waryubha unú arakiinʼya ngʼo wa okwisigirwa. 8 Unú arahamba egimbusuro na unú areetiriira bhonsego bharingi ekintu kimwi, na Waryubha arimuhaana kira oumwi omutuho gwaye, okuringʼaana na kya ego yaakora emirimu gyaye. 9 Ndagamba ego, kwa okubha bheetu turakora emirimu gya Waryubha. Na bheenyu m-mugunda gwaye, na enyumba yaaye.
10 Waryubha kwa eriruguto ryaye, yambeereri okuhagaaja obhurusa kya omuhagaaji omujomu owa egintungwa, na omuntu oundi arahagaaja eguru ya obhurusa bhuyo. Nawe bhoono, kira omuntu yeeyikomye bhujomu, kya ego arahagaaja eguru ya obhurusa bhuyo. 11 Akore ego, kwa okubha obhurusa bhunú bhumariri okuhagaajwa n-Yeesu Kiristu omwene, atariho omuntu unú aranagya okuhagaaja obhurusa obhundi. 12 Omuntu wowonse aratura okuhagaaja eguru ya obhurusa bhuyo, kwa egijahaabhu, kwa ebhigera bhya egimbirya kasi kwa amagina ga obhwera obhunene, kwa emiti, kwa amasya kasi kwa obhunyanki. 13 Kira omuntu, emirimu gyaye girimaahikana ega, giringi egaki. Orusiku rurya rwa okubhutura ekiina, emirimu gyonsego giribha kubhurabhu, kwa okubha emirimu gya omuntu wowonse, girirengwa kwa omururo gwa okubhuturira ekiina. 14 Nyoore emirimu gya omuntu gitarirungura, omuntu uyo, arinyoora omutuho. 15 Nawe, nyoore emirimu gya omuntu girirungura, hayo atarinyoora omutuho, nawe, weeki omwene arituuribhwa, kya omuntu unú ahoneeri orwa okwagura, okusoha mumururo.
16 Bhoono, mutamanyiri ega, bheenyu ni-risyengerero rya Waryubha, na ega, Omutima wa Waryubha areekara munsi weenyu? 17 Nyoore omuntu araasarye erisyengerero rya Waryubha, omuntu uyo, Waryubha arimusarya, kwa okubha erisyengerero rya Waryubha ni-rirabhu, na erisyengerero riyo m-beenyu.
18 Omuntu wowonse gati yeenyu, ateengʼeena ega, yaana egintungwa. Nyoore omuntu areerore ega, yaana egintungwa mukyaro kinu, abhe areekora omukangi, naho anyoore egintungwa gya maheene. 19 Yeekore okubha ego, kwa okubha egintungwa gya ekyaro kinu, m-bukangi embere ya Waryubha. N-kya ego yaangʼoorwa mu Mangʼoore Amarabhu ega, “Waryubha arabhagwatya abha egintungwa mubhungʼeeni bhwabho.”a 20 Kweki yaangʼoorwa ega, “Omukuru amanyiri ameetegeerero ga abha egintungwa, ega, gataana obhwera.”b
21 Bhoono, omuntu wowonse ateegungya kwa okubha weeki m-mwihigira wa omuntu nyabhurebhe. Ndagamba ego, kwa okubha bheetu bhonsego, Waryubha atusoreri okubhabheera bheenyu, 22 abhe oni Pauro, abhe Apooro, kasi abhe Kefa. Kweki Waryubha abhaheeri ebhintu ebhindi bhya okubhabheera, bhibhe ebhya mukyaro, kasi obhuhoru kasi oruku, bhibhe bhinú bhiriho bhoonwego kasi bhinú bhiriija, bhyonsego m-byenyu. 23 Nawe, bheenyu, m-ba Kiristu, na Kiristu ngʼ-wa Waryubha.