Okuraarika amangʼana eguru ya Yeesu Kiristu
2
Bhoono, abhahiiri bhaani kuimani, hanú oni naaja kubheenyu, ntaaja okubharaarikira ekinyerera kya Waryubha, kwa okugamba bhujomu, kasi, kwa egintungwa. 2 Hanú naaringa kubheenyu eyo, naamura ega, ngambe amangʼana eguru ya Yeesu Kiristu ageenego, ekinene okukwa kwaye kumusarabha, bira okugamba ekintu ekindi. 3 Eribhaga riyo naaringa omunyooheeru, naaringa na enkubhi, kweki naarigitanga bhukongʼu. 4 Eribhaga naaringa ndeehigirya na okuraarika, ntaagambanga amangʼana kwa egintungwa gyani, naho mbangʼeenererye bheenyu munyikirirye. Tiigo-ha! Nawe, eginguru gya Omutima Omurabhu ngyo gyoorokereryanga obhuheene. 5 Naakora ego, naho eimani yeenyu eteesigira egintungwa gya abhantu, nawe, iisigire eginguru gya Waryubha.Egintungwa okurwa ku Mutima Omurabhu
6 Bhoono bheetu, turagamba amangʼana ga egintungwa, kubhantu bhanú bhanagiri kuimani, nawe egintungwa giyo, gitaringi gya mukyaro kinu, kweki gitaringi gya abhatungi bha ekyaro kinu. Bhayo bheeki mbo bharihwa. 7 Egintungwa ginú turaraarika n-kinyerera kya Waryubha, kinú kyaringa kiibhisiri kubhantu. Eribhaga Waryubha yaaringa atarabhumba ekyaro, yaamura okutumira egintungwa giyo, naho okutukorera amajomu. 8 Atariho kora oumwi kubhatungi bha ekyaro kinu, unú yaaringa amanyiri egintungwa giyo, kwa okubha bhakaabheeri bhagimanyiri, bhatakaamubhambiri kumusarabha Omukuru wa okutogoonibhwa. 9 Nawe, n-kya ego yaangʼoorwa mu Mangʼoore Amarabhu ega,
“Ganú Waryubha yaabhaseemerya bhanú bhamuhanjiri,
atariho omuntu unú yaakagaruuji kora okugeegwa,
atariho omuntu unú yaakagatuuriri mumutima gwaye.”a
10 Nawe bheetu, Waryubha yaatutubhurira gayo, okuhitira ku Mutima Omurabhu, kwa okubha Omutima Omurabhu areekomya gonsego, kora ensonga ya Waryubha inú ebhisirwe. 11 Atariho omuntu unú aratura okumanya amangʼana ganú garingi mumutima gwa omuntu oundi. Omutima gwaye ogwenego, ngo guragamanya. Egoego, na amangʼana ga Waryubha, atariho omuntu unú aratura okugamanya. Omutima wa Waryubha omwenego, ngʼo aragamanya. 12 Waryubha yaatuhaana bheetu Omutima waaye, naho tuture okumanya ganú yaatunonka. Kiyo nkyo ekisigo tutakwiganirirya kya abhantu bhanú bhareeganirirya aga ekyaro ageenego.
13 Kweki tutakugamba amangʼana ganú tweehigiribhwa na egintungwa gya abhantu, nawe, amangʼana ganú tweehigiribhwa na Omutima wa Waryubha. Turoonjoora amangʼana ga Omutima wa Waryubha kubhanú bhaana Omutima uyo.b 14 Nawe, omuntu unú ataana Omutima wa Waryubha, atakugwata ganú gararwa mu Mutima wa Waryubha, kwa okubha kumwene gayo m-bukangi, kora atakutura okugamanya, kwa okubha garamanyikana ego, kwa enjira ya Omutima wa Waryubha. 15 Omuntu unú yaana Omutima wa Waryubha, areekomya gonsego, nawe weeki, omuntu wowonse atakutura okumwikomya. 16 Amangʼoore Amarabhu garagamba ega,
“Niwi unú amanyiri ganú Omukuru Waryubha areeganirirya?
Kweki niwi unú aratura okumutongera?”c
Nawe, bheetu abheekirirya tureeganirirya ganú gararwa ku Kiristu.