1 Abhakorinto 1

Enyarubha ya mbere eya Pauro ku

Abhakorinto

Pauro arakeeranʼya Abhakorinto

Enyarubha inu, erwiri kuoni Pauro, unú Waryubha yaambirikira kwa obhwendi bhwaye, naho mbe omutumwa wa Kiristu Yeesu. Oni na omuhiiri weetu kuimani Sositene, 2 turabhangʼoorera bheenyu bhanú muringi mwikanisa rya Waryubha, erya mumugi gwa Korinto eyo. Waryubha abhasoreri okubha na obhumwi na Kiristu Yeesu na okubhabhirikira mubhe abhantu bhaaye. Turabhangʼoorera bheenyu hamwi na abhantu bhonsego bha mbaara gyonsego bhanú bharamusabha Yeesu Kiristu, Omukuru waabho na Omukuru weetu bhonse.

3 Turabheendera eriruguto na omurembe okurwa ku Taata Waryubha na ku Mukuru Yeesu Kiristu bhibhe hamwi na bheenyu.

Omukumo gwa Pauro ku Waryubha

4 Ndamukumya Waryubha eribhaga ryonsego kurusumo rwenyu, kwa okubha yaabhanonka okuhitira ku Kiristu Yeesu. 5 Kwa okugwatana kwenyu na Kiristu, muheerwe obhuniibhi bhwa amangʼana gonsego, ekinene kubhugambi bhwenyu bhonsego na obhumanyi bhwenyu bhonsego. 6 Gayo garoorokya ega, amangʼana eguru ya Kiristu ganú twabharaarikira n-ga maheene. 7 Bhoono, mutakusuuhirwa kora ekibharo ekimwi kya Omutima Omurabhu, enu muraganyirira kwa enamba okuhunjuka kwa Omukuru weetu Yeesu Kiristu. 8 Waryubha aribhakora munage okuhikira kubhuteero, naho mutariija okubha na amasoro, orusiku runú Omukuru weetu Yeesu Kiristu ariija okubhuturira ekiina abhantu. 9 Waryubha arikora gayo kwa okubha m-muheene, weeki yaabhabhirikira bheenyu, mubhe na obhumwi na Omwana waaye Yeesu Kiristu, Omukuru weetu.

Okubha na obhumwi mwikanisa

10 Mbe bhoono, abhahiiri bhaani kuimani, ndabhakomererya kuriina rya Omukuru weetu Yeesu Kiristu ega, mutabha murahabhana kungamba. Nawe mubhenga mureegwirana, na mubhenga na obhumwi kuganú oranyoora murahairira na kuganú oranyoora mureeganirirya. 11 Abhahiiri bhaani kuimani, abhantu nyabhurebhe bha owa Kiroe, bhankeererye ega, eritoongʼana riringi gati yeenyu. 12 Bhoono, ganú ndeenda okugamba n-ganu, ega, kira omuntu gati weenyu aragamba bhwaye. Oumwi aragamba ega, “Oni, ngʼ-wa Pauro.” Oundi aragamba ega, “Oni, ngʼ-wa Apooro.” Oundi aragamba ega, “Oni, ngʼ-wa Kefa.” Oundi aragamba ega, “Oni, ngʼ-wa Kiristu.” 13 Bhoono, Kiristu yaahukeeni? Kasi Pauro yaabhambwa kumusarabha kurusumo rwenyu? Kasi mwabhatiijwa kwa eriina rya Pauro?

14 Ndamukumya Waryubha, kwa okubha ntaabhatiija omuntu wowonse kubheenyu, nawe Kirisipo na Gaayo. 15 Kwa ego, atariho unú aratura okugamba ega, yaabhatiijwa kwa eriina ryani. 16 Ndahiituka ega, kweki naabhatiija abhantu bha owa Sitefano. Nawe, okutiga bhayo, ntakumanya ega, naabhatiija omuntu oundi wowonse. 17 Kiristu ataantuma oni okubhatiija abhantu. Yaantuma okuraarika Amangʼana Amajomu, bira okwisigira obhungʼeeni bhwani bhwa okuhaira bhujomu, naho oruku rwa Kiristu kumusarabha rutabhura eginguru.

Kiristu ngʼo egintungwa na eginguru gya Waryubha

18 Abhantu bhanú bharabhura bhararora ega, amangʼana eguru ya okukwa kwa Kiristu kumusarabha n-ga ekikangi, nawe kubheetu bhanú turatuuribhwa, amangʼana gayo, garoorokya eginguru gya Waryubha. 19 N-kya ego yaangʼoorwa mu Mangʼoore Amarabhu ega,

“Abhantu bha egintungwa ndisarya egintungwa gyabho.

Abhangʼeeni ndibhurya obhungʼeeni bhwabho.”

20 Bhoono bharingi-ha bhanú turagamba ega, bhaana egintungwa? Bharingi-ha bhanú turagamba ega, m-beehigirya bha amaragiriryo, kora bharingi-ha abhantu bhanú bharoonjoora amangʼana bhujomu eginsiku ginu? Waryubha yoorokya ega, egintungwa gya mukyaro kinu m-bukangi. 21 Ndagamba ego, kwa okubha Waryubha, kwa egintungwa gyaye yaamura ega, abhantu bhatakutura okumumanya okurekana na egintungwa gyabho abheene. Nawe, Waryubha yaahanja okubhatuurya bhanú bharamwikirirya kwa enjira ya amangʼana ganú turaraarika. Amangʼana gayo, ngo abhantu bhanú bhatamanyiri Waryubha, bharabhirikira ega, n-ga ekikangi. 22 Ku Bhayahudi amangʼana gayo n-ga ekikangi, kwa okubha bhareenda bharore ebhika nho bheekirirye. Na ku Bhayunani amangʼana gayo n-ga ekikangi, kwa okubha bhareenda egintungwa. 23 Nawe bheetu, turaraarika amangʼana eguru ya Kiristu unú yaabhambwa kumusarabha. Amangʼana gayo garabhabhihira Abhayahudi, na kubhanú bhataringi Abhayahudi m-mangʼana ga ekikangi. 24 Nawe, kubhanú Waryubha yaabhabhirikira okubha abhantu bhaaye, Abhayahudi kasi Abhayunani, Kiristu ni-ginguru gya Waryubha na egintungwa gya Waryubha. 25 Amangʼana ganú abhantu bhararora ega, m-bukangi bhwa Waryubha, garakira egintungwa gya abhantu. Na ganú bhararora ega, m-bunyooheeru bhwa Waryubha, gaana eginguru bhukongʼu okukira eginguru gya abhantu.

26 Bhoono, abhahiiri bhaani kuimani, muhiituke kya ego mwaringa, eribhaga rinú Waryubha yaabhabhirikira. Abhaaru gati yeenyu mutaaringa na egintungwa embere ya abhantu. Kweki abhaaru gati yeenyu mutaaringa mumanyikeeni, kora muteebhurirwa muginganda gya abhasuukwa. 27 Nawe, Waryubha yaagasora amangʼana ganú abhantu bhararora ega, m-bukangi, naho abhasuukye abha egintungwa. Kweki Waryubha yaagasora amangʼana ganú abhantu bhararora ega, m-manyooheeru, naho abhasuukye abha eginguru. 28 Kweki Waryubha yaagasora amangʼana ganú abhantu bhararora ega, gatakusuukwa na ganú garajeerwa, na ganú bhararora ega, gataana obhwera, naho asarye amangʼana ganú abhantu bhararora ega, gaana obhwera. 29 Yaakora ego, naho omuntu wowonse ateegungya embere ya Waryubha. 30 Waryubha omwene ngʼo yaabhagwatanʼya bheenyu na Kiristu Yeesu. Weeki yaamukora Kiristu abhe egintungwa gyetu. Ensonga yaaye niiga, kwa enjira ya Yeesu tubheeri abhaheene embere ya Waryubha, tubheeri abhantu bhaaye, kweki tutunguriibhwe. 31 N-kya ego yaangʼoorwa mu Mangʼoore Amarabhu ega, “Omuntu wowonse unú areegungya, yeegungye kurusumo rwa Omukuru.”