Waryubha ngʼ-wa heene ku Bhayahudi
3
Bhoono mbe, kuuna obhwera-ki, okubha Omuyahudi? Na okusaarwa kuuna obhwera-ki? 2 M-buheene ega, okubha Omuyahudi kuuna obhwera obhwaru. Ekintu kya okwamba niiga, Waryubha yaabhagwatya Abhayahudi amangʼana gaaye. 3 Nawe, Abhayahudi abhandi bhataabha abhaheene kukukora amangʼana gaaye. Bhoono tugambe ega, kwa okubha abhantu bhayo bhataringi abhaheene ku Waryubha, bharamukora Waryubha wonse atige okubha omuheene kukukora amangʼana ganú yaabharaga? 4 Tiigo-ha kora ahake! Abhantu bhonsego m-babheehi, nawe, Waryubha m-muheene, yoorokerye ega, arakora kinú aragamba. N-kya ego Amangʼoore Amarabhu garagamba eguru yaaye ega,“Emanyikane kubhantu ega,
amangʼana gaaho n-ga obhuheene.
Na kubhubhuturi bhwa ekiina,
uuwe orahiga.”a
5 Nawe, abhantu abhandi bharatura okugamba ega, “Obhusarya bhwetu Abhayahudi, mbo bhuroorokya ega, Waryubha ngʼ-wa obhuheene kubhubhuturi bhwa ekiina bhwaye. Nawe, nyoore Waryubha aratujibhya, bhoono tugambe ega, ataringi wa obhuheene?” 6 Tiigo-ha kora ahake! Ekaabheeri ego, Waryubha akaabheeri egaki na obhuheene bhwa okubhuturira ekiina abhantu bha mukyaro? 7 Kweki bharatura okugamba ega, “Bheetu tukaakora obhusarya, abhantu abhandi bharatura okurora kubhurabhu ega, Waryubha m-muheene, bhonse bharaagendererye okumugungya. Bhoono, kwaki tukyabhuturirwa ekiina ega, m-bakori bha obhusarya?” 8 Ego, n-kya okugamba ega, “Tubhenga turakora obhusarya, naho Waryubha areete amajomu.” Abhantu abhaaru bharatuhaamirirya ega, tureehigirya ego! Bharijibhibhwa okuringʼaana na obhubhiibhi bhwabho.
Atariho omuntu omuheene embere ya Waryubha
9 Bhoono, tugambe-ki? Tugambe ega, bheetu Abhayahudi tuuna obhwera okukira abhantu abhandi bhanú bhataringi Abhayahudi? Tiigo-ha kora ahake! N-kya ego naamara okubhakeerya ega, Abhayahudi na bhanú bhataringi Abhayahudi, bhonsego bharatungwa na obhubhiibhi. 10 N-kya ego Amangʼoore Amarabhu garagamba ega,
“Atariho omuntu omuheene kora oumwi, embere ya Waryubha.
11 Atariho omuntu unú amanyiri amangʼana ga Waryubha,
kweki atariho unú aratuna okumumanya.
12 Abhantu bhonsego bhaatigiri okumwigwa Waryubha,
bhonsego bhatakungʼarira kweki embere ya Waryubha.
Atariho omuntu unú arakora amajomu,
atariho kora oumwi.”b
13 “Eminwa gyabho n-kya egimbihira ginú gyaasamiriiri,
egindimi gyabho giragamba obhubheehi.”c
“Okurwa muminwa gyabho,
gararwa-mo amangʼana amaruru kya obhusungu bhwa enjoka.”d
14 “Eminwa gyabho giijwiri ameehiimo,
na amangʼana ganú garanyahaara.”e
15 “Amaguru gaabho m-mangu okukenya okugya okwita.
16 Hohonse hanú bharagya,
bharasarya na okusikya.
17 Bhatamanyiri okwikarana na abhantu abhandi kwa omurembe.”f
18 “Bharaanga okumwigwa Waryubha.”g
19 Mbe, bheetu tumanyiri ega, hanú Amangʼoore Amarabhu gararagirirya ekintu kyokyonse, gararagirirya abhantu bhanú bhaahaanwa amaragiriryo ga Waryubha. Amaragiriryo gaatuurwa-ho, naho Abhayahudi bhatakaaja okubha na ekiihaamiriryo kya okwibhagirira hanú Waryubha aribhuturira ekiina ekyaro. Kwa ego, erimaahikana kubhurabhu ega, abhantu bhonsego bhareenderwa okubhuturirwa ekiina na Waryubha. 20 Atariho omuntu wowonse unú arabharwa okubha omuheene embere ya Waryubha, kwa okugwata amaragiriryo ga Musa. Emirimu gya amaragiriryo gayo, n-koorokya ega, abhantu bhonsego m-bakori bha obhusarya.
Omuntu arabharwa okubha omuheene kwa okumwikirirya Yeesu
21 Nawe bhoono, Waryubha atoorokerye enjira yaaye, ya okubhara abhantu okubha abhaheene embere yaaye, na etaringi kwa enjira ya amaragiriryo. Kora amaragiriryo ga Musa na amangʼoore ga abharooti garagamba ego kubhurabhu. 22 Enjira iyo, nu-kumwikirirya Yeesu Kiristu. Abhantu bhonsego bhanú bharamwikirirya Yeesu Kiristu, Waryubha arabhabhara okubha abheene embere yaaye. Atakungʼahirya omuntu wowonse, 23 kwa okubha abhantu bhonsego bhaakora obhusarya, na okusuuhirwa na obhukuru bhwa Waryubha. 24 Nawe, kwa eriruguto rya Waryubha, bheekiririibhwe okubha abhaheene embere yaaye bhusa. Bhatunguriibhwe okurwa mubhusarya bhwabho, okuhitira ku Kiristu Yeesu.h 25 Waryubha yaamukora Yeesu abhe ekimwensoi kya okwigwanʼya abhantu na Waryubha, naho abhantu bhaabhirwe obhusarya bhwabho, kwa okwikirirya ega, Yeesu yaakwa kurusumo rwabho. Waryubha yaakora ego, naho yoorokye ega, ngʼ-wa obhuheene, kwa okubha yeegumirirya, ataabhajibhya kwa amabhiibhi ganú bhaakora enyuma eyo. 26 Yaakora ego, naho yoorokye obhuheene bhwaye kwibhaga rinu, kwa okubhara abhantu bhonsego bhanú bharamwikirirya Yeesu, okubha abhaheene embere yaaye.
27 Kwa ego, eringʼana riyo, riraturibhira okwigungya, kwa okubha, kora bheetu tutakubharwa okubha abhaheene ku Waryubha, kwa okugwata amaragiriryo, nawe, kwa okumwikirirya Yeesu okwenego. 28 Turagamba ego, kwa okubha tumanyiri ega, Waryubha ngʼo arabhara omuntu okubha omuheene kwa okumwikirirya Yeesu okwenego, etaringi kwa okugwata amaragiriryo ga Musa. 29 Bhoono, Waryubha ngʼ-Waryubha wa Abhayahudi abheenego? Ataringi wa abhantu abhandi bhanú bhataringi Abhayahudi? Obhuheene niiga, Waryubha ngʼ-Waryubha wa abhantu bhonsego! 30 Ariho Waryubha umwi ego, kweki eriho enjira eimwi ego, ya okubhara abhantu okubha abhaheene embere yaaye. Abhayahudi na abhantu bhanú bhataringi Abhayahudi, bhonsego bharabharwa okubha abhaheene kwa okumwikirirya Yeesu okwenego. 31 Bhoono mbe, hanú turakomererya okumwikirirya Yeesu, n-kugamba ega, amaragiriryo ga Musa gataana obhwera? Tiigo-ha kora ahake! Nawe, tukaamwikirirya Yeesu, nho turabha toorokerye kubhurabhu, gonsego ganú amaragiriryo ga Musa garoorokererya.