Waryubha aribhuturira ekiina abhantu bhonsego//bira omungʼaho
2
Mbe, uuwe Omuyahudi omurikyani, orabhuturira ekiina abhantu abhandi bhanú bharakora amangʼana gayo. Nawe, kora uuwe omwene otakutura okwibhagirira embere ya Waryubha! Maaha, hanú orabhuturira ekiina abhandi, nho oreebhuturira ekiina uuwe omwene, kwa okubha amangʼana amabhiibhi ganú bharakora, ngo uuwe omwene wonse orakora. 2 Bheetu tumanyiri ega, Waryubha arabhuturira ekiina kwa obhuheene abhantu bhanú bharakora amangʼana kya gayo. 3 Nawe bhoono, uuwe orabhuturira ekiina abhandi enu uuwe omwene wonse, orakora amangʼana gayogayo. Oramanya ega, oringʼosa obhubhuturi bhwa ekiina bhwa Waryubha? 4 Waryubha m-muheene bhukongʼu, arakumaahira ekyabhira bhukongʼu, na arakwigumirirya bhukongʼu. Nawe bhoono, uuwe oreenda okujeera gayo gonsego? Otamanyiri ega, arakoorokya obhujomu bhwaye, naho oture okumwihunjurira? 5 Uuwe uuna ekisiraani, kweki oraanga okumwihunjurira Waryubha. Kwa ego, oreekumanirya obhujibhu kurusiku runú Waryubha aribhuturira ekiina abhantu, kwa obhuheene.6 Orusiku ruyo, Waryubha arimuriha kira omuntu okuringʼaana na amakorwa gaaye.a 7 Aribhahaana obhuhoru bhwa koko, abhantu bhanú bhareegumirirya okukora amajomu, kwa okubha bharatuna eginkuma, obhusuuku, na obhuhoru bhunú bhurarwa ku Waryubha. 8 Nawe, aribhajimira na okubhajibhya abha omungʼaho, bhanú bharaanga obhuheene, na bharakora amabhiibhi. 9 Abhantu bhonsego bhanú bharakora amabhiibhi, bharinyoora enyanko enduru bhukongʼu,b okwambira ku Bhayahudi, na kora kubhantu bhanú bhataringi Abhayahudi. 10 Nawe, abhantu bhonsego bhanú bharakora amajomu, bharinyoora eginkuma, obhusuuku, na omurembe, okwambira ku Bhayahudi, na kora kubhantu bhanú bhataringi Abhayahudi. 11 Waryubha atakungʼahirya omuntu wowonse.
12 Abhantu bhanú bhataringi Abhayahudi, bhanú bharakora obhusarya bharisikibhwa, kora nyoore bhatamanyiri amaragiriryo ga Musa.c Abhayahudi bhamanyiri amaragiriryo gayo, nawe, nyoore bharaakore obhusarya, bharibhuturirwa ekiina okuringʼaana na amaragiriryo gayo. 13 Bharibhuturirwa ekiina, kwa okubha Waryubha atakumubharira obhuheene omuntu unú areetegeerera amaragiriryo gayo okwenego, nawe unú arakora ganú amaragiriryo gareenda akore. 14 Abhantu bhanú bhataringi Abhayahudi, bheeki bhatamanyiri amaragiriryo gayo. Kora ego, nyoore bharaakore amajomu okurekana na ameetegeerero gaabho, na amangʼana gayo n-kya ego amaragiriryo ga Musa garoorokya bhakore, hayo eroorokya ega, bhamanyiri okukora ganú gareenderwa. 15 Abhantu bhayo bharoorokya kwa amakorwa gaabho ega, kinú kireenderwa mumaragiriryo, kingʼoorerwe mumitima gyabho. Kora ameetegeerero gaabho, gareemiririra eringʼana riyo, kwa okubha ahandi garabhajongera, na ahandi garabheebhagirira. 16 Ego niigo eribha, orusiku rwa obhubhuturi bhwa ekiina. Waryubha aribhuturira ekiina abhantu okuhitira ku Kiristu Yeesu, kora kumeetegeerero gaabho ga ekinyerera. Amangʼana Amajomu ganú ndaraarika niigo garingi.
Abhayahudi na amaragiriryo ga okusaarwa
17 Bhoono uuwe unú oreebhirikira ega, Omuyahudi eritinya, oreesigira okubha omuheene embere ya Waryubha kwa okugwata amaragiriryo ga Musa. Kweki oreegungya ega, uuwe m-muntu wa Waryubha. 18 Oreerora ega, omanyiri gonsego ganú Waryubha ahanjiri, na ega, omanyiri amajomu gonsego, kwa okubha weehigiribhwa amaragiriryo gaaye. 19 Oreerora ega, oreenderwa okoorokererya abhantu bhanú bhataringi Abhayahudi, kya omuntu unú aroorokererya abhahoku, kasi kya ekorobhoi inú eramirikira abhantu bhanú bharingi mukisunte.d 20 Oreerora ega, uuwe m-mwihigirya wa abhantu bhanú bhatamanyiri obhuheene bhwa Waryubha, na abhaana abharera,e kwa okubha amaragiriryo garakukeerya egintungwa gyonsego na obhumanyi bhwa obhuheene. 21 Uuwe oreehigirya abhantu abhandi, nawe, n-kwaki uuwe omwene otakukora ganú oreehigirya? Oreehigirya abhandi ega, bhateebha, nawe, n-kwaki uuwe omwene oreebha? 22 Uuwe oreehigirya abhantu ega, bhatakora ameega kibhara, nawe, n-kwaki uuwe omwene orakora ameega kibhara? Uuwe orabhihirirwa ebhisusano bhya abhakuru, nawe, n-kwaki uuwe omwene oreebha ebhintu mumasyengerero munú bhirasyengererwa-mo? 23 Uuwe oreegungya ega, omanyiri amaragiriryo ga Waryubha, nawe, enu orakora amangʼana ga okumujeera Waryubha kwa okusarya amaragiriryo gaaye. 24 N-kya ego Amangʼoore Amarabhu garagamba ega, “Eriina rya Waryubha riratukwa na abhantu bhanú bhataringi Abhayahudi, okurekana na amakorwa amabhiibhi ganú murakora.”f
25 Okusaarwa kwaho kurabha na obhwera, nyoore orakora kya ego amaragiriryo garoorokererya. Nawe, nyoore orasarya amaragiriryo, okusaarwa kwaho kutakubha na obhwera bhobhonse, kweki uuwe orabha kya omuntu unú atakusaarwa. 26 Kwa ego, nyoore omuntu unú atakusaarwa araakore kya ego amaragiriryo garoorokererya, Waryubha aramwikirirya kya omuntu unú arasaarwa. 27 Abhantu bhanú bhataringi Abhayahudi bhatakusaarwa, nawe, nyoore bharaakore kya ego amaragiriryo garoorokererya, amakorwa gaabho garoorokya ega, uuwe Omuyahudi m-mukori wa obhusarya. Eribha ego, kwa okubha uuwe Omuyahudi unú arasaarwa, kweki omanyiri amaragiriryo ga Waryubha, nawe, orasarya amaragiriryo gayo. 28 Mbe, mumanye ega, etaringi ega, kira unú yeebhurwa na Omuyahudi, aribha Omuyahudi eritinya. Omuntu atakutura okubha Omuyahudi eritinya, kwa okusaarwa omubhiri okwenego. 29 Tiigo-ha kora ahake! Omuyahudi eritinya ngʼ-unú aramwigwa Waryubha kwa omutima gwaye gonsego. Okusaarwa kwa heene, kurakorwa na Omutima Omurabhu, mumutima gwa omuntu, kutaringi kwa okugwata amaragiriryo ga Musa. Omuntu kya uyo, atakunyoora eginkuma okurwa kubhantu, nawe, aragungibhwa na Waryubha omwene.