Enyarubha ya Pauro ku
Abharuumi
Enkeeranʼya
1
Enyarubha inu, erwiri kuoni Pauro, omugaya wa Kiristu Yeesu. Oni naabhirikirwa okubha omutumwaa waaye, nkasorwa mbenga ndaraarika Amangʼana Amajomu ga Waryubha.b 2 Amangʼana Amajomu gayo, ngo Waryubha yaaraga okurwa akare, okuhitira kubharooti bhaaye mu Mangʼoore Amarabhu. 3 Amangʼana Amajomu gayo, ngo amangʼana eguru ya Omwana waaye. Omwana uyo, yeebhurwa kya omuntu, muhamati ya omukama Daudi.c 4 Nawe, kwa okuhitira Omutima Omurabhu,d Waryubha yaamusora abhe Omwana waaye,e owa obhuturo bhonsego, hanú yaamuhyukya okurwa mubhaku. Yeesu Kiristu uyo, ngʼo Omukuru weetu. 5 N-kuhitira kumwene, Waryubha yaangʼaana eriruguto rya okubha omutumwa waaye, naho abhantu bhonsego bhanú bhataringi Abhayahudi, bhature okumwikirirya na okumwigwa Omukuru Yeesu, na eriina ryaye rigungibhwe. 6 Bheenyu bhonse muringi gati yaabho, mubhirikiirwe okubha abhantu bha Yeesu Kiristu.7 Ndabhangʼoorera bheenyu abheekirirya bhonsego bhanú muringi Ruumi eyo. Waryubha abhahanjiri bhukongʼu, na abhabhirikiiri, naho mubhe abhantu bhaaye abharabhu bha omutima.
Ndabheendera eriruguto na omurembe okurwa ku Taata Waryubha, na ku Mukuru Yeesu Kiristu, bhibhe hamwi na bheenyu.
Pauro areegomba okubhataarira abheekirirya bha Ruumi
8 Naambe kwa okugamba ega, ndamukumya Waryubha okuhitira ku Yeesu Kiristu, kurusumo rwenyu bhonsego, kwa okubha, eimani yeenyu, emanyikeeni mukyaro kyonsego. 9 Waryubha unú ndamukorera emirimu kwa omutima gwani gonsego, kwa okuraarikira abhantu Amangʼana Amajomu eguru ya Omwana waaye, amanyiri kya ego ndabhasabhira eribhaga ryonsego. 10 Ndamusabha kira eribhaga ega, akaahanja, hamwi bhoono yangʼaane omweya gwa okuuja kubheenyu eyo. 11 Ndasabha ego, kwa okubha ndeegomba bhukongʼu okumaahana na bheenyu, naho mbahaane ebhibharo bhya emitima ebhya okwimya eimani yeenyu. 12 Nko okugamba ega, turiimanʼya, eimani yeenyu erinyimya oni, na eimani yaani eribheemya bheenyu.
13 Abhahiiri bhaani kuimani, ndeenda mumanye ega, mara kaaru naaringa ndeenda okuhika kubheenyu eyo, nawe, nawanyareero nkyaribhiirwe. Ndeenda niije kubheenyu eyo, naho ndute abhantu gati yeenyu, bhamusoorane Omukuru Yeesu, kya ego naakora kubhantu abhandi bhanú bhataringi Abhayahudi. 14 Waryubha yaandagirirya mbenga ndaraarika Amangʼana Amajomu kubhantu bhonsego, ku Bhayunani na kubhanú bhataringi Abhayunani,f kubhasomi na kubhanú bhataringi abhasomi. 15 Kwa ego, ndeegomba bhukongʼu, niije okubharaarikira Amangʼana Amajomu kora kubheenyu Ruumi eyo.
Obhuturo bhwa Amangʼana Amajomu ga Waryubha
16 Oni ntakurora eginsoni okuraarika Amangʼana Amajomu gayo, kwa okubha mbo obhuturo bhwa Waryubha obhwa okutuurya abhantu bhonsego bhanú bharamwikirirya Yeesu, okwambira ku Bhayahudi okuhikira kubhantu bhanú bhataringi Abhayahudi. 17 Amangʼana Amajomu gayo, garoorokya kubhurabhu kya ego Waryubha arabhara abhantu okubha abhaheene embere yaaye. Abhantu bharabharwa okubha abhaheene embere ya Waryubha, okurekana na eimani eyenego. N-kya ego Amangʼoore Amarabhu garagamba ega, “Omuheene aribhanga areekara kwa okunyikirirya.”g
Waryubha arajibhya abhantu kwa obhusarya bhwabho
18 Waryubha omwene, aroorokya kubhurabhu okurwa murwire ega, arajibhya abhantu bhanú bharamwanga na okukora amabhiibhi. Abhantu bhayo, bharaanga obhuheene bhwaye, okurekana na obhubhiibhi bhwabho. 19 Nawe, etaringi ega, bhatamanyiri amangʼana ga Waryubha. Waryubha omwene yoorokya kubhurabhu amangʼana gaaye, kwa ego gamanyikeeni kubhantu. 20 Okurwa obhusimuka, Waryubha yaabhumba ebhintu bhyonsego. Okurwa eribhaga riyo, abhantu bharatura okumanya kya ego Waryubha aringi, kora onyoora bhatakumurora. Ebhintu bhinú yaabhumba bhiroorokya ega, Waryubha yaana obhuturo bhonsego bhwa koko, kweki ega, weeki ngʼo Waryubha, atariho oundi. Kwa ego, abhantu bhataana enjira ya okwibhagirira ega, bhatamumanyiri Waryubha. 21 Onyoora bhamumanyiri Waryubha kya ego aringi, nawe, bhatakumugungya kora okumukumya ega, ngʼo Waryubha waabho. Ameetegeerero gaabho gatiyeeni na obhungʼeeni bhwabho bhutaana ekintu, bhwijwiri ekisunte. 22 Bhareeheema ega, mbo abha egintungwa, nawe, m-bakangi. 23 Bhatigiri okumusyengera Waryubha Omurabhu wa koko na koko, bharasyengera ebhisusano, bhinú bhirahunkana na abhantu bhanú bharakwa kya abhantu abhandi, egintyenyi, ebhinyonyi na bhinú bhireengʼuurira enda.
24 Kwa ekisigo kiyo, Waryubha abhatigiri bhabhe bharagwata orunamba orubhiibhi rwa emitima gyabho, kwa okukorerana amangʼana ga eginsoni kumibhiri gyabho. 25 Bhatigiri okwikirirya obhuheene bhwa Waryubha, bhagwatiri obhubheehi. Bharasyengera ebhibhumbwa na okubhikorera emirimu, nawe, bhatigiri okukora gayo ku Waryubha Omubhumbi unú areenderwa okugungibhwa koko na koko. Amina.
26 Kwa ekisigo kiyo, Waryubha abhatigiri bhabhe bharakora amangʼana ga eginsoni kya ego bhareenda. Abhakari bhatigiri okutumira emibhiri gyabho kya ego gyabhumbwa gitumirwe, nawe bharagitumira bhundi.h 27 Egoego abhasaaja bhonse, bhatigiri okutumira emibhiri gyabho kya ego gyabhumbwa okutumirwa, omusaaja na omukari. Abhasaaja bhareegombana abheene kwa abheene, bharakora amangʼana ga eginsoni. Kwa okukora ego, bheesoreeri abheene obhujibhu bhunú bhuraringʼaana na amakorwa gaabho amabhiibhi.
28 Mbe, kwa okubha bhaangiri okumumanya Waryubha, kwa ego Waryubha wonse abhatigiri bhabhe bharagwata ameetegeerero gaabho amabhiibhi ga okwihabhya. Bhoono abhantu bharakora amangʼana ganú gatakwenderwa okukorwa. 29 M-bakori bha obhusarya bhwa amanga gonsego, amabhiibhi amanga gonsego, kweki bhaana orunamba rwa ebhintu bhyonsego na bhaana orwango. Bhareenda eritoongʼana, obhwiti na obhugwatanʼya. M-babheehi, m-bantu bha ameetegeerero amabhiibhi na m-bagambi bha abhantu, 30 m-bahaamirirya, na bharamubhihirirwa Waryubha. M-bakana, bhaana ekisiraani, kweki m-bantu bha ameeheemo na okwigungya. Na kira eribhaga bharatuna eginjira egihya gya okukora amabhiibhi. Bhatakusuuka abheebhuri bhaabho, 31 m-bakangi, bhatakukunaanʼya egindago gyabho, bhataana obhuhanje kora ekyabhira kubharikyabho. 32 Abhantu bhayo, bhamanyiri bhujomu ega, omuntu akaakora amakorwa amabhiibhi kya gayo, arabha areenderwa okusikibhwa na Waryubha. Kora ego, bharagendererya okukora amabhiibhi, kweki bhareekiriranʼya na abhakori bha amakorwa amabhiibhi kya gayo.