Petero areebhagirira mwikanisa rya Yerusaremu
11
Abhatumwaa bha Yeesu na abheekirirya abhandi mukyaro kya Yudea erya, bhakeegwa ega, abhantu bhanú bhataringi Abhayahudi bhonse, bheekiriirye eringʼana rya Waryubha. 2 Kwa ego, Petero hanú yaahunjuka Yerusaremu, Abhayahudi bhanú bhaaringa bharamwikirirya Yeesu, bhakaamba okumutoongʼanʼya, 3 bharagamba ega, “Uuwe waasoha munyumba ya abhantu bhanú bhataringi Abhayahudi na okarya ebhyakurya hamwi nabho!”4 Nho, Petero akaamba okubhatondera ngʼorangʼora ega, 5 “Orusiku rumwi, naaringa mumugi gwa Yoopa, ndamusabha Waryubha. Kimwi nkatungʼaara, nkaamba okurora obhurori. Mubhurori bhuyo, naarora ekintu kya eshuuka enene, egwatirwe mbaara gyaye ena gyonsego. Ekintu kiyo, kyaringa kireetuumibhwa okurwa murwire, kikeetuumibhwa embarika waani. 6 Nkakiikomya bhwaheene, gyaringa-mo egintyenyi egya amaguru gane, egya kibhara na egya okutugwa, egintyenyi ginú gireengʼuurira enda, na ebhinyonyi.
7 “Nho nkeegwa eriisi rirankeerya ega, ‘Petero, imuka! Ogooge orye!’ 8 Nawe, nkakyukya ega, ‘Tiigo-ha, Omukuru! Ntaakariiri ekintu kyokyonse, kinú amaragiriryo ga Musa garaanga ega, m-mugiro!’ 9 Kimwi nkeegwa kweki okurwa murwire, ega, ‘Otige okubhirikira ebhintu bhinú Waryubha yaaraama ega, m-mugiro.’ 10 Eringʼana riyo, ryakoreka mara kasatu, nho ekintu kiyo, kikahindibhwa murwire.
11 “Rumwigo abhantu abhasatu bhanú bhaaringa bhatumirwe okurwa mumugi gwa Kaisaria, bhakahika kunyumba inú twaringa tureekara. 12 Omutima Omurabhub akankeerya ega, ngye hamwi nabho, ntoobhoha. Kwa ego, nkagya nabho hamwi. Abhahiiri abhasansabha bhanu hanu, bhakansoorana okugya mumugi gwa Kaisaria. Hanú twahika eyo, tukasoha munyumba ya Korinerio. 13 Weeki akatukeerya kya ego maraika yaamwibhukira munyumba yaaye, na okumukeerya ega, ‘Otume abhantu bhagye mumugi gwa Yoopa, bhamubhirikire Simoni, unú arabhirikirwa Petero, yaaje. 14 Uyo, ngʼo araakukeerye amangʼana, na kwa okugwata amangʼana gayo, uuwe hamwi na abhantu bhonsego bha iika owaaho murituuribhwa.’
15 “Hanú naamba okubhakeerya abhantu bhayo amangʼana, Omutima Omurabhu akabheetuumira, kya ego yaatwituumira bheetu kubhwambiro.c 16 Nkahiituka eringʼana rinú Omukuru Yeesu yaatukeerya, ega, ‘Yoana yaabhatiijanga abhantu kwa amanji, nawe, bheenyu muribhatiijwa kwa Omutima Omurabhu.’d 17 Nyoore Waryubha abhaheeri abhantu bhanu, omutuho guryagurya yaatuhaana bheetu bhanú twamwikirirya Omukuru Yeesu Kiristu, bhoono, oni niwi kora nture okumuhakaanʼya Waryubha?”e
18 Mbe, Abhayahudi bhayo, hanú bheegwa amangʼana gayo, bhakakira. Bhakamugungya Waryubha bharagamba ega, “Waryubha abhaheeri kora abhantu bhanú bhataringi Abhayahudi omweya gwa okumwihunjurira, naho bhanyoore obhuhoru bhwa koko!”
Erikanisa rya Antiokia riranonkwa
19 Hanú Sitefano yaamara okwitwa, abheekirirya bhaamba okunyankibhwa na okunyaragana. Gati yaabho bhakakenyera mukyaro kya Foinike, kwiginga rya Kipuro, na mumugi gwa Antiokia. Na eyo honsego, bhaaringa bhareehigirya amangʼana eguru ya Omukuru Yeesu ku Bhayahudi abheenego. 20 Nawe, mumugi muyo Antiokia, abheekirirya abhandi bhanú bhaakenyera-mo, bhaaringa abhantu bha Kipuro na mumugi gwa Kirene. Bheeki bheehigiryanga abhantu amangʼana amajomu gayo eguru ya Omukuru Yeesu, kora kubhantu bhanú bhataringi Abhayahudi.f 21 Obhuturo bhwa Omukuru Waryubha, bhwaringa hamwi nabho, na abhantu abhaaru bhaamwikirirya na okumwihunjurira Omukuru Yeesu.
22 Abhantu bha erikanisa rya Yerusaremu, hanú bheegwa amangʼana eguru ya abheekirirya bha eyo, bhakamutuma Bharinabha agye Antiokia eyo. 23 Hanú yaahika eyo, akarora kya ego Waryubha abhanonkeri abhantu bhayo. Akajomerwa, akabhateremya ega, bhagendererye okumwigwa Omukuru Yeesu kwa omutima gwabho gonsego. 24 Bharinabha yaaringa omuntu wa heene na yaaringa yeejwiri Omutima Omurabhu na eimani. Na abhantu bhanú bhaamwikiriryanga Omukuru Yeesu, bhakaaruha bhukongʼu.
25 Kimwi Bharinabha akagya mumugi gwa Tarso, okumutuna Sauri. 26 Hanú yaamunyoora, akamureeta Antiokia hayo. Ego, Bharinabha na Sauri bhakeekara na abheekirirya bhayo, kwa eribhaga rya omwaka omugima. Bhakabha bhareehigirya abhantu abhaaru. Na Antiokia hayo, nho abheekirirya bha Yeesu, bhaamba okubhirikirwa ega, Abhakiristu.
27 Kuginsiku giyo, abharooti okurwa Yerusaremu bhakaaja Antiokia. 28 Na oumwi waabho, yaabhirikirwanga Agabho. Agabho uyo, yeemirira embere ya abheekirirya bha Yeesu, akaruusya obhurooti kwa obhuturo bhwa Omutima Omurabhu ega, enjara enduru eraaja okwibhuka mukyaro kyonsego. Enjara iyo, ngʼyo irya yeebhuka, eribhaga rinú Kaisarig Kiraudio yaaringa aratunga. 29 Okurekana na obhurooti bhuyo, abheekirirya bha Yeesu bhakaamura ega, kira oumwi waabho, okuringʼaana na obhuturo bhwaye, aruusye omusororyo, naho okubheera emirimu Abhakiristu abharikyabho, bhanú bhaaringa bhamenyeri mukyaro kya Yudea. 30 Mbe, bhakakora ego, bhakahaana Bharinabha na Sauri omusororyo guyo, naho bhaguhire kubhakangati bha erikanisa rya Yerusaremu.