Petero aratuuribhwa mwigereja
12
Kuginsiku giyo, omukama Herode Agiripaa akaamba okubhanyankya abheekirirya abhandi bha erikanisa. 2 Akaamura ega, Yakobhob omumura waabho Yoana yeetwe kwa omuhyu. 3 Hanú yaarora ega, ekikorwa kiyo kijomeeri Abhayahudi, akaamura ega, Petero wonse agwatwe. Gayo gonsego gaakoreka, eribhaga rya enyangi ya emikaate ginú gitakutuurwa-mo ekimera.c 4 Hanú yaamara okumugwata, akaamura ega, Petero atuurwe mwigereja. Akamugwatya kumiganda ena gya abhasirikare bhane bhane, naho bhamwangararire bhujomu. Yeendanga okumubhuturira ekiina embere ya abhantu, hanú enyangi ya Epasaka ya emikaate ginú gitakutuurwa-mo ekimera ekaahweri. 5 Petero hanú yaaringa mwigereja, abheekirirya bhaaringa bharakora ekituunyo okumusabhira ku Waryubha.6 Obhutiku bhwa okwimukira orusiku runú omukama Herode yaaringa yaamwiri okumubhuturira ekiina, Petero yaaringa abhoherwe na eminyororo ebhiri, areeri gati ya abhasirikare bhabhiri. Abhasirikare abhandi, bhaaringa bharaangararira kukiseku kya kibhara wa erigereja.
7 Rumwigo, maraikad wa Omukuru Waryubha akeemirira mukinyumba kinú Petero yaaringa-mo. Endingaasi ekamirika mukinyumba muyo. Maraika uyo, akakuunʼya Petero mumbaru okumubhuukya, aramukeerya ega, “Imuka bhwangu!” Rumwigo eminyororo ginú gyaringa gimubhoheri kumabhoko, gikabhutuka, gikagwa hansi. 8 Kimwi maraika uyo, akamukeerya ega, “Ibhoha emyenda gyaho na eginkeeto gyaho.” Petero hanú yaamara okwibhoha, maraika akamukeerya ega, “Ikundikirya ekabhuuti yaaho, unsoorane!” 9 Petero akarwa mwigereja muyo, arasoorana na maraika uyo. Petero ataamanya ega, ganú gaakorekanga gaaringa ga obhuheene. Yaakanyanga ega, yaaringa ararora obhurori. 10 Petero na maraika uyo, bhakahita kumurindi wa okwamba, na owa kabhiri, bhakahika mukiita kya ekyuma ekya okusohera mumugi. Ekiita kiyo, kikabhasiikukira ekyene, bhakarwa mwigereja. Hanú bhaahita kunjira eimwi, rumwigo maraika uyo, akamutiga Petero.
11 Petero hanú yeetakya, akagamba ega, “Bhoono mmanyiri m-maheene ega, Omukuru Waryubha yaantumiiri maraika waaye, naho yantuurye okurwa mumabhoko ga Herode, na okurwa mumeetegeerero ga Abhayahudi.”
12 Petero hanú yaamara okumanya gayo, akagya owa Mariamu, ngʼina waabho Yoana. Yoana uyo eriina erindi yaabhirikirwanga Mariko. Abhantu abhaaru bhaaringa bhasikeeni hayo okumusabha Waryubha kurusumo rwa Petero. 13 Petero arasiikurya mukiita kya kibhara. Omuhara umwi omukori wa emirimu, unú yaabhirikirwanga Roda, akaaja okwitegeerera ega, niwi. 14 Nawe, hanú yaamanya ega, eriisi riyo ni-rya Petero, akajomerwa bhukongʼu, akakenya akasoha munyumba, akarabhirwa kora okumusiikurira. Akabhakeerya bhonsego ega, “Petero aringi mukiita!”
15 Bheeki bhakamukeerya ega, “Odangeeni!” Nawe, omuhara uyo, akagendererya okubhakomererya ega, m-maheene. Bhonse bhakagamba ega, “Uyo m-maraika waaye.” 16 Eribhaga riyo, Petero yaagendereryanga okusiikurya ekiita. Hanú bhaasiikura, bhakamurora, bhakaruguura bhukongʼu. 17 Petero akabhoorokya kwa okubhoko ega, bhakire, akabhatondera kya ego Omukuru amuruusirye mwigereja. Akagendererya okubhakeerya ega, “Amangʼana ganu, mukeerye Yakobho na abhahiiri bheetu abhandi kuimani.” Kimwi Petero akarwa hayo, akagya ahasi ahandi.
18 Hanú bhwakya, abhasirikare bha mwigereja bharya, bhakagwatwa na obhoobha obhwaru eguru ya kinú kimunyooreri Petero. 19 Herode akaamura ega, atunwe, nawe, ataatuuka. Kwa ego, akaamura ega, abharindi bharya, bhabhuuribhwe. Kimwi akaamura ega, bheetwe. Eribhaga erindi Herode akahiringita okurwa mukyaro kya Yudea okugya mumugi gwa Kaisaria, akeekara eyo, eginsiku nkego.
Oruku rwa omukama Herode
20 Mbe, Herode Agiripa yaaringa ajimiibhwe bhukongʼu na abhantu bha emigi gya Tiro na Sidoni. Ego, abhantu bha emigi ebhiri giyo, bhaagwatana hamwi, bhakatuna okusikana nawe. Abhantu bhayo bhaaringa bheekiririibhwe na Bhurasito. Bhurasito uyo, ngʼo yaaringa omuntu wa haangʼi na Herode, na yaaringa omwimiririri wa amangʼana gaaye. Bhaasabha ameekiriranʼyo ga omurembe, kwa okubha ebhyaro bhyabho, bhyeesigiranga ebhyakurya okurwa mukyaro kya omukama uyo.
21 Orusiku runú omukama Herode yaasora okumaahana na okusikana na abhantu bhayo, yeebhoha emyenda gyaye gya ekikama, akeekara kukitumbi kyaye kya ekikama, akaamba okugamba embere ya abhantu bhonsego. 22 Abhantu bhanú bhaaringa bheekumeenʼye hayo, bhakamukiririrya bharagamba ega, “Riyo ritaringi eriisi rya omuntu! Ni-riisi rya omusambwa gwetu!” 23 Kwa okubha Herode ataamugungya Waryubha,e hayohayo, maraika wa Omukuru Waryubha akamujibhya. Kwa ego, eginjoka gikamusakara bhukongʼu okuhikira akakwa.