Korinerio aramubhirikira Petero
10
Mumugi gwa Kaisaria, yaaringa-mo omwimiririri umwi wa abhasirikare. Omwimiririri uyo, yaabhirikirwanga Korinerio. Weeki yeemiririranga omuganda gwa abhasirikare egana rimwi, mumuganda omunene, gunú gwabhirikirwanga ega, Omuganda gwa Ekiitaaria. 2 Omukuru uyo, yaaringa omwigwa ku Waryubha, hamwi na abhantu bhonsego bhanú bhaaringa iika owaaye. Yaamusabhanga Waryubha kira eribhaga. Hamwi na gayo, yaaringa arabhabheera bhukongʼu abhatobhu.3 Orusiku rumwi, muna ensa kenda gya omubhasu, Korinerio yaarora obhurori. Mubhurori muyo, yaarora ega, maraika wa Waryubha amwibhukiiri. Maraika uyo, akamubhirikira ega, “Korinerio!” 4 Korinerio akamumaahirira maraika kwa obhoobha, kimwi akamubhuurya ega, “Omukuru, niki kibheeri?”
Maraika uyo, akamukeerya ega, “Waryubha yeegwiri amasabho gaaho na aruuji kya ego orabheera abhatobhu. Gayo gonsego, aragahiituka murwire eyo. 5 Kwa ego bhoono, tuma abhantu nyabhurebhe bhagye mumugi gwa Yoopa. Eyo, ariyo omuntu umwi unú arabhirikirwa Simoni, eriina erindi arabhirikirwa Petero, bhamukeerye yaaje. 6 Weeki m-mugeni wa omukori wa ebhintu bhya amaseero unú arabhirikirwa ega, Simoni. Enyumba yaaye eringi embarika wa enyanja.”
7 Maraika uyo, hanú yaamara okukeerya Korinerio amangʼana gayo, akagya gyaye. Kimwi Korinerio akabhabhirikira abhakori bha emirimu abhabhiri, na omusirikare umwi, okurwa kubharya bhaamukoreranga emirimu, unú yaaringa omwigwa ku Waryubha. 8 Korinerio hanú yaamara okubhakeerya gonsego ganú geebhuka, akabhatuma bhagende mumugi gwa Yoopa.
Petero aramaaha obhurori
9 Ejo wendeko, hanú abhantu abhasatu bhayo, bhaahika haangʼi na omugi gwa Yoopa, Petero akariina eguru ya enyumbaa okumusabha Waryubha. Eribhaga riyo, yaaringa muna ensa esansabha gya omubhasu. 10 Hanú yaaringa arasabha, akeegwa omweko, akeegomba okunyoora ebhyakurya. Eribhaga bhaaringa bharamukorera ebhyakurya, akarora obhurori. 11 Mubhurori muyo, yaarora orwire rurasiikuka, na ekintu kya eshuuka enene, ereetuumibhwa hansi enu egwatirwe mbaara gyaye ena gyonsego. 12 Mushuuka muyo, gyaringa-mo egintyenyi amanga amaaru, egintyenyi egya amaguru gane, egintyenyi ginú gireengʼuurira enda, na ebhinyonyi.
13 Hayo, Petero akeegwa eriisi, riramukeerya ega, “Petero, imuka! Ogooge orye!” 14 Nawe, Petero akamukyukya ega, “Tiigo-ha, Omukuru! Ntaakariiri ebhyakurya bhyobhyonse bhinú amaragiriryo ga Musa garaanga ega, m-mugiro!”b 15 Eriisi riyo, rikamukeerya kweki ega, “Otige okubhirikira ebhintu bhinú Waryubha yaaraama, ega, m-mugiro.” 16 Eriisi riyo, rikeehindira mara kasatu. Nho, eshuuka irya, ekahindibhwa murwire.
17 Hanú Petero yaaringa akyaruguura eguru ya ensonga ya obhurori bhuyo, abhantu abhasatu bharya bhaatumwa na Korinerio, bhakabha bhoorokiibhwe enyumba ya Simoni. Bhaaringa bheemiriiri embere wa ekiseku. 18 Bhakasiikurya na bhakabhuurya ega, “Omugeni, unú arabhirikirwa Simoni eriina erindi Petero, aringi hanu?” 19 Na eribhaga Petero yaaringa akyeeganirirya eguru ya ensonga ya obhurori bhurya, Omutima Omurabhu akamukeerya ega, “Itegeerera! Abhantu abhasatu bharingi hanu, bharakutuna. 20 Ituuma hansi, ogye hamwi nabho. Otakoobhoha, kwa okubha nooni omwene mbatumiri kuuwe.”
21 Petero akeetuuma hansi, akakeerya abhantu bhayo ega, “Oni nooni muratuna. Muranyendera-ki?” 22 Bhakamukeerya ega, “Tutumirwe na omukuru umwi wa abhasirikare. Omukuru uyo, arabhirikirwa Korinerio. Weeki aragungibhwa bhukongʼu na Abhayahudi bhonsego, kwa okubha aramwigwa Waryubha, na m-muntu wa heene. Bhoono aragiririibhwe na maraika wa Waryubha ega, akugenihye iika owaaye, naho yeetegeerere amangʼana ganú oraamukeerye.” 23 Mbe, Petero akabhagenihya munyumba, akabhahaana ahasi ha okuraara obhutiku bhurya.
Petero munyumba ya Korinerio
Ejo wendeko, Petero na abhasatu bharya, bhakaamba orugendo na abheekirirya abhandi okurwa Yoopa, bhaasoorana nawe. 24 Orusiku rwa kabhiri, bhakahika mumugi gwa Kaisaria. Hanú bhaahika, bhakanyoora Korinerio arabhaganyirira hamwi na abhahiiri na abhasaani bhaaye bhanú yaaringa araarikiri.
25 Hanú Petero yaasohanga owa Korinerio, Korinerio akamuturuungʼana, akamwigamira, akahiinya obhusu hansi, okumusyengera. 26 Nawe, Petero akamwimirirya akamukeerya ega, “Imirira! Oni nonse m-muntu kya uuwe!” 27 Kimwi Petero akasoha hamwi na Korinerio munyumba enu bharahaira, akanyoora abhantu abhaaru bheekumeenʼye munyumba muyo. 28 Petero akabhakeerya ega, “Bheenyu mumanyiri bhujomu ega, amaragiriryo geetu, garatukaanʼya okwisanganʼya kora okubhataarira abhantu bhanú bhataringi Abhayahudi. Nawe, Waryubha yankanirye ega, ntamubhirikira omuntu wowonse ega, m-mukonu kora atakwenderwa. 29 Kiyo nkyo kikoreri niijiri hanú mumbirikiiri, ntaangiri. Bhoono ndabhabhuurya ega, mumbirikiriri-ki?”
30 Korinerio akamukeerya ega, “Eginsiku esatu ginú gyahitiri, naaringa munyumba ndamusabha Waryubha, kwibhaga kya rinurinu rya ensa kenda gya omubhasu. Rumwigo, nkarora omuntu areemirira embere waani, yeebhoheri emyenda ginú girangʼesangʼesa. 31 Omuntu uyo, akankeerya ega, ‘Korinerio, Waryubha yeegwiri amasabho gaaho, arahiituka kya ego orabheera abhatobhu. 32 Kwa ego, bhoono otume abhantu mumugi gwa Yoopa, bhamureete Simoni, eriina erindi ngʼo Petero. Weeki m-mugeni wa Simoni, omukori wa ebhintu bhya amaseero, enyumba yaaye eringi embarika wa enyanja.’ 33 Kiyo nkyo kyakora nkatuma abhantu kuuwe rumwigo. Okoreri bhujomu okuuja. Mbe, bhoono bheetu bhonsego, turingi hanu embere ya Waryubha, naho twigwe amangʼana ganú Omukuru akutumiri okutukeerya.”
34 Hayo, Petero akakeerya abhantu bhayo ega, “Bhoono nho mmanyiri ega, heene Waryubha atakusoroora abhantu! 35 Nawe, arabheekirirya abhantu bha ebhigambo bhyonsego bhanú bharamwigwa, na okukora ganú gareenderwa embere waaye. 36 Weeki yaatuma amangʼana gaaye ku Bhaisiraeri arabharaarikira Amangʼana Amajomu ga omurembe kwa okuhitira ku Yeesu Kiristu. Yeesu uyo, ngʼo Omukuru wa abhantu bhonsego. 37 Bheenyu abheene mumanyiri amangʼana ganú geebhuka mukyaro kyonsego kya Yudea. Gaambira Gariraaya, eribhaga Yoana Omubhatiiji yaaraarikiranga abhantu ega, bhabhatiijwe. 38 Mumanyiri ega, Waryubha yaamusora Yeesu wa Najareeti, kwa okumuhaana Omutima Omurabhu, na obhuturo. Yeesu yeenaaranga eyo na eyo, arakora amangʼana amajomu na okuhwenʼya bhonsego bhanú bhaanyankibhwanga na eginguru gya Erisambwa, kwa okubha Waryubha yaaringa hamwi nawe.
39 “Na bheetu mbo abheemiririri bha amangʼana gonsego ganú Yeesu yaakora mukyaro kya Abhayahudi, na mumugi gwa Yerusaremu. Kimwi akeetwa kwa okubhambwa kumusarabha. 40 Nawe, orusiku rwa kasatu okurwa okukwa kwaye, Waryubha yaamuhyukya, akamoorokya kubhantu. 41 Ataamaahwa na abhantu bhonsego, nawe Waryubha yaasora abheemiririri okumurora. Abheemiririri bhayo, mbo bheetu. Hanú Yeesu yaamara okuhyuka, twamurora, twarya na okunywa hamwi nawe. 42 Yaaturagirirya okwihigirya abhantu, Amangʼana Amajomu, okuraarika ega, weeki ngʼo yaatuurwa na Waryubha, abhabhuturire ekiina abhahoru na abhaku. 43 Abharooti bhonsego bhaagamba eguru yaaye ega, omuntu wowonse unú arimwikirirya, aryabhirwa obhusarya bhwaye bhonsego, okuhitira kuweeki.”
44 Petero hanú yaaringa akyahaira amangʼana gayo, Omutima Omurabhu akabheetuumira bhonsego bhanú bhaamwitegeereranga. 45 Abhayahudi bhanú bhaamwikirirya Yeesu, bhanú bhaaja na Petero okurwa Yoopa, bhakaruguura bhukongʼu, okurora Waryubha ahumiriri Omutima Omurabhu kora kubhantu bhanú bhataringi Abhayahudi. 46 Bhaamanya ego, kwa okubha bheegwa abhantu bhayo, bharahaira kwa ebhigambo ebhindi, na okumugungya Waryubha.
Nho, Petero akakyukya ega, 47 “Abhantu bhayo bhanyooreri Omutima Omurabhu kya ego bheetu twanyoora. Bhoono, niwi aratura okubhakaanʼya bhatabhatiijwa kwa amanji?” 48 Kwa ego, Petero akaragirirya ega, bhabhatiijwe kwa eriina rya Yeesu Kiristu. Kimwi bhakamusabha Petero yeekare nabho kwa eginsiku nkego.