Sauri aratuuribhwa
9
Eribhaga riyo ryonsego, Sauri yaagendereryanga na ebhigoso bhyaye bhya okwita abheekirirya bha Omukuru Yeesu. Orusiku rumwi, akagya kumusyengeri omukuru, 2 akamusabha amuhaane enyarubha ya obhumanyiiriryo, agye nayo mumasinagogi ga mumugi gwa Damasikasi. Yaakora ego, naho hanú araanyoore eyo, abhasaaja kasi abhakari bhanú bharagwata Enjira ya Omukuru Yeesu, ature okubhabhoha, abhareete mumugi gwa Yerusaremu.3 Nho, Sauri akaamba orugendo rwa okugya Damasikasi. Hanú yaaringa ahikiri haangʼi na omugi guyo, rumwigo, endingaasi enduru okurwa murwire, ekamumirika mbaara gyonsego. 4 Kimwi akagwa hansi, akeegwa eriisi riramubhuurya ega, “Sauri, Sauri! Ndeegwa orannyankya?” 5 Sauri wonse akabhuurya ega, “Omukuru, uuwe nuuwe-wi?” Eriisi rirya rikakyukya ega, “Oni nooni Yeesu, unú oranyankya! 6 Bhoono, imirira! Genda osohe mumugi guyo, oraakeeribhwe kinú oreenderwa okukora.”
7 Abhasaaja bharya bhaagendanga nawe hamwi, bhakakira kiri, bhakaruguura kwa okubha bheegwa eriisi, nawe, bhataamurora omuntu wowonse unú yaahairanga. 8 Kimwi Sauri akeemirira, na hanú yaasakya okumogora, ataarora ekintu. Mbe, abharikyaye bhakamoorokererya kwa okumugwata okubhoko, bhakamusohya Damasikasi. 9 Akeekara muyo, eginsiku esatu bira okurora. Na eribhaga riyo, ataaryanga kora okunywa ekintu kyokyonse.
10 Mbe, Damasikasi eyo, yaaringa-yo omwikirirya umwi wa Omukuru Yeesu. Omwikirirya uyo, yaabhirikirwanga Anania. Omukuru Yeesu, akamubhirikira Anania mubhurori ega, “Anania!” Wonse akeetabha ega, “Omukuru, ndingi hanu.” 11 Kimwi Omukuru akamukeerya ega, “Imuka ogende kunjira inú erabhirikirwa ega, ‘Enyoroku’. Obhuurye munyumba ya Yuda, omuntu unú yaarwiriri mumugi gwa Tarso. Omuntu uyo, arabhirikirwa Sauri. Rora bhoono aramusabha Waryubha. 12 Yaarora mubhurori ega, uuwe Anania, orasoha munyumba na okumutuurira amabhoko, naho arore kweki.”
13 Nawe, Anania akakyukya ega, “Omukuru, neegwiri okurwa kubhantu abhaaru, kya ego Sauri uyo, yaaringa aranyankya abheekirirya bhaaho, mumugi gwa Yerusaremu eyo! 14 Na bhoono yaajiri Damasikasi hanu, na obhutungi okurwa kubhasyengeri abhakuru, naho abhabhohe bhonsego bhanú bharasabhanga kuriina ryaye.” 15 Nawe, Omukuru akamukeerya Anania ega, “Uuwe genda! Omuntu uyo, mmusoreri abhe omugaya waani, naho araarike eriina ryani kubhantu bhanú bhataringi Abhayahudi na abhakama bhaabho, na ku Bhaisiraeri abheene. 16 Oni omwene ndaamoorokye, kya ego areenderwa okunyanka bhukongʼu, kurusumo rwa eriina ryani.”
17 Kimwi Anania akagya, akasoha munyumba iyo. Akatuura amabhoko gaaye eguru ya Sauri, na akamukeerya ega, “Omuhiiri waani Sauri, hanú waaringa oraaja enu, Omukuru Yeesu yaakwibhukira kunjira. Bhoono weeki yantumiri kuuwe, naho oture okurora kweki, na wijuribhwe Omutima Omurabhu.” 18 Rumwigo, ebhintu kya ebhikamba, bhikagwa okurwa mumeeso ga Sauri. Wonse akatura okurora kweki. Kimwi akeemirira, akabhatiijwa. 19 Hanú yaamara okurya ebhyakurya, akanyoora eginguru kweki.
Sauri areehigirya abhantu eguru ya Yeesu//mumugi gwa Damasikasi
Sauri yeekara na abheekirirya bha Yeesu bhanú bhaaringa Damasikasi eyo, kwa eribhaga rya eginsiku nkego. 20 Rumwigo, akaamba okuraarika mumasinagogi, eguru ya Yeesu, ega, Yeesu ngʼo Omwana wa Waryubha.a 21 Abhantu bhonsego bhanú bheegwa amangʼana ga Sauri, bhakaruguura bhukongʼu. Bhakabhuuranʼya ega, “Omuntu unu, ti-urya yeetanga abhantu bhanú bharasabhanga kuriina rya Yeesu, Yerusaremu erya? Na yaaja hanu, kwa ekisigo kiyo, naho abhabhohe na abhahire kubhasyengeri abhakuru!” 22 Nawe, Sauri akagendererya okunyoora eginguru, akabharuguurya Abhayahudi bhanú bhaaringa bhamenyeri Damasikasi kwa okukomererya ega, Yeesu ngʼo Kiristu Omutuurya. Yaatumiranga Amangʼoore Amarabhu, okuhikira bhakatamwa okuhakaana.
23 Eginsiku eginjaru hanú gyahita, Abhayahudi bhakakora ekiina kya okumwita Sauri. 24 Bhakabha bharamugunyira mubhiita bhya omugi guyo, obhutiku na omubhasu, naho bhamwite. Nawe, Sauri akakeeribhwa ekiina kiyo. 25 Obhutiku bhumwi, abheehigira bhaaye bhakamusohya mugukapo ogunene gunú gwaringa gubhoherwe egingoye. Kimwi bhakamuhitirya mukisyeri ekinene, kurugito runú rwaringa rwinaariri omugi, bhakeetuumya ogukapo kibhara wa omugi kwa egingoye girya, akagya.
Sauri aragya Yerusaremu
26 Nho Sauri akagya mumugi gwa Yerusaremu.b Hanú yaahika eyo, akasakya okwisanganʼya na abheehigira bha Yeesu. Nawe, bhonsego bhaamoobhoha, kwa okubha bhataaringa bhareekirirya ega, heene abheeri omwikirirya wa Yeesu. 27 Nawe Bharinabha, akamugega Sauri akamuhira kubhatumwa. Akabhatondera kya ego Sauri yaamurora Omukuru Yeesu kunjira, eribhaga yaagyanga Damasikasi, na kya ego Omukuru yaagamba nawe. Kweki akabhatondera kya ego yeehigirya abhantu kwa obhuteremu, Damasikasi erya, eguru ya Yeesu.
28 Mbe, Sauri akeekara na abhatumwa bhayo, mumugi gwa Yerusaremu. Yeenaaranga nabho hamwi, areehigirya abhantu kwa obhuteremu, eguru ya Omukuru Yeesu. 29 Kwa eribhaga, yaaringa arahaira na okubhuuranʼya na Abhayahudi, bhanú bhaahairanga Ekiyunani, nawe, bheeki bhaasakya okumwita. 30 Abhahiiri abhandi kuimani hanú bhaamanya amangʼana gayo, bhaamuhira mumugi gwa Kaisaria, kimwi bhakamutuma agye mumugi gwa Tarso.
31 Kuginsiku giyo, erikanisa ryabha na omurembe mbaara gyonsego gya ebhyaro bhya Yudea, Gariraaya, na Samaria. Abheekirirya bhaagendererya okunaga na okumwigwa Omukuru Yeesu. Na kwa obhuhorisya bhwa Omutima Omurabhu bhaagendererya okwaruha.
Ainea arahwenibhwa
32 Petero hanú yeenaaranga kira ahasi, orusiku rumwi yaahika mumugi gunú gurabhirikirwa Ruda, okubhataarira abheekirirya bha mumugi muyo. 33 Mumugi muyo, yaanyoora-mo omuntu umwi. Omuntu uyo, yaabhirikirwanga Ainea. Weeki yaaringa m-murweri wa omujimu, na kwa eribhaga rya emyaka munaane, ataakarwiri kubhuriri. 34 Petero akamukeerya Ainea ega, “Yeesu Kiristu arakuhwenʼya! Imirira, obharye obhuriri bhwaho.” Rumwigo, Ainea akeemirira. 35 Mbe, abhantu bhonsego bha Ruda, na muriruuma rinú rirabhirikirwa Saroni, hanú bhaamurora Ainea, bhakamwihunjurira Omukuru Yeesu.
Petero aramuhyukya Dorikasi
36 Mumugi gunú gurabhirikirwa Yoopa, yaaringa-mo omukari umwi, omwihigira wa Yeesu. Omukari uyo, yaabhirikirwanga Tabhitha. Eriina ryaye mu Kiyunani ngʼo Dorikasi, ensonga yaaye, n-dusara. Weeki yaaringa arabheera abhatobhu, kweki yaaringa arakora ebhikorwa ebhijomu. 37 Eribhaga riyo, Dorikasi yaarwara, akakwa. Abhantu bhakoogya omubhiri gwaye, bhakamuraarya mukinyumba kya muginyumba ginú giikarireeni. 38 Eribhaga riyo, abheekirirya bheegwa ega, Petero yaaringa Ruda. Bhakatuma abhasaaja bhabhiri ku Petero, kwa okubha omugi gwa Ruda gwaringa haangʼi na omugi gwabho gwa Yoopa. Abhasaaja bhayo, bhakamukeerya Petero ega, “Turakukomererya, uuje mumugi gwetu otakaatigita!”
39 Mbe, Petero akeemuka, akagya hamwi nabho. Hanú yaahika Yoopa, bhakamuhira mukinyumba kirya. Eyo abhasino abhaaru bhakamwinaara bhonsego, bhakabha bharakuura. Bhakamoorokya eginkanju, na emyenda egindi ginú Dorikasi yaatumanga eribhaga yaaringa omuhoru.
40 Petero akabhahurukya kibhara bhonsego. Akatema hansi ebhiru, akamusabha Waryubha. Kimwi akeekyukirya omuku urya, akagamba ega, “Tabhitha, hyuka!” Tabhitha akamogora, akamurora Petero, akeekara. 41 Petero akamugwata okubhoko, akamwimirirya. Kimwi akabhirikira abhasino bharya na abheekirirya abhandi, akamugwatya kubheene enu aringi omuhoru. 42 Amangʼana gayo, gaamanyikana bhukongʼu mumugi gwa Yoopa gonsego. Abhantu abhaaru bhakamwikirirya Omukuru Yeesu. 43 Mbe, Petero yeekara Yoopa hayo, eginsiku eginjaru, yeekaranga munyumba ya owa omukori wa ebhintu bhya amaseero, unú yaabhirikirwanga Simoni.