Sitefano areebhagirira mwibharaja erikuru
7
Kimwi, omusyengeri omukuru akabhuurya Sitefano ega, “Amangʼana gayo bhagambiri n-ga maheene?” 2 Sitefano akagamba ega, “Abhahiiri bhaani na bhataata, munyitegeerere! Waryubha owa obhukuru yaamwibhukira jaaji weetu Abhurahamu, hanú yaaringa akyari mukyaro kya Mesopotamia. Eribhaga riyo, yaaringa akyari okungʼaanyira mumugi gwa Haraani. 3 Waryubha akamukeerya ega, ‘Orwe mukyaro kyaho, otige abhahiiri bhaaho, na ogye mukyaro kinú ndikoorokya.’a 4 Nho, Abhurahamu akangʼaanya mukyaro kyaye kya Abhakaridaayo, akagya okumenya mumugi gwa Haraani. Hanú esewaabho yaaja okukwa, Waryubha akamungʼaanyirya mukyaro kinú mumenyeri bhoonwego.5 “Waryubha ataamuhaana Abhurahamu engabho yoyonse, kora ahasi ahake, mukyaro kinu. Nawe, akamuraga okumuhaana ekyaro kinu, kibhe ekyaye na ekya orwibhuro rwaye, onyoora eribhaga riyo, ataaringa na omwana. 6 Waryubha akamukeerya Abhurahamu ega, ‘Abheebhurwa bhaaho, bharibha abhageni mukyaro ekindi. Abhantu bha ekyaro kiyo, bharibhakora okubha abhagaya bhaabho na bharibhanyankya bhukongʼu, kwa eribhaga rya emyaka magana gane.’ 7 Nawe, Waryubha akagamba ega, ‘Abhantu bha ekyaro kiyo, ndibhabhuturira ekiina oni. Na hanú gayo garihwa, ndibharuusya abheebhurwa bhaaho mukyaro kiyo, naho bhaaje hanu okunsyengera.’b 8 Nho, Waryubha akakora eriragano na Abhurahamu, kwa enjira ya okusaara abhaana bha ekimura. Ego, Abhurahamu akeebhura Esaaka, akamusaara orusiku rwa munaane, okurwa okwibhurwa kwaye. Esaaka wonse, akeebhura Yakobho, akamusaara. Na Yakobho wonse akeebhura abhamura ekumi na bhabhiri, kimwi akabhasaara. Na bhayo mbo bhajaaji weetu bharya ekumi na bhabhiri.
9 “Bhajaaji weetu bhayo, bhakamukorera orwango Yusufu omuhiiri waabho, bhakamugurya abhe omugaya mukyaro kya Misiri. Nawe, Waryubha yaaringa hamwi nawe. 10 Akamutuurya muginyanko gyonsego ginú yaanyooranga. Akamuhaana egintungwa na akamuseemya okuhikira okuhanjwa na Farao, omukama wa Misiri. Farao akamukora okubha omutungi omukuru mukyaro kiyo. Kweki akamukora okubha omwimiririri wa bhonsego munyumba yaaye ya ekikama.
11 “Mbe, enjara enduru ekabha mukyaro kyonsego kya Misiri na ekya Kanaani, abhantu bhakanyanka bhukongʼu. Bhajaaji weetu bhakabhurwa ebhyakurya. 12 Yakobho akeegwa ega, egingano giringi mukyaro kya Misiri. Hanú yeegwa ego, akatuma-yo abhamura bhaaye. Na ruyo, ndo rwaringa orusiku rwa mbere kubhajaaji weetu okugya eyo. 13 Kurugendo rwabho orwa kabhiri, Yusufu akeetonda kubhahiiri bhaaye, na bhonse bhakamanyikana ku Farao. 14 Kimwi, Yusufu akatuma amangʼana ku Yakobho esewaabho ega, yaaje Misiri, hamwi na abhahiiri bhaaye bhonsego. Bhayo, bhaaringa mirongo muhungati na bhataanu (75). 15 Nho, Yakobho akagya Misiri, akakwira eyo. Bhajaaji weetu bhonse bhaakwira Misiri eyo. 16 Amaguha gaabho, gakahunjukibhwa mumugi gwa Shekemu, gakabhiikwa mumbihira ya erisana rinú Abhurahamu yaaringa aguriri kwa egimbirya nyabhurebhe, okurwa kubhaana bha Amoori.
17 “Mbe, eribhaga hanú ryahika haangʼi, naho Waryubha amare ganú yaaringa amuragiri Abhurahamu, abhantu bharya bhakagendererya okwaruha bhukongʼu Misiri eyo. 18 Kubhuteero, omukama oundi akaamba okutunga, weeki ataaringa amanyiri ekintu eguru ya Yusufu. 19 Omukama uyo, yaaringa arabharaarira bhajaaji weetu, na yaaringa arabhakorera amabhiibhi, kwa okwamura bheese abhaana bhaabho abharera, naho bhakwe.
20 “Eribhaga riyo, ndyo Musa yeebhurwa. Yaaringa omwana unú angʼariiri Waryubha bhukongʼu. Akatugwa iika na abheebhuri bhaaye kwa eribhaga rya emyeri esatu egyenego. 21 Hanú abheebhuri bhaaye bhaatamwa okugendererya okumubhisa, bhakamwesa kibhara. Omuhara wa Farao akamubhooja. Akamutuga kya omwana waaye. 22 Musa akeehigiribhwa amangʼana gonsego ga egintungwa gya Abhamisiri, akabha owa obhuturo bhwa okumanya amangʼana na ebhikorwa.
23 “Hanú yaahikya obhumuri bhwa emyaka mirongo ena, akabha na enamba mumutima gwaye, okugya okumaahana na abhahiiri bhaaye Abhaisiraeri. 24 Eyo, akamurora Omwisiraeri omurikyaye areehonerwa na Omumisiri. Musa akamubheera omuhiiri waaye uyo yeehonerwanga, na kwa okuriha ekisiiyomba, akeeta Omumisiri urya. 25 Musa yaaringa arakanya ega, abhahiiri bhaaye Abhaisiraeri, bhakaamanyiri ega, Waryubha aribhatuurya okurwa mubhugaya, kwa okumutumira weeki. Nawe, bhataaringa bhamanyiri ego. 26 Ejo wendeko, akanyoora Abhaisiraeri bhabhiri bhararwana. Akasakya okubheegwanʼya, arabhakeerya ega, ‘Bhamure, bheenyu m-bahiiri! Ndeegwa muranyahaarana?’ 27 Nawe, urya yaaringa aranyahaara omurikyaye, akasukuma Musa embarika, enu aragamba ega, ‘Uuwe otaringi omutungi kora omubhuturi wa ekiina weetu! 28 Oreenda okunyita kya ego weetiri Omumisiri urya ejo?’c 29 Musa hanú yeegwa ego, akangʼosera mukyaro kya Midiani. Akamenya mukyaro kya obhugeni eyo, na akeebhura-yo abhaana bhabhiri.
30 “Mbe, emyaka mirongo ena hanú gyahwa, okurwa hanú yaangʼosera Midiani, akeebhukirwa na maraika wa Omukuru Waryubha kukibhara, haangʼi na enkuku ya Sinai. Maraika uyo, yaaringa kukisaka kinú kyookanga omururo. 31 Hanú yaarora ekika kiyo, akaruguura bhukongʼu. Na hanú yaakisuntarira okukiikomya bhujomu, akeegwa eriisi rya Omukuru Waryubha riramukeerya ega, 32 ‘Oni nooni Waryubha wa bhajaaji weenyu, Abhurahamu, Esaaka, na Yakobho!’d Hanú Musa yeegwa amangʼana gayo, akarigita kwa obhoobha, ataasakya kweki okumaahirira ekisaka kiyo. 33 Omukuru Waryubha akamukeerya ega, ‘Ruusya eginkeeto gyaho, kwa okubha hayo wimiriiri n-hasi aharabhu. 34 Heene nduuji kya ego abhantu bhaani bharanyankibhwa mukyaro kya Misiri. Nigwiri ekiriro kyabho. Kwa ego, nituumiri okurwa murwire, mbatungurye okurwa mubhugaya. Mbe bhoono, ndakutuma Misiri eyo.’e
35 “Musa unu, ngʼo Abhaisiraeri bhaanga, bhakamukeerya ega, ‘Uuwe otaringi omutungi na omubhuturi wa ekiina weetu!’ Nawe, Musa ngʼo yaatumwa na Waryubha abhe omutungi waabho na omutuurya waabho. Waryubha yaamutuma okuhitira kumaraika unú yaamwibhukira kukisaka kirya. 36 Musa ngʼo yaabharuusya Abhaisiraeri mukyaro kya Misiri, kwa enjira ya okukora ebhimanyiiriryo na ebhiruguuryo ebhyaru mukyaro kiyo, na munyanja ya Shamu. Yaagendererya okukora gayo kukibhara eyo, kwa eribhaga rya emyaka mirongo ena. 37 Musa uyo, ngʼo yaabhakeerya Abhaisiraeri ega, ‘Gati yeenyu, Waryubha aribhasorera omurooti kya oni.’f 38 Weeki ngʼo yaaringa yeekumeenʼye hamwi na bhajaaji weetu kukibhara. Ngʼo yaahaira na maraika wa Waryubha munkuku ya Sinai. Ngʼo yaahaanwa amangʼana ga obhuhoru, naho atukeerye bheetu.
39 “Nawe, Abhaisiraeri bhayo, bhajaaji weetu, bhakaanga okumwigwa Musa, bhakamusukumira embarika. Bhakagwatwa na enamba ya okuhunjuka Misiri. 40 Bhakamukeerya Harooni ega, ‘Otukorere ebhisusano bhinú bhyakatoorokereryenga kunjira, kwa okubha, Musa uyo yaaturuusya Misiri, tutamanyiri kinú kyamunyoora.’g 41 Mbe, kuginsiku giyo, bhakakora ekisusano kinú kihunkeeni na ekimoori. Bhakabha bharakiruusirya ekimwenso, na okujomererwa emirimu gya amabhoko gaabho! 42 Kwa ego, Waryubha akeeyahura akabhatiga bhasyengere eryubha, omweri, na eginjota, kya ego engʼoorerwe mukitabho kya abharooti ega,
‘Bheenyu Abhaisiraeri, hanú mweekara kukibhara kwa emyaka mirongo ena,
mutaaringa murangoogera oni egintugo, naho munduusirye ekimwenso!
43 Ahasi hohonse hanú mwagyanga,
mwageganga eribhuru rya okusyengera ekisusano kya omukuru weenyu Moroki,
na ekisusano kya enjota kya Reefani omukuru weenyu,
ebhisusano bhya abhakuru bhinú mweekorera, naho mubhisyengere.
Kwa ego, ndabhahira okubha abhagaya,
ahare okwambuka ekyaro kya Bhabheri.’h”
44 Sitefano akagendererya okugamba ega, “Kukibhara erya, bhajaaji weetu bhayo, bhaagendanga na eribhuru rirya ryoorokyanga okubha-ho kwa Waryubha.i Waryubha yaaringa amukeererye Musa arikore kya ego yaaringa amoorokereerye. 45 Kimwi bhajaaji weetu, enu bharoorokereribhwa na Yoshua, bhakarigega. Bhonse bhakarireeta mukyaro kinú bhaaruusya abhantu bha amakabhira agandi, ganú Waryubha yaakenyia embere ya bhajaaji weetu. Mbe, eribhuru riyo, rikatama mukyaro kiyo okuhikira kwibhaga rya omukama Daudi. 46 Waryubha yaaringa amuhanjiri Daudi, Daudi akamusabha amwikiririrye, naho amuhagaajire enyumba weeki Waryubha wa Yakobho. 47 Nawe, unú yaahagaajira Waryubha enyumba, m-mukama Soromoni.
48 “Kora ego, Waryubha wa eguru ya bhyonsego, weeki atakwikara muginyumba ginú gihagaajirwe kwa amabhoko ga abhantu. N-kya ego amangʼoore ga omurooti garagamba ega,
49 ‘Omukuru Waryubha aragamba ega,
Orwire ndo ekitumbi kyani kya ekikama,
na ekyaro, nkyo ahasi haani ha okutuura amaguru gaani.
Bhoono, murinhagaajira enyumba ya egaki?
Kasi ahasi haani ha okumuunyira haribha-ha?
50 Ti-oni omwene naabhumba ebhintu bhinu bhyonsego?’j”
51 Sitefano akagendererya okugamba ega, “Bheenyu m-bantu bha emitwe emikongʼu! Emitima gyenyu na amatwi geenyu, n-kya aga abhantu bhanú bhatakumwigwa Waryubha. Eginsiku gyonsego murahakaanʼya Omutima Omurabhu, kya ego bhajaaji weenyu bhonse bhaaringa bharamuhakaanʼya. 52 Atariho omurooti kora oumwi unú ataanyankibhwa. Bheeta kora abharooti bha akare bhanú bhaaringa bhararaarika okuuja kwa urya Owa Obhuheene! Na uyo, ngʼo urya bheenyu mwamukorera eniku, mukamwita! 53 Bheenyu mwahaanwa amaragiriryo ga Waryubha kwa enjira ya bhamaraika, nawe mutakugagwata.”
Sitefano areetwa
54 Mbe, abhakuru bha Abhayahudi bhayo, hanú bheegwa amangʼana ga Sitefano gayo, bhakajima bhukongʼu, bhakeerumaruma. 55 Nawe, Sitefano akeejura Omutima Omurabhu, akamaahirira eguru murwire, akarora obhukuru bhwa Waryubha, na Yeesu yeemiriiri orubhaara rwa obhuryo rwa Waryubha. 56 Kimwi akagamba ega, “Mumaahe! Ndarora orwire rusiikwirwe, na Omwana wa Adamuk yeemiriiri orubhaara rwa obhuryo rwa Waryubha!”
57 Hayo, abhakuru bha Abhayahudi bhayo, bhakaribha amatwi gaabho, kwa amabhoko gaabho, enu bharajiirira bhukongʼu. Bhonsego bhakamuhurumukira Sitefano kwa hamwi, bhakamugwata. 58 Kimwi, bhakamuhurukya kibhara wa omugi, bhakaamba okumutema na amagina. Hanú bhaaringa bhakyari okumutema, abheemiririri bhayo, bhakaruusya egikabhuuti gyabho, bhakagitiga kumumura umwi. Omumura uyo, yaabhirikirwanga Sauri.