Abhantu muhungati bharasorwa okubheera abhatumwa
6
Kuginsiku giyo, abheekirirya bha Yeesu bhaagendereryanga okwaruha bhukongʼu. Gati yaabho bhaaringa-ho Abhayahudi bhanú bhaahairanga Ekiyunani,a na Abhayahudi abhandi bhanú bhaahairanga Ekiaramu.b Mbe, Abhayahudi bha Ekiyunani bhakeengʼeheerya ega, kumirimu gya obhugabhi bhwa ebhyakurya bhya kira orusiku, abhasino bhaabho bhataagabhirwanga ebhyakurya na Abhayahudi bha Ekiaramu. 2 Kwa ego, abhatumwa ekumi na bhabhiri bharya, bhakakumanʼya abheekirirya bhonsego, bhakabhakeerya ega, “Etaabhe bhujomu bheetu tutige okwihigirya eringʼana rya Waryubha, kurusumo rwa okubhagabhira abhantu ebhyakurya. 3 Bhoono, abhahiiri bheetu kuimani, musore gati yeenyu abhasaaja muhungati bhanú bhaana eginkuma eginjomu, bhanú bheejwiri Omutima Omurabhu na abha egintungwa. Bhayo, tubhahaane emirimu giyo, 4 naho bheetu tugendererye na emirimu kwa okutumira eribhaga ryetu okumusabha Waryubha, na okwihigirya abhantu eringʼana ryaye.”5 Obhwamuri bhuyo, bhwa okusora abhantu abhandi bha okugabha ebhyakurya, bhwajomera abheekirirya bhonsego bhanú bhaaringa hayo. Mbe, bhakasora Sitefano, omuntu unú yaaringa yeejwiri Omutima Omurabhu na owa eimani bhukongʼu. Kweki bhakabhasora Firipo, Porokoro, Nikanora, Timoni, Parimena na Nikorao wa Antiokia,c unú yaaringa yeehunjwiri akare okusoorana na edini ya Ekiyahudi. 6 Bhakabhareeta abhasaaja muhungati bhayo embere ya abhatumwa. Bhonse bhakabhasabhira enu bhabhatuuriiri amabhoko eguru yaabho okubhanonka.
7 Abheekirirya bhaagendererya okubharaarikira abhantu abhaaru eringʼana rya Waryubha, na erisaabhu ryabho ryagendererya okwaruha bhukongʼu, mumugi gwa Yerusaremu. Kora abhasyengeri abhaaru bhaamwigwa Waryubha kwa okumwikirirya Omukuru Yeesu.
Sitefano aragwatwa na Abhayahudi
8 Mbe, Waryubha yaamunonka Sitefano uyo bhukongʼu, na yaamuhaana eginguru eginjaru, akabha arakora ebhiruguuryo na ebhimanyiiriryo kubhantu. 9 Nawe, Abhayahudi abhandi, bhaaringa bharasakya okuhakaananʼya na Sitefano. Abhandi gati yaabho bhaaringa bha erisinagogid rimwi, rinú ryabhirikirwanga ega, Erisinagogi rya Abhantu bha Obhwiyagaari. Bhayo, bhaaringa bharwiri mumigi gya Kirene na Arekisandiria. Abhandi bhaaringa bharwiri mubhyaro bhya Kirikia na Asia. 10 Nawe, yaabhanga arabhahiga kwa okugamba amangʼana ga egintungwa kwa obhuturo bhwa Omutima Omurabhu.
11 Mbe, Abhayahudi bhayo, bhakangʼeenererya abhantu nyabhurebhe, bhabheehe ega, “Tumwigwiri Sitefano aragamba amangʼana ga okubhatuka Musa na Omukuru Waryubha!”
12 Bhakasiigirirya abhantu, hamwi na abhakaruka bha Ekiyahudi na abheehigirya bha amaragiriryo.e Bhayo bhonsego, bhakamuseeta Sitefano, bhakamugwata, bhakamuhira mwibharaja erikuru rya Abhayahudi. 13 Kweki bhakareeta abheemiririri bha obhubheehi. Abheemiririri bhayo, bhakamuhaamirirya Sitefano ega, “Omuntu unu atakutiga okugamba amangʼana amabhiibhi, eguru ya erisyengerero erirabhu rya Waryubha, na eguru ya amaragiriryo ga Musa.f 14 Twamwigwa aragamba ega, Yeesu wa Najareeti, arihaanyura erisyengerero rya Waryubha riyo, na ega, arikyukya egimiira ginú twahaanwa na Musa.”
15 Abhantu bhonsego mwibharaja muyo, bhakamutungʼaarira Sitefano, bhakarora obhusu bhwaye bhubheeri kya obhwa maraika.