Obhubheehi bhwa Anania na Safira
5
Yaaringa-ho omuntu umwi, omuntu uyo yaabhirikirwanga Anania. Omukari waaye yaabhirikirwanga Safira. Bhayo bhonse bhakagurya omugunda gwabho. 2 Anania akabhisa egimbirya egindi okurwa kuginú bhaanyoora. Omukari waaye wonse, yaaringa yeekirireenʼye nawe okukora ego. Kimwi, Anania akagega egimbirya ginú gyatama, akagya akabhahaana abhatumwa bha Yeesu, akagamba ega, ngyo giyo gyonsego.3 Nawe, Petero akamukeerya ega, “Uuwe Anania! Ndeegwa Erisambwaa risoheri mumutima gwaho, na rikukoreri ogambiri obhubheehi ku Mutima Omurabhu? Ogambiri ega, oreeteri gyonsego, enu weetamiirye egimbirya egindi ginú waanyoora kubhugurya bhwa omugunda! 4 Eribhaga waaringa okyari okugurya omugunda, gwaringa gwaho, na hanú waamara okugugurya, egimbirya giyo, gyaringa gyaho, okaagitumiiri kya ego oreenda. Bhoono, kwaki wamwiri mumutima gwaho, okukora eringʼana kya rinu? Otagambiri obhubheehi kubhantu, nawe, ogambiri obhubheehi ku Waryubha!”
5 Anania hanú yeegwa amangʼana gayo, rumwigo, akagwa hansi, akakwa. Abhantu bhonsego bhanú bheegwa eringʼana riyo, bhoobhoha bhukongʼu. 6 Kimwi abhamura bhakeemirira, bhakagukundikirya ensanda omubhiri gwaye, bhakamuhira kibhara wa omugi, bhakamubhiika.
7 Hanú eribhaga rya muna ensa esatu ryahita, omukari waaye akasoha mukinyumba muyo, ataaringa amanyiri kinú kibheeri-mo. 8 Petero akamubhuurya ega, “Nkeerya, ginu ngyo egimbirya gyonsego ginú mwanyoora hanú mwagurya omugunda gwenyu?” Wonse, akamukyukya ega, “Yee! Twagugurya kwa egimbirya giyo!” 9 Petero akamukeerya ega, “Yaabha egaki, uuwe na omusaaja waaho mweekiriranʼya musakye okungʼeena Omutima Omurabhu wa Omukuru Waryubha? Rora, abhamura bhanú bhabhiikiri omusaaja waaho, bhahunjukiri, bharingi mukiseku hayo, bhaakakuhire kibhara uuwe wonse!”
10 Rumwigo, Safira wonse akagwa hansi embere ya amaguru ga Petero, akakwa hayohayo. Kimwi abhamura bhayo, bhakasoha, bhakanyoora Safira wonse akwiri. Bhakamuhurukya kibhara, bhakamubhiika haangʼi na omusaaja waaye. 11 Eringʼana riyo, ryakora abheekirirya bhonsego, hamwi na abhandi bhonsego, bhanú bheegwa amangʼana gayo, bhoobhohe bhukongʼu.
Abhatumwa bha Yeesu bharakora ebhiruguuryo ebhyaru
12 Abhatumwa bha Yeesu bhayo, bhaakoranga ebhimanyiiriryo na ebhiruguuryo ebhyaru embere ya abhantu. Na abheekirirya bhonsego bhaaringa bhareekumanʼya kwa omutima gumwi, murubhanja rwa erisyengerero erikuru rya Waryubha, mu Ribharaja rya Soromoni. 13 Abhantu bhanú bhataamwikiriryanga Yeesu, bhaaringa bharabhagungya bhukongʼu abheekirirya bhayo, nawe, kora oumwi ataasakya okwisanganʼya hamwi nabho. 14 Nawe, kuginsiku girya, abhantu abhaaru bhaamwikirirya Omukuru Yeesu, abhasaaja na abhakari bhonsego. Ego, bhaagendereryanga okwaruha bhukongʼu.
15 Okuringʼaana na ebhika bhya abhatumwa, abhantu bhaaringa bharahira abharweri kuginjira. Enu bhabhareerye kubhuriri na kubhirago, naho Petero hanú araahite, nyakara ekiiriiri kyaye kibhakuunʼye gati yaabho, bhahwene. 16 Emiganda emyaru gya abhantu, bhaajanga okurwa mumigi gya embarika wa omugi gwa Yerusaremu. Bhaaringa bharareeta abharweri na bhanú bhaaringa bhagwatirwe na ebhihwi ebhibhiibhi. Bhonsego, bhaahwenibhwa.
Abhatumwa bha Yeesu bharanyankibhwa
17 Kimwi omusyengeri omukuru, na abharikyaye bhonsego, bhanú bhaaringa bha omuganda gwa Abhasadukaayo, bhakabhamaahira orungʼeera abhatumwa bha Yeesu. 18 Kwa ego, bhakagwata abhatumwa bhayo, bhakabhabhoha mwigereja. 19 Nawe, obhutiku bhuyo, maraikab wa Omukuru Waryubha akaaja, akasiikura ebhiseku bhya erigereja riyo, akabharuusya-mo. Kimwi akabhakeerya ega, 20 “Mugende mwimirire murubhanja rwa erisyengerero rya Waryubha, mukeerye abhantu amangʼana gonsego eguru ya obhuhoru bhwa koko!” 21 Abhatumwa bhayo, hanú bheegwa amangʼana gayo, bhakamwenja nyenkyo juri murubhanja rwa erisyengerero, bhakagendererya okwihigirya abhantu muyo.
Eribhaga riyoriyo, omusyengeri omukuru, hamwi na abharikyaye bharya, bhakabhirikira abhakaruka bha Ekiyahudi bhonsego, bhasikane mwibharaja erikuru ryabho. Bhakatuma abharindi mwigereja, bhagiire abhatumwa bharya. 22 Nawe, hanú abharindi bhayo bhaasoha mwigereja, bhataanyoora-mo abhatumwa bharya. Kimwi bhakahunjuka kubhakuru bha eribharaja bharya, bhakabhakeerya ega, 23 “Hanú tuhikiiri kwigereja, tunyooreri ebhiseku bhyonsego bhisiikirwe, abharindi bheemiriiri embere wa ebhiseku. Nawe, hanú tubhisiikwiri twasoha munsi, tutaanyooreri-mo omuntu wowonse!” 24 Mbe, omukuru wa abharindi bha mwisyengerero erikuru rya Waryubha, na abhasyengeri abhakuru,c hanú bheegwa amangʼana gayo, bhakoobhoha, bhakabhuuranʼya ega, “Eringʼana riyo ryakabhe egaki?”
25 Nho, omuntu umwi akaaja, akabhakeerya ega, “Munyitegeerere! Abhantu bhanú mwabhoheri mwigereja, bharingi murubhanja rwa erisyengerero erikuru rya Waryubha, bheemiriiri bhareehigirya-mo abhantu!” 26 Nho, omukuru wa abharindi bha mwisyengerero erikuru akagya hamwi na abhasirikare, bhakabhareeta abhatumwa bharya. Nawe, bhaakora ego, bira okukora eriihe, kwa okubha bhoobhohanga abhantu bhataaja okubhatema na amagina.
27 Mbe, bhakabhareeta mwibharaja erikuru, bhakabheemirirya embere ya bhonsego. Kimwi omusyengeri omukuru akabhabhuurya ega, 28 “Tutaabhakaanʼya kwa obhuhaari ega, mutige okwihigirya abhantu kwa okutumira eriina rya Yeesu? Nawe bheenyu, mwanyarageenʼye ameehigiryo geenyu eguru yaaye, mumugi gonsego gwa Yerusaremu! Kweki muragamba ega, amasoro ga oruku rwaye garingi eguru yeetu!”
29 Petero na abhatumwa abharikyaye, bhakabhakeerya ega, “Tureenderwa okumwigwa Waryubha, okukira abhantu! 30 Bheenyu mweeta Yeesu kwa okumubhamba kumusarabha, nawe, Waryubha wa bhajaaji weetu yaamuhyukya. 31 Kweki yaamwinura na okumuhaana obhutungi kwa okumutuura orubhaara rwaye rwa obhuryo, naho abhe Omutungi na Omutuurya. Waryubha yaamukora ego, naho abheere Abhaisiraeri bhatige obhusarya bhwabho, naho bhaabhirwe. 32 Bheetu hamwi na Omutima Omurabhu unú Waryubha yaabhahaana bhonsego bhanú bharamwigwa, m-beemiririri bha amangʼana gayo gonsego.”
33 Hanú abhakuru bhayo, bheegwanga amangʼana gayo, bhaaringa bharajima bhukongʼu, na bhaaringa bhareenda okubheeta abhatumwa bhayo. 34 Nawe, mwibharaja muyo, yaaringa-mo Omufarisaayod umwi unú yaabhirikirwanga Gamarieri. Weeki yaaringa omwihigirya wa amaragiriryo, na yaasuukwanga bhukongʼu na abhantu bhonsego. Akeemirira embere ya abhachaama bha eribharaja, akaamura ega, abhatumwa bhahurukibhwe kibhara kwa eribhaga ekego. 35 Kimwi, akabhakeerya abhakuru abharikyaye bhayo, ega, “Bheenyu abhantu bha ekyaro kya Isiraeri, mwitegeerere mbere bhwaheene, mukyari okukora eringʼana rinú mureenda okukorera abhantu bhanu! 36 Muhiituke eginsiku ginú gyahita, yeebhuka omuntu umwi unú yaabhirikirwanga Teuda. Teuda uyo, yeekoryanga ega, m-muntu omukuru, na abhantu muna magana gane, bhaagwatana nawe. Nawe kubhuteero, yeetwa, na bhonsego bhanú bhaamwikiriryanga, bhakanyaragana. Na emirimu gyabho gyonsego, gikabha gya bhusa. 37 Kweki, kwibhaga rya okubhara abhantu, yeebhuka omuntu oundi. Omuntu uyo, yaaringa m-Mugariraaya, eriina ryaye yaabhirikirwanga Yuda. Weeki wonse, yaanyoora abhantu bha okumusoorana, naho bhagaranjure obhutungi bhwa Ekiruumi, nawe wonse yeetwa, na bhonsego bhanú bhaamwikiriryanga bhakanyaragana. 38 Mbe bhoono, ndabhatongera ega, mubhahaatire abhantu bhanu! Mutabhakorera eringʼana ryoryonse eribhiibhi. Nyoore emirimu gyabho ginu, gyaseemibhwa na abhantu, girihwa egyene. 39 Nawe, nyoore emirimu giyo, n-gya Waryubha, mutakunagya okubharibhira, muraabhe muramuhakaanʼya Waryubha omwene.”
40 Kimwi abharikyaye bhayo, bhakeekirirya amangʼana gaaye. Hanú bhaamara, bhakabhirikira abhatumwa bharya, bhakaamura ega, bhatemwe ebhisaamuri, kweki bhakabhakaanʼya okwihigirya abhantu kwa okutumira eriina rya Yeesu. Kimwi, bhakabhahaatira bhagende gyabho.
41 Abhatumwa bhayo, bhakarwa mwibharaja muyo, bhajomeerwe kwa okubha Waryubha yaaringa abhakoreri bhasuukwe okuhitira okujeerwa, kwa eriina rya Yeesu. 42 Bhataatiga okwihigirya abhantu na okubharaarikira Amangʼana Amajomu ega, Yeesu ngʼo Kiristu Omutuurya. Bhaagendererya okwihigirya na okuraarika eginsiku gyonsego murubhanja rwa erisyengerero erikuru rya Waryubha na muginyumba gyabho.