Yoana 4

Yeesu arahaira na omukari Omusamaria

Mbe, Yeesu akeegwa ega, Abhafarisaayo bhakeeriibhwe ega, arabhatiija na okunyoora abheehigira abhaaru okukira Yoana. 2 Nawe, obhuheene niiga, Yeesu omwene ataabhatiijanga, nawe, abheehigira bhaaye mbo bhaaringa bharabhatiija. 3 Kwa ego, akeemuka okurwa mukyaro kya Yudea hayo, hamwi na abheehigira bhaaye, akahunjuka mukyaro kya Gariraaya. 4 Mbe, bhoono yaaringa ereenderwa ega, ahite mukyaro kya Samaria. 5 Mbe, bhakahika mumugi gwa Samaria gunú gwabhirikirwanga ega, Sikaari. Omugi guyo, gwaringa haangʼi na omugunda gunú Yakobho yaamuhaana engabho omwana waaye Yusufu. 6 Hayo nho, kyaringa-ho ekisima kya Yakobho. Mbe, Yeesu akeekara embarika wa ekisima kiyo, naho amuunye, kwa okubha yaaringa aroseri na orugendo. Yaaringa muna ensa esansabha gya omubhasu.

7 Kimwi, omukari oumwi Omusamaria akaaja okutaha amanji mukisima hayo. Yeesu akamukeerya ega, “Maayi, ngʼaana amanji nnywe.” 8 Eribhaga riyo, abheehigira bhaaye bhaaringa bhagiiri mumugi okugura ebhyakurya. 9 Mbe, omukari uyo, akamukyukya ega, “Uuwe m-Muyahudi, na oni m-mukari Omusamaria. Kwaki oransabha nkuhaane amanji ga okunywa?” Yaagamba ego, kwa okubha Abhayahudi bhataasanganga na Abhasamaria. 10 Yeesu akamukyukya ega, “Nyoore okaamanyiri omutuho gwa Waryubha, na ega, niwi arakusabha amanji, okaamusabhiri, na wonse akaaturiri okukuhaana amanji ga obhuhoru.” 11 Omukari uyo akamukyukya Yeesu ega, “Omukuru, uuwe otaana kora ekintu kya okutahaira amanji, na ekisima kinu n-kitambi. Bhoono nunyoora-ha amanji ga obhuhoru gayo? 12 Jaaji weetu Yakobho omwene yaatuhaana ekisima kinu, wonse yaaringa aranywa amanji gaakyo hamwi na abhaana bhaaye na egintugo gyaye. Bhoono mbe, oreerora ega, uuwe m-mukuru okumukira weeki?” 13 Nho, Yeesu akamukyukya ega, “Omuntu wowonse unú aranywa amanji ganú gararwa mukisima kinu, ariigwa enyonta kweki. 14 Nawe, omuntu unú arinywa amanji ganú oni ndimuhaana, atariigwa enyonta koko. Amanji ganú ndimuhaana, garibha muna ekisekaani kya amanji munsi waaye, na garibha gararuusya obhuhoru bhwa koko.” 15 Nho, omukari uyo akamukeerya Yeesu ega, “Omukuru, ngʼaana amanji gayo, naho nteegwa enyonta kweki, na ntabhanga ndaaja okutaha amanji hanu.” 16 Yeesu akamukyukya ega, “Genda obhirikire omusaaja waaho, uuje nawe hanu.” 17 Omukari uyo, akamukyukya Yeesu ega, “Oni ntaana omusaaja.” Yeesu akamukeerya ega, “Ogambiri obhuheene ega, otaana omusaaja, 18 kwa okubha waamara okubha na abhasaaja bhataanu, na omusaaja unú oreekara nawe bhoonwego, ataringi omusaaja waaho. Ogambiri obhuheene.” 19 Omukari uyo, akamukyukya ega, “Omukuru, ndarora bhoono uuwe m-murooti. 20 Bhajaaji weetu bhaaringa bharamusyengera Waryubha munkuku inu, nawe, bheenyu Abhayahudi muragamba ega, ahasi ha okumusyengera Waryubha n-Yerusaremu.” 21 Yeesu akamukyukya ega, “Maayi, unyikirirye, eribhaga ririija rinú abhantu bhatarimusyengera Taata Waryubha munkuku inu, kasi Yerusaremu erya. 22 Bheenyu Abhasamaria murasyengera kinú mutamanyiri. Nawe, bheetu Abhayahudi turasyengera kinú tumanyiri, kwa okubha Waryubha arituurya abhantu kwa okuhitira ku Bhayahudi. 23 Eribhaga riraaja, kweki rimariri okuhika, rinú abhantu bhanú bharamusyengera Taata Waryubha kwa obhuheene, bharibha bharamusyengera kwa Omutima na kwa obhuheene. Taata Waryubha aratuna abhantu bhanú bharamusyengera kwa enjira iyo. 24 Waryubha m-Mutima. Abhantu bhanú bharamusyengera, bhareenderwa bhabhe bharamusyengera kwa Omutima na kwa obhuheene.” 25 Omukari uyo, akamukeerya Yeesu ega, “Mmanyiri ega, Masiha araaja, unú arabhirikirwa Kiristu Omutuurya. Kweki mmanyiri ega, hanú ariija, aritukeerya amangʼana gonsego.” 26 Kimwi, Yeesu akamukyukya ega, “Oni unú ndahaira na uuwe, nooni Masiha.”

27 Mbe, eribhaga riyo, abheehigira bhaaye bhakahunjuka. Bhakaruguura bhukongʼu, kwa okubha Yeesu yaaringa arahaira na omukari. Nawe, atariho kora oumwi unú yaabhuurya Yeesu ega, “Oreenda-ki kumwene?” kasi ega, “Kwaki orahaira nawe?”

28 Mbe, omukari uyo akatiga ensengo yaaye ya amanji hayo, akagya mumugi. Hanú yaahika, akakeerya abhantu ega, 29 “Tugende, murore omuntu unú yaankeererye amangʼana gonsego ganú naamara okugakora! Mbe, eratura okubha ega, uyo ngʼo Kiristu Omutuurya?” 30 Hanú abhantu bheegwa gayo, bhakarwa mumugi muyo, bhakagya ku Yeesu.

31 Hanú abhantu bhayo bhaaringa bhatarahika ku Yeesu, abheehigira bhaaye bhakamusabha ega, “Rabhi, nuurye ebhyakurya.” 32 Nawe, akabhakyukya ega, “Oni niina ebhyakurya bhinú bheenyu mutamanyiri.” 33 Nho, abheehigira bhaaye bhakabhuuranʼya ega, “Mbe, kuuna omuntu unú amureeteeri ebhyakurya?” 34 Yeesu akabhakyukya ega, “Ebhyakurya bhyani, n-kukora ganú areenda unú yaantuma, na okukunaanʼya emirimu gyaye. 35 Bheenyu mwanara okugamba ega, ‘Gitamiri emyeri ena ego okuhika omugeso.’ Nawe, oni ndabhakeerya ega, mumaahe emigunda kya ego giringi, omugeso gumariri okukongʼa, gureenderwa gugeswe. 36 Omugesi aranyoora amariho gaaye, wonse arakumanʼya omugeso kurusumo rwa obhuhoru bhwa koko. Kwa ego, omuhambi na omugesi, bhonsego bharanyoora obhujomerwa hamwi. 37 Bhuriho obhugambi bhunú bhuragamba obhuheene ega, ‘Omuntu oumwi arahamba, na oundi aragesa.’ 38 Oni naabhatuma bheenyu okugesa bhinú mutaahamba. Abhantu abhandi bhaakora emirimu emikongʼu, na bheenyu munyooreri obhwera bhwa emirimu gyabho.”

39 Mbe, Abhasamaria abhaaru bha mumugi guyo, bhakamwikirirya Yeesu, kwa okubha bheegwa obhwimiririri bhwa omukari uyo ega, “Omuntu uyo yaankeererye amangʼana gonsego ganú naamara okugakora.” 40 Hanú Abhasamaria bhaahika ku Yeesu, bhakamwisasaama yeekare hamwi nabho. Nho, akeekara mumugi guyo kwa eginsiku ebhiri. 41 Abhantu abhaaru bhukongʼu bhakamwikirirya Yeesu, okurekana na amangʼana ganú yaaringa aragamba. 42 Bhakamukeerya omukari uyo ega, “Obhwa mbere tumwikiriirye omuntu unu, kwa ekisigo kya amangʼana ganú otukeererye uuwe. Nawe bhoono, turamwikirirya kwa okubha twigwiri bheetu abheene ganú aragamba, na tumanyiri ega, heene unu ngʼo Omutuurya wa ekyaro.”

Yeesu arahwenʼya omwana wa omutungi

(Mataayo 8:5-13; Ruuka 7:1-10)

43 Hanú gyahita eginsiku ebhiri, Yeesu na abheehigira bhaaye bhakarwa eyo, bhakagendererya na orugendo rwa okugya mukyaro kya Gariraaya. 44 Yeesu yaaringa agambiri ega, “Omurooti atakusuukwa na abhantu bha mumugi gwa owaabho.” 45 Mbe, hanú yaahika Gariraaya eyo, abhantu bhakamugenihya, kwa okubha, bhonse bhaaringa bharuuji gonsego ganú Yeesu yaakora munyangi ya Epasaka, Yerusaremu eyo.

46 Yeesu akagya kweki mumugi gwa Kana ya Gariraaya, hanú yaaringa ahunjwiri amanji okubha edivai. Mbe, yaaringa-ho omukuru oumwi wa ekikama okurwa mumugi gwa Kaperinaumu. Omukuru uyo, yaaringa na omwana wa ekimura omurweri. 47 Omukuru uyo akeegwa ega, Yeesu ahindiri okurwa Yudea, na aringi Gariraaya. Akagya ku Yeesu na akamusabha ega, yaaje Kaperinaumu, amuhwenʼye omumura waaye, kwa okubha yaaringa omurweri omusingu. 48 Yeesu akamukyukya ega, “Bheenyu, nyoore mutaarore ebhimanyiiriryo na ebhiruguuryo, muteekirirye kora ahake!” 49 Omukuru uyo, akamukyukya ega, “Omukuru, ndakwisasaama, tugende omuhwenʼye omumura waani, akyari okukwa.” 50 Nawe, Yeesu akamukyukya ega, “Genda, omumura waaho, ahweneri.” Omukuru uyo, akeekirirya amangʼana ganú Yeesu amukeererye, kimwi akeemuka okugya iika.

51 Ejo wendeko, hanú yaaringa akyari kunjira, akasikana na abhakori bha emirimu bhaaye, bhakamukeerya ega, omumura waaye ahweneri. 52 Nho, akabhabhuurya ensa inú yaamba okukankamuka. Bhakamukyukya ega, “Ehooma yamwamukiri okwambira ejo, ensa muhungati gya omubhasu.” 53 Mbe, esewaabho akamanya ega, yaahweneri kwibhaga riryarirya Yeesu yaamukeerya ega, “Omumura waaho ahweneri.” Hayo, omukuru uyo, hamwi na abhantu bhonsego bha iika owaaye, bhakamwikirirya Yeesu. 54 Kinu kyaringa ekimanyiiriryo kya kabhiri kinú Yeesu yaakora mukyaro kya Gariraaya, hanú yaarwa mukyaro kya Yudea.