Nikodemasi aramutaarira Yeesu
3
Yaaringa-ho omutungi oumwi wa Abhayahudi wa omuganda gwa Abhafarisaayo, eriina ryaye yaabhirikirwanga ega, Nikodemasi. 2 Orusiku rumwi, obhutiku, akagya ku Yeesu akamukeerya ega, “Rabhi, tumanyiri ega, uuwe m-mwihigirya unú waatumwa na Waryubha, kwa okubha atariho omuntu unú aratura okukora ebhimanyiiriryo bhinú uuwe orakora, nyoore Waryubha ataringi hamwi nawe.” 3 Yeesu akamukyukya ega, “Ndakukeerya obhuheene ega, atariho omuntu unú aratura okusoha mubhukama bhwa Waryubhaa nyoore ateebhurwe orwa kabhiri.”b 4 Nikodemasi akamubhuurya Yeesu ega, “Omuntu aratura egaki okwibhurwa orwa kabhiri enu agoteri? Bhoono, aratura okuhunjuka munda ya ngʼina waabho yeebhurwe kweki?” 5 Yeesu akamukyukya ega, “Ndakukeerya obhuheene ega, atariho omuntu unú aratura okusoha mubhukama bhwa Waryubha, nyoore ateebhurwe kwa amanji na kwa Omutima Omurabhu. 6 Omuntu areebhurwa na abheebhuri bhaaye kwa enjira ya omubhiri, nawe, kwa omutima, areebhurwa na Omutima Omurabhu. 7 Otaruguura kwa okubha nkukeererye ega, ‘Oreenderwa wibhurwe orwa kabhiri.’ 8 Omuyaga gurahuuta okubhata enú gureenda. Omuntu areegwa, nawe, atakumanya ahasi enú gurarwa na enú guragya. Niigo eringi kumuntu wowonse unú yeebhurwa na Omutima Omurabhu wa Waryubha.” 9 Nikodemasi akamubhuurya Yeesu ega, “Bhoono, omuntu aratura egaki okwibhurwa na Omutima Omurabhu wa Waryubha?” 10 Yeesu akamukyukya ega, “Uuwe m-mwihigirya unú orasuukwa bhukongʼu mukyaro kya Isiraeri, na uuwe otamanyiri amangʼana gayo? 11 Ndabhakeerya obhuheene ega, bheetu turagamba ganú tumanyiri, na tureemiririra ganú twarora. Nawe, bheenyu mutakwikirirya obhwimiririri bhwetu. 12 Mbakeererye eguru ya amangʼana ga mukyaro hanu, nawe, bheenyu mutakunyikirirya. Bhoono muratura egaki okunyikirirya nyoore ndaabhakeerye eguru ya amangʼana ga murwire? 13 Atariho omuntu wowonse unú yaakagiiri murwire. Nawe, Omwana wa Adamu, ngʼo yaaja okurwa murwire.14 “Hanú Abhaisiraeri bhaaringa kukibhara, Musa yaakora ekisusano kya enjoka ya eshabha na okukiriinʼya kumuti.c Egoego Omwana wa Adamu areenderwa ariinibhwe, 15 naho kira omuntu unú aramwikirirya abhe na obhuhoru bhwa koko.”
16 Waryubha yaahanja bhukongʼu abhantu bhonsego bha mukyaro. Kiyo nkyo kyakora akatuma Omwana waaye omumwemwe yaaje mukyaro, naho, kira omuntu unú aramwikirirya atabhura, nawe, abhe na obhuhoru bhwa koko. 17 Waryubha ataamutuma Omwana waaye mukyaro, naho abhuturire ekiina abhantu, nawe, abhatuurye okuhitira kuweeki. 18 Waryubha atakubhuturira ekiina omuntu unú aramwikirirya Omwana waaye. Nawe, omuntu unú atakumwikirirya, amariri okubhuturirwa ekiina, kwa okubha ataramwikirirya Omwana waaye omumwemwe. 19 Okubhutura ekiina kuringi ega, endingaasi yaaja mukyaro munu,d nawe, abhantu bhakahanja ekisunte okukira endingaasi, kwa okubha amakorwa gaabho m-mabhiibhi. 20 Abhantu bhonsego bhanú bharakora amakorwa amabhiibhi, bheeki bharaiibhihirirwa endingaasi. Bhatakwenda okuuja mundingaasi, naho amakorwa gaabho amabhiibhi gatariija okumanyikana. 21 Nawe, abhantu bhonsego bhanú bharakora amakorwa ga heene, bheeki bharatuna okubha mundingaasi, naho emanyikane ega, ngʼ-Waryubha unú arabhahaana obhuturo bhwa okugakora.
Yoana Omubhatiiji areemiririra Yeesu
22 Mbe, hanú gayo gaahwa, Yeesu na abheehigira bhaaye bhakarwa mumugi gwa Yerusaremu bhakagya mukyaro kya Yudea. Akeekara eyo kwa eribhaga nyabhurebhe, akabhanga arabhatiija abhantu. 23 Yoana wonse yaaringa arabhatiija abhantu ahasi hanú haabhirikirwanga ega, Ainoni, haangʼi na ekijiji kya Saremu. Eyo ngʼyo gaaringa-yo amanji amaaru, na abhantu bhakagya ku Yoana, naho abhabhatiije. 24 Kwibhaga riyo, Yoana yaaringa ataragwatwa na okutuurwa mwigereja.
25 Mbe orusiku rumwi, abheehigira bha Yoana bhakaamba okuhakaananʼya na Omuyahudi oumwi eguru ya egimiira gya okwiraama. 26 Nho, abheehigira bhakagya ku Yoana, bhakamukeerya ega, “Rabhi, orahiituka omuntu unú waaringa nawe ngʼambu ya oruuji rwa Yorodani, na uuwe weemiririra amangʼana gaaye. Bhoono weeki wonse arabhatiija, na abhantu bhonsego bharamugya-ko!” 27 Yoana akabhakyukya ega, “Omuntu atakutura okunyoora ekintu kyokyonse, nyoore Waryubha ataramuhaana. 28 Bheenyu m-beemiririri bhaani, kuganú naagamba ega, ‘Oni ntaringi Kiristu Omutuurya, nawe, Waryubha yaantuma, naho mmukangatire Kiristu Omutuurya.’ 29 Omwenga ngʼ-wa omuteti. Nawe, omusaani wa omuteti, unú areemirira haangʼi na omuteti, na okwitegeerera kya ego aragamba, arajomerwa bhukongʼu hanú areegwa eriisi rya omuteti. Kwa ego, kuyo nko okujomerwa kwani, kunú kukuneeni. 30 Weeki areenderwa abhe omukuru okukira oni, nawe, oni mbe omuke bhukongʼu.”
Amangʼana ga unú arwiri murwire
31 Unú arwiri eguru murwire, yaana obhutungi okukira ebhintu bhyonsego bhinú bhiringi mukyaro. Wowonse unú ararwa mukyaro aragamba amangʼana ga mukyaro munu. Nawe, unú arwiri murwire, yaana obhutungi okukira ebhintu bhyonsego. 32 Weeki areemiririra ganú yaarora na okwigwa, nawe, atariho omuntu wowonse unú areekirirya amangʼana gaaye. 33 Omuntu wowonse unú areekirirya obhwimiririri bhwaye, areemiririra ega, Waryubha ngʼ-wa obhuheene, 34 kwa okubha Waryubha yaamutuma Yeesu, naho agambe amangʼana gaaye. Waryubha amuheeri Omutima Omurabhu bira endengo. 35 Taata Waryubha amuhanjiri Omwana waaye, kweki amuheeri obhutungi eguru ya ebhintu bhyonsego. 36 Omuntu wowonse unú aramwikirirya Omwana wa Waryubha, uyo yaana obhuhoru bhwa koko. Nawe, omuntu wowonse unú aramwanga, uyo ataana obhuhoru bhwa koko, kwa okubha enkoro ya Waryubha eragendererya okubha eguru yaaye.