Ekirengyo kya okumusabha Waryubha
18
Mbe, Yeesu akabhakeerya abheehigira bhaaye ekirengyo, naho okubhoorokya ega, bhareenderwa okugendererya okusabha eribhaga ryonsego, bhatakwa omutima. 2 Akagamba ega, “Yaaringa-ho omubhuturi wa ekiina umwi, mumugi nyabhurebhe. Omubhuturi wa ekiina uyo, ataamwigwanga Waryubha, kora ataamanyanga omuntu wowonse. 3 Mbe, mumugi guyo, yaaringa-mo omusino umwi. Uyo, akabha aramusyembera omubhuturi wa ekiina uyo, aramukomererya ega, ‘Ndasabha unyimiririre, naho nnyoore obhuheene bhwani, gati yaani na omusigu waani.’4 “Kwa eribhaga eritambi, omubhuturi wa ekiina uyo, yaaringa araanga okumwimiririra omusino uyo. Nawe kubhuteero, akeebhuurya ega, ‘Onyoora oni ntakumwigwa Waryubha, kora ntakumanya omuntu wowonse, 5 ndaamwimiririre omusino unu, naho anyoore obhuheene bhwaye bhwangu. Nyoore tiigo, araagendererye okunseeta, kubhuteero araanjimye.’”
6 Mbe, Omukuru Yeesu, akagendererya okugamba ega, “Mwitegeerere amangʼana ganú omubhuturi wa ekiina wa obhusarya uyo, yaagamba! 7 Nko okugamba ega, Waryubha atakwimiririra abhasorwa bhaaye? Hanú bharimukuurira obhutiku na omubhasu, aritigita okubheetegeerera? 8 Ndabhakeerya ega, aribhareetera obhuheene bhwabho bhwangu. Nawe oni, Omwana wa Adamu, hanú ndihunjuka mukyaro, ndinyoora abhantu bhakyanyikirirya?”
Ekirengyo kya Omufarisaayo na omutobhya wa erigooti
9 Kweki, Yeesu akabhakeerya ekirengyo ekindi, kurusumo rwa abhantu bhanú bhareerora ega, mbo abhaheene embere ya Waryubha, enu bharajeera abhantu abhandi. Akagamba ega, 10 “Orusiku rumwi, abhantu bhabhiri bhaariina okugya mwisyengerero erikuru okumusabha Waryubha. Oumwi yaaringa Omufarisaayo, na oundi yaaringa omutobhya wa erigooti.
11 “Hanú bhaahika, Omufarisaayo akeemirira omwene hagari, akasabha ega, ‘Ndakugungya Waryubha, kwa okubha oni ntaringi omusarya kya abhantu abhandi, abheebhi, abha obhusarya, abhasuunu, kora ntaringi kya omutobhya wa erigooti uyo. 12 Ndeeyimanga ebhyakurya kabhiri kubhutuuro, na kya ego ndanyoora ebhintu, niigo ndakuruusiryanga ejaaka.’
13 “Nawe, omutobhya wa erigooti weeki, yaaringa yeemiriiri kwa hare, kora ataasakya okwinura ameeso gaaye murwire,a akabha areetematema kukikubha kwa okusurumbara, aragamba ega, ‘Waryubha, unyabhire, oni m-mukori wa obhusarya!’”
14 Kweki, Yeesu akoongerya okugamba ega, “Ndabhakeerya ega, omutobhya wa erigooti uyo, hanú yaahiringita okuhunjuka iika, yaaringa abheeri omuheene embere ya Waryubha. Nawe, omurikyaye ataabhiirwa. Kwa okubha, unú areeriinʼya omwene, Waryubha arimwituumya. Na unú areeyituumya omwene, Waryubha arimuriinʼya.”
Yeesu aranonka abhaana abhake
15 Eribhaga erindi, abhantu bhakareetera Yeesu abhaana kora ebhijaare, naho abhatuurire amabhoko gaaye abhanonke. Nawe, abheehigira bhaaye hanú bhaarora ego, bhakakemera abhantu bhayo. 16 Nawe, Yeesu akabhirikira abhaana bhayo, akabhakeerya ega, “Mutige abhaana abhake bhaaje kuoni, mutabhakaanʼya, kwa okubha, obhukama bhwa Waryubha m-bwa abhantu kya abhaana bhanu. 17 Ndabhakeerya obhuheene ega, omuntu wowonse unú atakwikirirya obhukama bhwa Waryubha, kya omwana omuke,b uyo atakutura okusoha mubhukama bhuyo.”
M-bukongʼu kumuniibhi okusoha mubhukama bhwa Waryubha
18 Yaaringa-ho omutungi umwi. Omutungi uyo, akamubhuurya Yeesu ega, “Omwihigirya owa heene, nkore egaki, naho nnyoore obhuhoru bhwa koko?”
19 Yeesu akamukyukya ega, “Kwaki orambirikira owa heene? Atariho owa heene, nawe, Waryubha omwenego.c 20 Omanyiri emigiro gya Waryubha ginú giragamba ega, ‘Otakora ameega kibhara, oteeta, oteebha, otagamba obhwimiririri bhwa obhubheehi, obhasuuke eseweenyu na ngʼina weenyu.’d” 21 Kimwi, omutungi uyo, akamukyukya ega, “Emigiro giyo gyonsego, naagigwata okurwa mubhwana bhwani.” 22 Yeesu hanú yeegwa ego, akamukeerya ega, “Okyasuuhirwa na eringʼana rimwi ego. Genda ogurye ebhintu bhyaho bhyonsego. Egimbirya ginú oraanyoore, ogabhire abhatobhu. Nyoore oraakore ego, orabha wituuriiri ekibhumbiko murwire. Hanú orimara, uuje unsoorane.” 23 Omutungi uyo, hanú yeegwa gayo, akasurumbara bhukongʼu, kwa okubha yaaringa omuniibhi bhukongʼu.
24 Yeesu, hanú yaamurora kya ego asurumbeeri bhukongʼu, akagamba ega, “M-bukongʼu kubhaniibhi, okusoha mubhukama bhwa Waryubha! 25 M-bunyoohu kungamia okuhita muryoobho rya esindani okukira abhaniibhi okusoha mubhukama bhwa Waryubha!”
26 Abhantu bhanú bheegwa gayo, bhakagamba ega, “Bhoono niwi aratura okutuuribhwa?” 27 Yeesu akabhakeerya ega, “Amangʼana ganú gatakuturikana kubhantu, ku Waryubha garaturikana.”
28 Kimwi Petero akamukyukya ega, “Maaha! Bheetu twatiga ebhintu bhyetu bhyonsego, tukakusoorana!” 29 Yeesu akagamba ega, “Ndabhakeerya obhuheene ega, omuntu wowonse unú yaatiga enyumba yaaye, kasi omukari waaye, abhamura bhaabho, abheebhuri bhaaye, kasi abhaana bhaaye, kurusumo rwa obhukama bhwa Waryubha, 30 uyo arinyoora ebhintu ebhyaru bhukongʼu akyari mukyaro hanu, okukira bhinú yaatiga. Kweki, eribhaga rinú ririija, arinyoora obhuhoru bhwa koko.”
Yeesu arahaira orwa kasatu eguru ya okukwa//na okuhyuka kwaye
31 Yeesu akabhabhirikira abhatumwa bhaaye ekumi na bhabhiri kabhejyo, akabhakeerya ega, “Mwitegeerere! Turagya mumugi gwa Yerusaremu. Na eyo gonsego ganú gaangʼoorwa na abharooti eguru ya Omwana wa Adamu, garikunaana. 32 Arituurwa mumabhoko ga abhantu bhanú bhataringi Abhayahudi. Bheeki bharimujabhura, bharimutuka, na bharimutuujira amate. 33 Kweki, bharimutema emijariti na bharimwita. Nawe, orusiku rwa kasatu okurwa okukwa kwaye, arihyuka.”
34 Amangʼana ganú Yeesu yaabhakeerya, bhataagangʼamura, kwa okubha bhaaringa bhabhisirwe ensonga yaago. Bhataamanya arahairira-ki.
Yeesu aramuhwenʼya omuhoku
35 Yeesu yaaringa ahikiri haangʼi na mumugi gwa Yeriko. Embarika wa enjira yaaringa-ho omuhoku umwi, yeekeeri arasabhiirirya. 36 Hanú yeegwa omuganda gwa abhantu bharahita hayo, akabhabhuurya ega, “Niki kiringi eyo?” 37 Bhakamukyukya ega, “Yeesu wa Najareeti arahita.”
38 Rumwigo, omuhoku uyo, akajiirira bhukongʼu ega, “Yeesu, Omuhiiri Daudi,e ndakwisasaama ummaahire ekyabhira!” 39 Nawe, abhantu bhanú bhaaringa kurugendo ruyo, bhakabha bharamukemera ega, “Kira!” Nawe, weeki akagendererya okukunga kwa eriisi erinene ega, “Omuhiiri Daudi, ndakwisasaama ummaahire ekyabhira!” 40 Yeesu akeemirira, akabhakeerya bhamureete omuhoku uyo embere yaaye. Mbe, omuhoku uyo, hanú yaahika haangʼi na Yeesu, Yeesu akamubhuurya ega, 41 “Oreenda nkukorere egaki?” Wonse akakyukya ega, “Omukuru, ndeenda ndore kweki.” 42 Yeesu akamukeerya ega, “Rora kweki! Eimani yaaho ekuhwenerye.” 43 Rumwigo, akarora kweki, akabha aramusoorana Yeesu, enu aramugungya Waryubha. Abhantu bhonsego bhanú bhaarora gayo, bhakabha bharamugungya Waryubha.