Ameehigiryo eguru ya amasakyo na okwabhirana
17
Mbe, Yeesu akabhakeerya abheehigira bhaaye ega, “Amasakyo ganú garakora abhantu bhajeeme na okukora obhusarya, garaabhe-ho koko. Nawe, omuntu unú araakore amasakyo gayo gabhe-ho, arikirora-ko. 2 Nyakara omuntu uyo, akaabhoheerwe ensyo mwigoti na okweswa gatigati wa enyanja, okukira okukora oumwi wa abhake bhanú bharanyikirirya, ajeeme na okukora obhusarya! 3 Kwa ego, mwiyangararirenga mutariija okukora obhusarya!a“Nyoore omuhiiri waaho araakusarirye, omukaanʼye. Hanú araakusabhe okumwabhira, mwabhire. 4 Nyoore kira eribhaga araabhe arahunjuka kuuwe, arakukeerya ega, ‘Unyabhire,’ mwabhire! Kora nyoore araakusarirye mara muhungati kurusiku rumwi, mwabhire!”
Eginguru gya eimani
5 Nho, abhatumwab bha Yeesu bhakamukeerya ega, “Omukuru, otukongʼye eimani!” 6 Wonse akabhakyukya ega, “Kora mukaabheeri na eimani enke, kya akabhusuro ka eharadari, mukaagukeererye omuti omunene gwa omukuyu ega, ‘Ihika hanu, ogende, wihambe munyanja!’ gukaabheegwiri.
Ameehigiryo eguru ya obhukori bhwa emirimu
7 “Tugambe oumwi gati yeenyu yaana omukori wa emirimu, unú aragoomya kasi arariisya amangʼondi. Omukori wa emirimu uyo, hanú araahinde iika okurwa eyo, omukuru waaye aratura okumukeerya rumwigo, ‘Ikara, orye ebhyakurya’? 8 Tiigo-ha. Oraamukeerye ega, ‘Nseemerya ebhyakurya, wiseemye okunkorera emirimu, hanú nakabhe ndarya na okunywa. Hanú nakamare, nho uuwe wonse wakarye na okunywa.’ 9 Kora otakumugungya omukori wa emirimu uyo, kwa okubha akoreri ganú akeeriibhwe okukora.
10 “Egoego na bheenyu, hanú murimara okukora gonsego ganú mwakeeribhwa na Waryubha, mugambe ega, ‘Bheetu m-bakori bha emirimu ego. Tukoreri ganú tureenderwa okukora.’”
Yeesu arahwenʼya abhagenge ekumi
11 Yeesu, hanú yaaringa aragya mumugi gwa Yerusaremu, akahitira kurutunga rwa ekyaro kya Samaria na Gariraaya. 12 Hanú yaasoha mukijiji kimwi, akasikana na abhagenge ekumi. Abhagenge bhayo, bhakeemirira hare nawe, 13 bhakagamba kwa eriisi erinene ega, “Omusuukwa Yeesu, otwabhire!”
14 Yeesu hanú yaabharora, akabhakeerya ega, “Mugende mwiyorokye kubhasyengeri ega, muhweneri.”c Hanú bhaaringa bharagya, bhakeeraama.
15 Oumwi waabho, hanú yaarora ega, amariri okuhwenibhwa, akahunjuka ku Yeesu, aramutogoonʼya Waryubha kwa eriisi erinene. 16 Hanú yaahika, akatema hansi ebhiru embere yaaye, akahiinya obhusu bhukahika hansi, enu aramugungya. Omuntu uyo, yaaringa Omusamaria.
17 Yeesu akagamba ega, “M-bantu ekumi bhanú bharaamirwe. Bhoono, abhandi kenda bharingi-ha? 18 Atahunjukiri kora omuntu oundi okumutogoonʼya Waryubha, m-mugeni unu omwenego?” 19 Nawe, Yeesu akamukeerya ega, “Imirira, ogende gyaho! Eimani yaaho ekuhwenerye.”
Ganú garituuka hanú Omwana wa Adamu ariija
20 Mbe, Abhafarisaayo bhakamubhuurya Yeesu ega, “Obhukama bhwa Waryubha, bhuriija ruuha?” Yeesu akabhakyukya ega, “Okuuja kwa obhukama bhwa Waryubha, kutaringi kya ekimanyiiriryo kinú kiratura okumaahikana. 21 Abhantu bhataritura okugamba ega, ‘M-bunu hanu!’ kasi ‘M-burya harya!’ Mwitegeerere mwigwe! Obhukama bhwa Waryubha muunabho.”
22 Kimwi, Yeesu akabhakeerya abheehigira bhaaye ega, “Kuginsiku ginú giriija, muribha na enamba ya okurora kora orusiku rumwi runú Omwana wa Adamud aritunga ekyaro, nawe mutarirurora. 23 Abhantu bharibhakeerya ega, ‘Mumaahe! Ngʼ-urya harya!’ kasi ‘Mumaahe! Ngʼ-unu hanu!’ Nawe, abhantu bhayo, mutabhakenyerera. 24 Mumanye ega, Omwana wa Adamu hanú arihunjuka, ariija kya ego orukubha ruramesya, rumwigo na okungʼarabha egimbaara gyonsego gya orwire. 25 Nawe okwamba, Omwana wa Adamu, ereenderwa anyoore enyanko enene, yaangwe na abhantu bha orwibhuro runu.
26 “Kya ego yaaringa kwibhaga rya Nuhu,e niigo eribha eginsiku gya okuhunjuka kwa Omwana wa Adamu. 27 Eribhaga rya Nuhu, abhantu bhaaringa bhararya na okunywa, bhaaringa bharateta na okutetwa, okuhikira orusiku runú Nuhu na abhantu bhaaye, bhaasoha muryato erinene. Hanú bhaamara okusoha ego, embura enjaru ya obhusiki ekatwa, amanji gakeejura mukyaro kyonsego, gakabhasikya abhandi bhonsego.
28 “Kora kwibhaga rya Ruutu,f amangʼana gaaringa egoego. Abhantu bhaaringa bhararya na okunywa, bhaaringa bharagura na okugurya, bhaaringa bharagoomya na okuhamba egimbusuro, na bhaaringa bharahagaaja. 29 Nawe, runú Ruutu na abhaana bhaaye bhaarwa mumugi gwa Sodoma, omururo omuhaari gukeeka okurwa murwire kya embura, gukabhasikya abhandi bhonsego.
30 “Ego niigo eribha, orusiku runú Omwana wa Adamu arihunjuka mukyaro hanu, Waryubha arimukundukura. 31 Orusiku ruyo, omuntu unú orinyoora atiriiri kurusara, ateetuuma okugega ebhintu bhyaye munyumba, weeki angʼose.g Egoego, na omuntu unú orinyoora aringi mumugunda, atahunjuka iika okugega kyokyonse, weeki angʼose. 32 Muhiituke kinú kyamunyoora omukari wa Ruutu!h 33 Omuntu wowonse unú areenda okuhonʼya obhuhoru bhwaye bhwa mukyaro munu, aribhubhurya obhuhoru bhwaye koko. Nawe, omuntu unú ariruusya obhuhoru bhwaye kurusumo rwani, arinyoora obhuhoru bhwa koko.
34 “Ndabhakeerya ega, obhutiku bhwa ruyo, abhantu abhabhiri bhanú orinyoora bhareeri kubhuriri bhumwi, oumwi arigegwa, oundi aritigwa. 35 Nyoore abhakari abhabhiri bharibha bharasya hamwi, oumwi arigegwa, oundi aritigwa. 36 [Abhasaaja abhabhiri, bharaabhe bharakora emirimu mumugunda, oumwi arigegwa, oundi aritigwa.]i”
37 Abheehigira bhakamubhuurya ega, “Omukuru, amangʼana gayo garikoreka-ha?” Akabhakyukya ega, “Hanú haana ekigundo, nho amatoonyi gareekumanʼya. Kwa ego, amangʼana gayo garyorokya ega, obhuteero bhwa ekyaro bhuringi haangʼi.”