Yakobho na abhantu bhaaye bharangʼanyira Misiri
46
Nho,
Yakobho akaamba orugendo okubhata Misiri na abhantu bhaaye na ebhintu bhyaye bhyonsego.
Hanú yaahika Bheeri-Sheebha,
akaruusya ekimwenso ku Waryubha wa esewaabho Esaaka.
2 Obhutiku,
Waryubha akahaira na Yakobho mukirooto,
akamubhirikira,
“Yakobho,
Yakobho!”
Wonse akeetabha ega,
“Ndingi hanu!”
3 Waryubha akamukeerya ega,
“Oni nooni Waryubha,
Waryubha wa eseweenyu,
otoobhoha okugya Misiri,
kwa okubha ndikukora obhe na orwibhuro orwaru hanú oribha eyo.
4 Oni ndagya hamwi na uuwe Misiri,
na oni omwene ndikuhunjukya kweki Kanaani.
Hanú orikwa,
Yusufu ngʼo arikukunya.”
5 Nho,
Yakobho akeemuka okurwa Bheeri-Sheebha.
Abhaana bhaaye bhakamutuura weeki,
na abhaana bhaabho abhake,
hamwi na abhakari bhaabho,
mumatoka ginú omukama wa Misiri yaaringa amutumiiri.
6 Bhakagega egintugo na ebhintu ebhindi bhinú bhaaringa bhanyooreri Kanaani.
Yakobho akagega orwibhuro rwaye ronsego,
7 abhaana bhaaye,
abheejukuru bhaaye bha ekihara na bha ekimura,
bhonsego akabhahira Misiri.
Orwibhuro rwa Yakobho
8 Amariina ga abhaana bhanú Yakobho yeebhura na Reya,
bhanú bhaasoha Misiri n-ganu.
Rubheni ngʼo omutangi wa Yakobho.
9 Abhamura bha Rubheni bhaaringa Enoki,
Paru,
Hejironi na Karimi.
10 Abhamura bha Simeoni bhaaringa Yamweri,
Yamini,
Ohaadi,
Yakini,
Sohari na Shauri,
unú yeebhura kumukari Omukanaani.
11 Abhamura bha Raawi bhaaringa Gerishoni,
Kohati na Merari.
12 Abhamura bha Yuda bhaaringa Eri,
Onaani,
Shera,
Peresi na Jeera.
Nawe,
Eri na Onaani bhaakwira mukyaro kya Kanaani.
Na abhamura bha Peresi bhaaringa,
Hejironi na Hamuri.
13 Abhamura bha Isakari bhaaringa Tora,
Pufa,
Yashubhu na Shimuroni.
14 Abhamura bha Jabhuroni bhaaringa Seredi,
Eroni na Yareri.
15 Bhayo bhonsego,
mbo abhamura na abheejukuru bhanú Yakobho yeebhura na Reya mukyaro kya Padani-Aramu,
omuhara waaye Dina wonse,
yeebhurirwa eyo.
Abhaana bhaaye,
abhahara na abheejukuru bhonsego,
bhaaringa bharahika mirongo esatu na bhasatu.
16 Abhamura bha Gadi bhaaringa Sefoni,
Hagi,
Shuni,
Esibhoni,
Eri,
Arodi na Areeri.
17 Abhamura bha Asheri bhaaringa Imuna,
Ishifa,
Ishifi,
Bheria na omuhara waabho Sera.
Abhamura bha Bheria bhaaringa Hebheri na Marikyeri.
18 Bhayo bhonsego,
mbo abhaana na abheejukuru bhanú Yakobho yeebhura na Jiripa,
omugaya unú Rabhani yaahaana omuhara waaye Reya.
a Abhaana na abheejukuru bhaaye bhonsego bhaaringa bharahika ekumi na bhasansabha.
19 Abhamura bhanú Yakobho yeebhura na omukari waaye Raheri,
bhaaringa Yusufu na Bhenjamini.
20 Abhamura bha Yusufu bhanú yeebhurira mukyaro kya Misiri bhaaringa Manase na Ifurahimu.
Abhamura bhayo,
yaabheebhura na Asenati,
omuhara wa Potifera omusyengeri wa mumugi gwa Oni.
21 Abhamura bha Bhenjamini bhaaringa Bheera,
Bhekeri,
Ashibheri,
Gera,
Naamani,
Ehi,
Roshi,
Mupimu,
Hupimu na Aridi.
22 Bhayo bhonsego,
mbo abhaana na abheejukuru bhanú Yakobho yeebhura na Raheri.
Abhaana na abheejukuru bhonsego bhaaringa bharahika ekumi na bhane.
23 Omwana wa Daani yaaringa Hushimu.
24 Abhaana bha Nafutari bhaaringa Yaseeri,
Guni,
Yeseeri na Shiremu.
25 Bhayo mbo abhaana na abheejukuru bhanú Yakobho yeebhura na Bhiriha,
omugaya unú Rabhani yaahaana omuhara waaye Raheri.
Abhaana na abheejukuru bhonsego,
bhaaringa bharahika muhungati.
26 Abheebhurwa bhonsego bhanú Yakobho yaangʼaanya nabho okugya mukyaro kya Misiri,
okutiga abhakari bhaabho,
bhaaringa mirongo esansabha na esansabha.
27 Misiri eyo,
Yusufu yaaringa yeebhwiri-yo abhamura bhabhiri.
Kwa ego,
abheebhurwa bhonsego bha Yakobho bhanú bhaasoha Misiri,
hanú orongerye na abheebhurwa bha Yusufu,
bhaahika abhantu mirongo muhungati.
Yakobho arahika Misiri
28 Yakobho akakangatya Yuda ku Yusufu agye okuhaira nawe,
amoorokye enjira ya okugya Gosheni.
Yakobho na abhamura bhaaye,
hanú bhaahika Gosheni,
29 Yusufu akaseemya ematoka yaaye ya okurutwa na egifaraasi,
akagya Gosheni okuturuungʼana esewaabho.
Hanú yaamuhikiira,
akamuhumbata na okukuura kwa eribhaga eritambi.
30 Nho,
Yakobho akamukeerya ega,
“Kora nkaakwa bhoono m-bwaheene,
kwa okubha mmariri okukurora ega,
okyari omuhoru.”
31 Nho,
Yusufu akakeerya abhahiiri bhaaye hamwi na abhandi bhonsego bha iika owa esewaabho ega,
“Ndagya okukeerya omukama wa Misiri ega,
mumariri okurwa mukyaro kya Kanaani,
muujiri kuoni.
32 Nakamukeerye ega,
bhanu m-batugi bha egintugo,
bhaajiri na egimburi,
amangʼondi,
egingʼombe na ebhintu bhyabho bhyonsego.
33 “Mbe,
omukama hanú yakabhabhirikire na okubhabhuurya ega,
‘Muuna emirimu-ki?’
34 mumukyukye ega,
‘Ee omukuru,
bheetu abhagaya bhaaho,
m-bariisya bha egintugo okurwa obhwana okuhikira reero inu,
emirimu gyetu gyarwa kubhajaaji weetu.’
Mumukeerye ego,
naho mwikiriribhwe okwikara Gosheni,
kwa okubha ku Bhamisiri m-mugiro bhatakusanga na abhariisya bha egintugo bhonsego.”